Read lunyore OLWEMBO OL'LAHI OKHUSILA 5 Bible Online

OLWEMBO OL'LAHI OKHUSILA 5 - lunyore bible

OLWEMBO OL'LAHI OKHUSILA 5

¹Nzitsile mumukunda kwanje, omuyanzwa wanje khandi omweha wanje. Mbunjelesianga emanemane yanje nende obwali bwanje; Nditsanga obuukhi bwanje nende amana kanje; Nywetsanga ewaini yanje nende amabeele kanje. Mulie khandi munywe inywe abayanzwa banje, okhwola olwa muba nimukhol'lwe nobuyanzi.

²Ndali ningon'ne, nebutswa omwoyo kwanje nikuli meso. Ndali okhuboola mbu omuyanzwa wanje akhong'ondanga omuliango naboola mbu, “Nzikulila, omuyanzwa wanje Ibe likhuulwi lianje, khandi omuhesikhu. Omurwe kwanje kutsinzihile khulwe liime, ne liswi litsinzibile khulwe lifumbi.”

³Ndaali nindenabuuye tsingubo, busina nziebiikhe khandi? Ndali ninsaabile ebilenje bianje. Busina mbimwamie khandi?

⁴Omuyanzwa wanje yenjisia omukhono kuukwe mumuluhu kwomumuliango, ma ninzatsahala sichila yali nali ahembi.

⁵Ndasinjila okhwikul'la omuyanzwa wanje omuliango, ne emikhono chianje chietsulakhwo manemane, ebitere nabio nibitsulakhwo amaatsi ka manemane, akali nikalondolanga omuliango.

⁶Ndekul'la omuyanzwa wanje omuliango, nebutswa yali namal'le okhutsia. Mako obwa ndekomba okhuhul'la omwoyokwe! Ndamukhaaba, nebutswa sindamunyoola tawe; Ndamulanga nebutswa siyayingalusia tawe.

⁷Abalindi bali okhunyoola, olwa bali nibecheesianga okhuhenga litookho. Bali okhukhupa, ma nibaasaalisia. Abalindi bamasisi kelitookho bali okhurandula okhubukula ingubo yanje.

⁸Muusubisie inywe abakhaana ba Yerusalemu, mbu nimuba nimunyoola omuyanzwa wanje, mulamubool'la mbu obuyanzibwe buumal'le tsingufu.

⁹Omuyanzwa uwo ayombela sina abandi, iwe owelikondo lilahi mubakhasi bosi? Nisina esiokhuchenyia khuye esichila khuhuchil'le okhukhusubisia?

¹⁰Omuyanzwa wanje nowelikondo lilahi khandi nowetsingufu, nomulahi okhuyomba abasaatsa etsielefu likhumi.

¹¹Omurwe kukwe kufwana etsahabu inzele, liswi liilie liayeborolamwo tsinyaali, nelimwamu singa likhookho.

¹²Tsimoni tsitsie netsiokhuyanzisia singa amakhulwi, akali habitaho biamaatsi akesaabanga mumabeele, ma kasinjila hamuchela.

¹³Tsindama tsitsie tsiyanzisianga singa omukunda okwetsulamwo ebiraakwa nende obwali. Omunwa kukwe kufwana amatanya, akatsinzibubwe namaatsi kamanemane.

¹⁴Amakhonoke kalombwa bulahi, ne yebiikhanga tsingaka etsialombwa khumachina kobukusi. Omubilikwe kwarelela singa ameno keinzofu. Okwabiikhwamwo amachina ka safira.

¹⁵Amarangoke kafwana etsisiilo tsiamachina amarelele, etsiarenjekhwa khubihani bietsahabu. Ali nobunyali singa ebikulu bia Lebanoni, ebiemisaala chiemisiita chiarambihakhwo.

¹⁶Omunwa kukwe kwabuula singa obuukhi, buli esindu siosi khuye siaingosia. Nimbwo omuyanzwa wanje ali inywe abakhaana ba Yerusalemu.