Read lunyore OLWEMBO OL'LAHI OKHUSILA 2 Bible Online

OLWEMBO OL'LAHI OKHUSILA 2 - lunyore bible

OLWEMBO OL'LAHI OKHUSILA 2

¹Ise ndi esimuli sia Sharoni, litanya liomwibanda liomubikulu.

²Singa litanya mubisisia nimbwo omuyanzwa wanje ali mubakhaana.

³Singa omusaala kwamapeela kubetsanga mumisaala chiom'mutsuru, nimbwo omuyanzwa wanje ali mubasiani babuukha. Ndayanza okhwikhala musiinikha siakwo. Ne litunda liakwo liabuula olwa nzatsamangakhwo.

⁴Yandeera munyumba yelisabo, ne nakinga ependela yiye ikulu emanyianga obuyanzibwe khu ise.

⁵Mundinyilisie khulwokhumbelesia emisabibu emiomu. Khandi muusakulusie khulwokhumbelesia amapeela. Okhwekomba khwobuyanzi khuukhol'le okhuba omutekhele.

⁶Omukhonokwe om'mosi kuli isi womurwe kwanje; ne omukhonokwe omusaatsa nakwo nikufumbel'la!

⁷Muusubisie inywe abakhaana ba Yerusalemu. Mundesuhile nebitsusu ebiangu nende tsimongo tsienywe mbu sinamukoyaniekhwo obuyanzi bwefwe tawe.

⁸Mbul'langa amayoosi komuyanzwa wanje. Yetsanga niyelukhilanga khubikulu ebirambi, yelukhanga okhukhalania ebikulu okhwitsa ahandi.

⁹Omuyanzwa wanje afwana esitsusu, khandi singa imongo imbuukha. Habwene yaho usinjiye ahembi nelisisi. Ahengel'langa Mwidilisa nakol'la musing'enge siomwidilisha.

¹⁰Omuyanzwa wanje al'lomanga n'nase. Kho yitsa, omuyanzwa wanje, omuyanzwa wanje, hamba khutsie n'nawe.

¹¹Erotso ihweye ne ifula siekwitsanga tawe.

¹²Amahwa kaamile obwamu mumikunda. Kano niko amatukhu kokhwemba tsinyembo. Olwembo lwamakhuulwi luhul'likhanga mumikunda.

¹³Amakhuyu kachiakile okhwenga, emisabibu chiamile esimuli chili nobwayo obulahi. Khulwe yako, yitsa omuyanzwa wanje, chenda khutsie halala n'nawe.

¹⁴Ibe ofwana likhuulwi eliebisanga, mutsimangaywa tsiolwanda, lekha ndole m'moni mumwo! Lekha mbul'le amayoosi kaako sichila amayoosi kaako namabuulu, ne m'moni muumwo nomwokhuyanzisia.

¹⁵Okhwetsumbile ebibwe, ebibwe ebitititi yibio nibisili okhwononia emikunda chiefwe chiemisabibu echikhol'le esimuli.

¹⁶Omuyanzwa wanje nowanje nase ndi ouwe. Yayanga esiayo sisie mumatanya.

¹⁷Okhwola olwo obusindu bwamukamba tsuli buhutsa, ne esiilima nisikora. Kalusia omuyanzwa wanje, singa esitsusu, noho singa epuri imbuukha khubikulu ebia Betseri.