Read lunyore OLWEMBO OL'LAHI OKHUSILA 7 Bible Online

OLWEMBO OL'LAHI OKHUSILA 7 - lunyore bible

OLWEMBO OL'LAHI OKHUSILA 7

¹Mako singa oli omukhaana wokhuchenyia! Mako obwebilenjebio bikasile mubilaaro! Amarangoko amefutiembe kafwana singa ebimili ebialombwa nomusitsa.

²Ikhofuyo efwana olusalilo, oluraleemangakhwomwo ewaini tawe. Esibukara sieingano siliho esiabotokhanwakhwo amatanya.

³Tsimbeele tsitsio tsibili tsifwana abaana babili besitsusu abebulwa amakhwana.

⁴Likosi lilio lifwana omunaara kwameno ketsinzofu. Tsimoni tsitsio tsifwana amatubango akali mwitookho lia Heshiboni,[3] ahembi nesilibwa sia Batsirabimu. Amoolu kaako kafwana omunaara kwa Lebanoni okwahenga Damasiko.

⁵Omurwe kukwo kwasinjila ikulu singa esikulu sia Karimeli. Liswi lilio eliabaswa ling'inang'inanga singa ingubo imwamu ti eng'inang'inu. Obukaasu bwalio bwakhanyal'le okhumukosia omuruchi.

⁶Mako obwoli welikondo lilahi po, mako obwoli owokhuyanzisia. Mako obwobuyanzibwo buli obuhesikhu.

⁷Ibe oyanzisianga singa omusaala kwamasindu. Ne tsimbeele tsitsio tsili singa esibunjikha siamatunde.

⁸Naniine omusaala kwamasindu, ma nanzakule amatunde kakwo. Tsimbeele tsitsio tsifwana esibukara sietsinzabibu. Ne omwayo kwemiiya chichio kuhunyanga singa amatunde,

⁹ne omunwa kukwo kufwana ewaini indelungu. Kho lekha ewaini esundukhe netsia khumuyanzwa wanje, nebir'ranga m'munwakwe nende khumenoke.

¹⁰Ise ndi owomuyanzwa wanje ne naye yandekombanga.

¹¹Yitsa, omuyanzwa wanje, chende khutsie mumikunda, ma khukone litukhu elala mumataala.

¹²Nakhuhuune mumikunda chiemisabibu, okhulola emisabibu nichichiakile okhukhula, nikaliebimuli biachio nibichiakile okhwama, ne amakokomango nikaba nikabiasisie esimuli. Ebwene y'yo nakhumanyie obuyanzi bwanje.

¹³Tsinduli tsihunya omwayo omulahi, ne amatunde akahunyanga bulahi kali ahembi khumiliango chiefwe. Omuyanzwa wanje, ndakhubikhila obusangali obukhulu nende obuhia.