Read lunyore OMUKAMBI 7 Bible Online

OMUKAMBI 7 - lunyore bible

OMUKAMBI 7

¹Eliira lilahi liyomba amafura kesuswa akobukusi, khandi litukhu liokhufwa liyomba litukhu liokhwibula.

²Nobulahi okhutsia mumasika okhuyomba okhutsia mwisabo, sichila yisio nesitsusio khubali mwoyo mbu lifwa libalindil'langa bosi.

³Esibeela siyomba okhutsekha; sinyala okhukhuunia hamoni, nebutswa sikhuhetsanga tsinganakani tsiobuchesi.

⁴Omwoyo kwomuchesi kuli munyumba yamasika; ne emioyo chiabahingwa chili munyumba yobusangali.

⁵Nobulahi okhuhul'la akobukondekhi bwabachesi, okhuyomba okhuhul'la abahingwa nibakhwembelanga olwembo lwokhukhwitsoomia.

⁶Okhutsekha khwabahingwa, khufwana singa okhurulikha khwebisisia m'mul'lo. Sikhulikhwomwo nesifune tawe.

⁷Tooto olwomundu omuchesi asandianga abasie kamukholanga okhufwana omuhingwa. Noba nohuchil'la ebihetso, olononia oluyali lulwo.

⁸Obumalilikhi bweling'ana nobulahi okhuyomba obuchiachilo bwalio. Obwesimilisi buyomba obweloli.

⁹Oranguha okhusinyikha tawe, okhuba obusinyikhi bumenyanga mubilifu biabahingwa.

¹⁰Orareeba mbu, “Esichilanga amatukhu kakhale nikali amalahi okhuyomba kano nisina?” Lireebo yilio silili eliomundu omuchesi anyala okhureeba tawe.

¹¹Obuchesi nobulahi singa obulaame buli obulahi; ne buli nobukhala khu yabo abali mwoyo.

¹²Obuchesi nesiesingo, singa obwamapesa kali esiesingo; ne obulahi bwobuchesi mbwobuno, mbu bulindanga obulamu bwe uyo oli n'nabwo.

¹³Kanil'la khumilimo chia Nyasaye, niwina owakhanyala okhukol'losia esia yakhola okhuba es'siamu.

¹⁴Mumatukhu kobwikuru, osangale, mumatukhu kobutinyu witsul'le mbu Nyasaye niye owakalomba yako kosi, kho omundu alekhe okhumanyilisia akakhekholekhe khuye olunyuma.

¹⁵Mumatukhu kanje akabutswa ndabeye okhulola amang'ana kosi. Abandu abalunji bafwitsanga kata olwa bali abalunji ne olwa bandi nabo bahindilanga oluhono kata olwa bali ababi.

¹⁶Kho orasilana mubulunjibwo nohomba mubuchesibwo tawe; esiakhachila weyire nisina?

¹⁷Nebutswa orasilana mububi nohomba mubusilu tawe; esiakhachila ofwe inyingayo nesili okhwola nisina?

¹⁸Olekhane nende yako kosi. Noba nohelesia Nyasaye oluyali olahindila mumang'anako.

¹⁹Obuchesi bukhol'langa omundu amenji okhuyomba akabaruchi likhumi banyala okhukhol'la litookho.

²⁰Abulaho omundu omulunji khusibala okholanga amalahi narakholakhwo amabi tawe.

²¹Orareka amarwi khumang'ana kosi akabandu baboolanga tawe; khase wakhahulila omurumikhiliwo nakhunyekanga,

²²ne nawe umanyile mumwoyokwo mbu hali akhenji wamenya nonyekanga abandu bandi.

²³Ndarumikhila obuchesi bwanje okhuchela yaka kosi. Ndali nesinani siokhuba omuchesi nebutswa bwali ehale n'nase.

²⁴Niwina onyala okhumanyilisia esifune siobulamu? Nesiebisu okhusila khandi nesitinyu esia khuranyala okhumanyilisia.

²⁵Nebutswa ndakhola esinani nirunanga okhuba nobumanyi nende obusomi; ndarakhwo omwoyo okhunyoola obuchesi nende amakalusio kamareebo kanje nende okhumanya obwobuhingwa buli obubi khandi obusilu.

²⁶Ndanyoola esindu esili esilulu okhuyomba okhufwa; mbu omukhasi oli singa omureko. Obuyanzi bwakhuhelesianga bukhutilanga singa eneti ne amakhonoke kakhufumbel'langa singa omunyol'lo. Omundu oyanzisianga Nyasaye alahona khukake; ne owetsimbi alatiilwa n'naye.

²⁷Omukambi aboolanga mbu, “Yee kano niko akanyooye sihati sihati olwa ndabeye nirunilisianga amakalusio.

²⁸Ndabeye okhuruna amakalusio kandi ne sindanyooye tawe. Ndanyooye omusaatsa mulala mubasaatsa elefu ndala owandakhanyala okhuha oluyali; ne sindanyoola omukhasi wosi tawe.

²⁹Lino nilio eliandanyoola mukosi: mbu Nyasaye yalomba abandu mbu babe abalunji, nebutswa bakhaaba ebikulukunzo ebinji.”