Read lunyore OLWEMBO OL'LAHI OKHUSILA 4 Bible Online

OLWEMBO OL'LAHI OKHUSILA 4 - lunyore bible

OLWEMBO OL'LAHI OKHUSILA 4

¹Mako obwoli owelikondo, lilahi omuyanzwa wanje! Tsimonitsio netsielikondo singa etsielikhulwi inyuma weinguboyo yokhufuunikha m'moni. Liswi liilio litsalanga singa esiayo sietsimbusi, etsikongomanga hasi wesikulu sia Gileadi.

²Ameno kaako namalafu singa esiayo siamakondi amalafu akabekelwe amaswa ma kasaabilwe. Libulakhwoho kata elala eliarula; kosi namahelanu khandi kahengana.

³Omunwa kuukwo kufwana oluusi lwakhanyu, ne kuyanzisianga olwol'lomanga. Tsindama tsitsio tsiakhanga inyuma wesitambaya siokhumurwe.

⁴Likosi lilio lifwana singa omunaara kwa Daudi, nelihelanu khandi lirel'le, nililikhwo omukoye kwebiuma elefu ndala nibielel'le ebifwana ebikhumba biabasikari.

⁵Tsimbeele tsiitsio tsibili tsifwana ebimeme biesitsusu ebiebulwa amakhwana ebiayanga mumatanya.

⁶Nanzie khusikulu siamanemane nende khusikulu siobwali, okhwola olwo obusindu bwamukamba tsuli nabuhutse ne esiilima nisikora.

⁷Mako obwoli welikondo lilahi, omuyanzwa wanje; mako obwoli omuhesikhu po!

⁸Omwana wanje, hamba khutsie n'nawe okhurula mubikulu bia Lebanoni. Khurule Lebanoni ibe n'nase. Yikha orule khubutenje bwesikulu sia Amana, okhurula khubutenje bwa seniri nende Herimoni, orule ahetsisimba nende tsingwe tsimenyanga.

⁹Okhuhenga khukhwo, ibe omuyanzwa wanje khandi omweha wanje, nende esiuma siawebikhile bikhwesele omwoyo kwanje khu ibe.

¹⁰Mako obwa obuyanzi bubwo buli obwokhusangasia, ibe omuyanzwa wanje khani omweha wanje. Mako obwobuyanzi bubwo bukaasile okhuyomba ewaini okhusila. Amafurako akokhwebakha kahunyanga obulahi, okhuyomba ebindu biomwayo omulahi.

¹¹Omuyanzwa wanje omunwa kuukwo, kulikhwo obuukhi, ol'limi lulwo namabeele nende obuukhi khu ise. Tsingubo tsitsio tsili nokhuhunya okhulahi singa amafura kesuswa okhurula Lebanoni.

¹²Omuyanzwa wanje khandi omweha wanje afwana omukunda omwebisu, omukunda okwasirwa nelisisi khandi okuli singa esitaho esiebisu,

¹³omwene yimwo ebiraakwa bineranga. Bikhulanga singa omukunda kwemisaala chiamakomanga, echiamanga amatunde amalahi okhusila. Sikutakhangakhwo mwo ebiraakwa biosi ebihunyanga bulahi tawe.

¹⁴Kata khandi sikutakhanga khwomwo tsindesi, nende tangausi nohomba omutalasini tawe. Emisaala chiosi echileranga ne manemane tsikhulangaho, halala nende amafura akahunyanga omwayo omulahi kosi.

¹⁵Ibe ofwana esitaho esisamanga omukunda, khandi singa emichela chiamaatsi akabiranga, nende oruchela oruhinianga amaatsi mubikulubia Lebanoni.

¹⁶Buukha, ibe omuyeka kwesinyolu. Nawe, omuyeka kwe nandete huutsa khumkunda kwanje; ma okhuhuya khwesuswa khwesuswa khwitsule mumiiya. Lekha omuyanzwa wanje yetse m'mukunda, ma alie amatunde amalahi okhusila.