Read lunyore OLWEMBO OL'LAHI OKHUSILA 3 Bible Online

OLWEMBO OL'LAHI OKHUSILA 3 - lunyore bible

OLWEMBO OL'LAHI OKHUSILA 3

¹Obutukhu bwosi ningon'ne khusitanda sianje, ndalooranga uyo owandayanza; Ndamukhaaba, nebutswa sindamunyoola tawe; Ndamulanga, nebutswa siyayingalusia tawe.[1]

²Ndatsia okhuchendachenda mwitookho, nimbir'ranga mumihanda chialio nende mutsinjila tsinyelele. Ndali okhuruna uyo owandayanza. Ndali okhumukhaaba, nebutswa sindamunyoola tawe.

³Abandu abalindanga litookho bandola. Ndali okhubareeba mbu, “Muuluutsikhwo omuyanzwa wanje?”

⁴Ne olwa ndabalekhakhwo hati ndali okhumunyoola. Ndamutiila ne sindamulekha atsie tawe, okhwola olwa ndamuleera munyumba ya mama wanje, musikoti esiandebul'lwa mwo.

⁵Muusubisie, inywe abakhaana ba Yerusalemu. Mundesuhila nebitsusu nende tsimongo mbu sinamukoyanie obuyanzi bwefwe tawe.

⁶Yisi nisina esiitsanga okhurula musitsiimi, singa esiilo yomwosi, nisihunya bulahi singa obwali nende manemane, khandi singa obwali obukusibwanga nende abakhala?

⁷Solomoni yetsanga nachingiywe khuluruba; abasikari abaseletse mu Isiraeli amakhumi kasasaba nibo abamulindanga.

⁸Bosi nabasitsa mukhulwana netsinganga, obulwani bwabahelesia tsingufu. Siamulala ali nolukanga lulwe, nalindanga okhwikal'la obuseeri bwabutukhu.

⁹Omuruchi Solomoni uchingiywe khuluruba olwalombwa khutsimbao tsindahi tsia Lebanoni.

¹⁰Etsisiilo tsialwo tsiahomwakhwo efetsa, ne ikulu walwo khulikhwo esitambaya esianabilwakhwo obuusi bwetsahabu; emito chiakhwo chianabilwakhwo ingubo isembe, abakhaana ba Yerusalemu bali okhuchinaba.

¹¹Abakhaana ba Sayuni betsanga okhulola omuruchi Solomoni. Webiikhile olusimbi olwa mama uwe yamusiaha n'nalwo khwitukhu lies'selelo sisie, khwitukhu eliali liokhusangala nende obuyanzi.