Read lunyore OMUKAMBI 8 Bible Online

OMUKAMBI 8 - lunyore bible

OMUKAMBI 8

¹Niwina oli nobuchesi obuhela? Niwina onyala okhwinoosia esifune siamang'ana? Obuchesi buchilanga omundu namwemwenda hamoni. Bukalukhanianga okhukhunia khwehamoni.

²Olonde amalako komuruchi sichila wali okhwesuha imbeli wa Nyasaye.

³Orule imbeliwe, kata orasisil'la olwamang'ana kali amabi tawe, sichila akholanga kosi aka yenyele.

⁴Khulwa mbu ling'ana liomuruchi neliobunyali, abulaho onyala okhumureeba mbu, “Okholanga sina?”

⁵Oluhono lwolonda amalakoke olaba mumulembe, ne omundu omuchesi wamanya niliina khandi ninjila sina yokhukhol'lamwo akene yako.

⁶Eliho inyinga indahi nende injila indahi yokhukhol'lamwo amang'ana kosi, nebutswa abandu bali namanyakhano amenji.

⁷Abulaho khu ifwe omanyile akanakekhole, ne sialiho onyala okhukhubool'la tawe.

⁸Abulaho onyala okhweyikal'la okhufwa nohomba okhwikal'la litukhu liokhufwa. Yilio nelihe eliakhurakhanyala okhuhonokokha mulio tawe; injila yindi sielikhwoho eyakhunyala okhwebisilakhwo tawe.

⁹Yaka kosi ndakalola, olwa ndali ninganil'langa khumang'ana akakholwanga musibala muno, omwa abandu abalala bali nobunyali khubasiabwe nibabakhupia esibi.

¹⁰Khandi ndalola ababi nibayabilwanga mubilindwa biabwe, ne khunjila olwabandu bali nibarulanga habilindwa biabwe babetsoomisia mwitookho omwa bakhol'langa obubi bwabwe. Yako nako khandi nakabutswa.

¹¹Esichilanga abandu nibakhola obubi neinjinia nisina? Sichila abakholi bobubi sibakhalachilwanga esiina bwangu tawe.

¹²Ne kata olwomukholi wetsimbi akholanga obubi hali emia ndala, ma atsilil'le okhumenya, ise manyile tooto mbu amalahi kalabetsangaho khuyabo abariitsanga Nyasaye, sichila bamuhelesianga oluyali.

¹³Nebutswa amalahi sikalabetsangaho khubabi tawe. Obulamu bwabwe buli singa esiniini ne balafwa nibasili ababuukha sichila sibahelesianga Nyasaye oluyali tawe.

¹⁴Nebutswa yaka nakoluhingwa. Lola akekholanga musibala: baliho abalunji abanyoolanga esinyasio esiababi bakwananga okhunyoola, khandi baliho ababi abanyoolanga omukabwa okwabalunji bakwananga okhunyoola. Mboolanga mbu yaka nako nakabutswa.

¹⁵Kho mal'le okhumanyilisia mbu khukwana okhwesangasia, sichila obulahi obwakhunyala okhunyoola mubulamu buno nokhulia nokhunywa nende okhwesangasia abene. Kano nakakhunyala okhukhola olwa khuba nikhufulukhananga khumilimo mumatukhu kobulamu obwa Nyasaye yakhuhelesia musibala muno.

¹⁶Lwosi olwa ndenyanga okhumanyilisia akobuchesi, nende akokhweka akatsilil'langa musibala muno ndamala ninyoola mbu onyala okhuhonga nohenganga obutukhu nom'basu sila okhukona tsindoolo,

¹⁷ne obule okhumanyilisia aka Nyasaye akholanga. Kata niwakhateema okhusila okhumanyilisia, sioli owakhamanyilisia tawe. Abandu abachesi banyala okhuboola mbu bamanya, nebutswa sibamanyile tawe.