Read lunyore OMUKAMBI 6 Bible Online

OMUKAMBI 6 - lunyore bible

OMUKAMBI 6

¹Ndabeye okhulola mbu musibala muno kalimwo amabi akakholwanga akarali akahabwene.

²Nyasaye anyala okhuhelesia omundu emiandu, obuhinda, noluyali, naratakhakhwo esindu siosi khu yibio ebiomwoyokwe kwekomba tawe, nebutswa Nyasaye siamuhelesia obunyali okhuliakhwo esiatsana tawe. Omundu omucheni niye obilitsanga. Yako nako nakabutswa, khandi namabi okhusila.

³Omundu niyakheebula abaana emia ndala, ma namenya emihika eminji, ne kata niyakhamenya emihika eminji narakhanyoolakhwo omukabwa kwobusangalibwe khandi narakhayabilwakhwo nolukoosi, kho mboolanga mbu omwana owibulwanga nafwiye omuyombele.

⁴Kabulakhwoho amalahi kosi khumwana uyo okhwibulwa sichilanga akor'ranga musiilima ma yebil'lwa.

⁵Omwana uyo siyalolakhwo eliuba nohomba okhumanyakhwo esindu siosi tawe, nebutswa ali nokhuhuluukha okhuyomba omundu uyo.

⁶Kata naba niyakhamenya emihika etsielefu tsibili, sasangal'langakhwo obulamu tawe. Kata mbwo bosi batsitsanga habundu halala.

⁷Omundu akholanga emilimochie chiosi khulwokhunyoola esialia nebutswa sianyoolanga ebimuhela tawe.

⁸Abachesi bayombela sina abahingwa? Nibulahi sina obwomutakha anyoolanga khulwokhumanya obwokhwelinda mubulamu?

⁹Nobulahi okhwesiela esioli n'nasio okhuyomba okhwekomba ebindu ebinji. Yako nakabutswa. Kali singa okhuteema okhutiila obusindu.

¹⁰Esindu siosi esiekholanga luno, siali okhumanyikha khale mbu siakhabeho, nefwe fwesi khwamanya mbu omundu sianyala okhuhingana nende uyo omuyomba tawe.

¹¹Amang'ana amenji akol'lomanga kabula esifune; ne kamukasila sina omundu?

¹²Omundu wosi yakhamanya mbwena akali amalahi khu ifwe mubulamu bwefwe obwamatukhu matititi khandi akabutswa - obulamu obubiranga singa esiniini? Kata niwina onyala okhumanya akakhekhole musibala nikhumal'le okhufwa?