Read lunyore OLWEMBO OL'LAHI OKHUSILA 1 Bible Online

OLWEMBO OL'LAHI OKHUSILA 1 - lunyore bible

OLWEMBO OL'LAHI OKHUSILA 1

¹Luno nolwembo lwa Solomoni oluli ol'lahi okhusila.

²Unzunzuune nomunwa kukwo, sichila obuyanzibwo nobulahi okhuyomba ewaini.

³Amafurako kesuswa kali omwayo okuhunyanga bulahi; eliiralio liyanzisianga singa amafura kobukusi obukali, niko akachilanga abakhaana nibakhuyanza.

⁴Umbukule khutsie n'nawe ma khwilukhe khutsie ehale; Obe omuruchi wanje ma umbile musikoti sisio. Nakhwesangasie n'nawe halala, n'nikhunywa ewaini inyinji nende okhukor'ra mubuyanzi. Siahene abakhasi bosi bakhuyanzilanga khubwene.

⁵Inywe abakhasi ba Yerusalemu, ise ndi omumwamu t'ti, khandi owelikondo lilahi, ndi omumwamu singa amaheema kom'mutsu kwa Kedari, khandi owelikondo lilahi singa etsipasia tsiomunyumba yomuruchi Solomoni.

⁶Muranjaaya khulwelikondo lianje tawe, sichila eliuba nilio eliali okhu mwamia t'ti. Abasiani befwe bali okhuusinyikhila, ma nibambakia okhukhola emilimo mumukunda kwemisabibu. Sindalikhwo nobweyangu bwokhweng'oonia tawe.

⁷Mbool'la ibe omuyanzwa wanje, nohile esiayo siamakondiko okhwaya hena? Amakondiko nakahulukhile hena m'mubasu hakari? Busina khukhaabe mubiayo biabaayi bandi?

⁸Ibe omukhasi welikondo lilahi okhusila, noba noramanyile londa mumakulu kamakondi, ma waaye ebimeme bibio ahembi namaheema kabaayi.

⁹Ibe omuyanzwa wanje, oyanzisianga abasaatsa, singa esululi ikhasi eyanzisianga etsisululi tsisaatsa etsia makaari komuruchi we Misiri.

¹⁰Liswi lilio liyanzisianga okhusila khutsindamatsio, ne liayeleela khwikosi singa tsinyuma.

¹¹Nebutswa khulakhulombela eminyololo chietsahabu nende ebimili biefetsa.

¹²Olwomuruchi yali niyekhaaye khundebe yomuto, amafura kanje katuuma esiuya siesuswa.

¹³Omuyanzwa wanje ahunyanga singa manemane olwa yeyalisianga khusilifu sianje.

¹⁴Omuyanzwa wanje afwana singa amahwa komubulimo akaamanga esimuli mumukunda kwemisabibu kwa Enigedi.

¹⁵Mako obwoli nelikondo lilahi omuyanzwa wanje. Tsimonitsio netsielikondo singa etsielikhulwi.

¹⁶Mako obwoli nelikondo lilahi omuyanzwa wanje! Mako obwa unyanzisianga! Obunyasi obubisi bulaba esitanda siefwe;

¹⁷emisiita chilaba emikul'lo chieinyumba yefwe, ne emitarakwa nachio chilaba obwal'lo bweinyumba yefwe.