Read lunyore OMUKAMBI 9 Bible Online

OMUKAMBI 9 - lunyore bible

OMUKAMBI 9

¹Kho yako kosi ndakabiikha mumwoyo kwanje ningakanil'la okhusila ma ninyoola mbu ebikholwa biabalunji nende abachesi biemel'lwanga na Nyasaye. Kata obuyanzi bwabwe nende oburima bwabwe buli mubunyalibwe. Sialiho omanyile kosi akali imbeli uwe tawe.

²Sikhulikhwoho nobwabukhani bwosi tawe. Amang'ana amatelwa ketselanga abalunji nende abasiamu, abalahi nende ababi, abasiyikhu nende abesifwabi, khu uyo ohaananga omusango nende khu uyo orahaananga omusango tawe. Singa obwa kali khumundu omulahi nimbwo kali khumukholi wetsimbi; khandi singa obwakali khu uyo owesuhanga nimbwo kali khu uyo oritsanga esiesuho.

³Amang'ana amatelwa ketselanga abandu bosi okhuhelana, ne yibu nobubi obukholekhanga musibala muno. Khandi mbu emioyo chiabandu chitsulangamwo obubi nende obulalu buli olwa basiliho mwoyo, ne bungoyingoyi nibafwa.

⁴Nebutswa omundu wosi omulamu musibala esiabandu abali mwoyo alikhwo nende obunaayi nalebe; sichila imbwa eli inamu eyomba esimba efwiye.

⁵Abali mwoyo bamanya mbu bakhafwe; nebutswa abafwa sibamanyanga ling'ana liosi tawe. Sibalikhwo nomukabwa khandi tawe; bamala okhwibil'lwa kupu.

⁶Obuyanzi bwabwe noburima bwabwe nende okhukhalikha omukongo, biosi biafwa n'nabo. Sibali abanyala okhweyingisia mwing'ana elikholekhanga musibala muno tawe.

⁷Tsilil'la okhulia ebiokhulia bibio nokhusangala, ne nonywa ewaini yiyo nomwoyo omusangalu. Nyasaye wamala okhuhuchil'la ebikholwabio.

⁸Obetsenje nobuyanzi nende obusangali amatukhu kosi.

⁹Omenyenje mubusangali halala nomukhasiwo owa oyanzanga amatukhu kosi akobulamubwo burali matsami obwa Nyasaye yakhuhelesia okhumenya musibala yisi. Osangal'le buli litukhu liosi elirali matsami, sichila yikwo nikwo omurungo kwanonyoole mumunyakhano yikwo.

¹⁰Siosi esionyala okhukhola, osikhole netsingufu tsiosi; okhuba sisiliho esikholwe, kata lipaalo liosi, kata obuchesi kata esiobulwenyukhu musibala sie Makombe tawe; ne yaho niho ahotsitsanga.

¹¹Khandi ndabeye okhulola esindu sindi musibala sino. Yabo abelukhanga bwangu sibali nibo abayombanga tawe; khandi abakufu sibali nibo abalekanga tawe. Abandu abalwenyukhu sibanyoolanga ebiokhulia khasotso tawe, abandu abachesi sibanyoolanga obuhinda khasotso tawe, khandi abandu abachesi sibang'ayile okhuhebwa emilimo chioluyali tawe. Ikhabi imbi ekwilanga abandu bosi.

¹²Kata omundu siamanyanga litukhulie tawe; singa tsisutse obwatsitiilwanga muneti, khandi singa amanyonyi obwa kahambwanga muluchiikha, nimbwo abandu batilwanga mwitukhu liibi, eliabarapaal'lenjekhwo tawe.

¹³Khandi ndalola esindu sindi musibala muno, esifwanani esilahi singa obwobuchesi bubukulwanga.

¹⁴Lialiho litaala litututu, elialimwo abandu batututu butswa. Omuruchi wetsingufu yali okhuliseera. Yali okhulifumbila ma niyerechekha okhufunaka amasisi kalio.

¹⁵Ne omundu yamenyanga mwitaala yimwo omutakha nebutswa omuchesi okhusila owahonia litaala yilio khulwobuchesibwe. Ne siyaliho owamukanakanakhwo tawe.

¹⁶Ndamenya nimboolanga mbu obuchesi buyomba tsingufu; nebutswa sialiho opaalanga mbu omutakha yakhaba omuchesi, nohomba obukulanga obweyanga mukomutakha aboolanga tawe.

¹⁷Nobulahi okhuhuyia amang'ana akaboolwa kalaha nomundu omuchesi okhuyomba akakambwa butinyu nomuruchi m'mukhung'ano kwabahingwa.

¹⁸Obuchesi buyomba ebilasan'nwe bielihe; ne omukholi wetsimbi mulala anyala okhwononia obulahi obwinji.