Read lunyore ISAYA 10 Bible Online

ISAYA 10 - lunyore bible

ISAYA 10

¹Mulitsiboolelwa inywe abalombanga amalako kobusiamu okhusandia abandu banje.

²Nimbwo mwikal'langa abatakha okhunyoola obulunji bwabwe nende obukhalachi bwahabwene. Khandi nimbwo mubukulanga emiandu chiabalekhwa nende ababisandu.

³Mwakhakhole sina olwa Nyasaye yakhamuhe esinyasio? Mwakhakhole sina olwa yakhamuleer're om'booko okhurula mulihanga liehale? Mwakhelukhile khuwina owokhumukhonya? Kata mwakhabise hena emianduchienywe?

⁴Mwakher'rwe mwihe nohoomba okhukhululwa nimuhilwa singa ababohe. Ne kata mbwo lirima lio MWAMI sinalibe nilihweye tawe; omukhonokwe kusinyiil'lwe butswa khulwookhuhaana esinyasio.

⁵OMWAMI yaboola mbu, “Asiria we! Khurumikhilanga ibe Asiria singa indabusi yokhutiaba yabo abambeetsanga lirima.

⁶Ndali okhuruma ibe Asiria okhuseera lihanga liabanasibala, eliabandu bali okhumbelesia lirima. Ndali okhubaruma okhuyaaka nende okhwiba nokhusen'na abandu hasi singa amatohi kokhunjila.”

⁷Nebutswa omuruchi wa Asiria ali nende akomwene apaalanga okhukhola amabi. Ali nesinani siokhumulula amahanga amenji.

⁸Yekhonyanga naboola mbu, “Siamulala khubakhoongo bamahe banje nomuruchi!

⁹Ndaleka amatookho ka Kalino nende Karikemishi, amatookho ka Hamatsi nende Aripadi Ndaleka Samaria nende Damasiko.

¹⁰Ndali okhunyiila omukhono kwanje okhuhaana esinyasio khumahanga kosi akekayakayanga ebiniini, akali ebiniini ebinji okhuyomba ebia Yerusalemu nende Samaria.

¹¹Ndabeeye okhumulula Samaria nende ebiniini bialio, khandi ndamulula Yerusalemu halala nebufwanani ebiekayakayilwangaho.”

¹²Nebutswa OMWAMI aboolanga mbu, “Nyinga namale akakholanga khusikulu sia Sayuni nende mu Yerusalemu, ndakhahe omuruchi wa Asiria esinyasio khulwo khwekhonyakhwe khwosi nende esunga yiye yosi.”

¹³Omuruchi wa Asiria yekhonyanga naboola, “Ise khol'le akene yaka kosi sienyene. Ndi omukufu, omuchesi khandi omulwenyukhu. Ndahinisia tsinzakho tsiosi etsili hakari wamahanga, ma nibukula ebindu biosi ebia bali nibabikha mumabere. Singa ing'ombe echulukhi ndali okhusen'na hasi abandu bosi abamenyangayo.

¹⁴Amahanga kesibala kali singa esitsu siamanyonyi, ne ndali okhubunjelesia obuhinda bwabwe butoro butswa singa obunjelesianga amayayi. Kata siyalikhwoho owokhumpapasila olubaha khulwo khurisia tawe, kata owokhwasamia omunwa khulwo khukhupila liyoka tawe.”

¹⁵Nebutswa OMWAMI aboolanga mbu, “Mbula imbatso yakhelahila mbu eli nobunyali okhuyomba omundu ochirumikhilanga? Omusumeno nakwo kwakhaba nobunyali okhuyomba omundu okurumikhilanga mukhwara tsimbaho? Indabusi siechinganga omundu ikulu tawe; omundu niye ochinganga indabusi ikulu.”

¹⁶OMWAMI Wokhunyala Biosi narume olufu okhuhaana esinyasio khu yabo abalitsanga bulahi. Mumibili chiabwe nakhubemwo nomul'lo okwatukhanga inziayo.

¹⁷Nyasaye, owuuli obulafu bwa Isiraeli yakhabe singa omul'lo. Nyasaye omutsienukhu wa Isiraeli yakhabe singa olumemo olwakhasambe ebindu biosi mwitukhu elala. Lwakhasambe kata ebisisia nende amarakalu.

¹⁸Emitsuru emikhongo nende emikunda eminolu chiakhamumwe kupu, singa butswa obulwaye obulitsanga omundu nibumwira.

¹⁹Emisaala echiakhasikale chiakhabe emititi ma kata omwana omuti anyala okhuchibala.

²⁰Inyinga yitsanga olwa abandu ba Isiraeli abaliba nibahonokokhele bakhabule okhweleta khwihanga eliali ahembi okhubamulula. Siahene nababiikhe obusubili bwabwe mu MWAMI, Nyasaye omutsienukhu wa Isiraeli.

²¹Abandu batititi ba Isiraeli bakhakalukhe khu Nyasaye wobunyali.

²²Kata nikali mbu luno abandu ba Isiraeli nabenji okhusila singa omuyekhe okwekhunyanza, sibali abenji khubo abakhakalukhe tawe. Esihesi siarechekhwa okhulindil'la abandu, ne okhwola abandu basinyoole.

²³Yee, mulihanga liosi, OMWAMI mwene oburuchi Owokhunyala Biosi alaleera esihesi, singa yaboola yakhakhole.

²⁴OMWAMI Nyasaye Wokhunyala Biosi abool'langa abandube abamenyanga mu Sayuni mbu, “Muratechesibwa nende Abasiria tawe kata nikali bamusandianga singa Abaamisiri bamukhol'langa.

²⁵Munyinga ndututu yitsanga nambe nimal'le okhubaha esinyasio, khandi nimbamuluye.

²⁶Ise OMWAMI Wokhunyala Biosi, nambatiabe nende esiboko sianje singa ndali okhutiaba abandu ba Midiani ha Lwanda lwa Orebu. Nambelesie Asiria esinyasio singa ndali okhuhakhwo Emisiri.

²⁷Olwe inyiinga tsana eba niyool'le ndakhamukhole abalakhuule okhurula khubunyali bwa Asiria, ne likokolo liabwe siliakhabe obusiro khumabeka kenywe khandi tawe.”

²⁸Abasikari babasuku bamal'le okhufumila litookho lia Ayatsi! Babiriye Mikironi! Balekhele ebiindu biabwe Mikimashi!

²⁹Bambukhile omukoko ma betsa okhuba Geba obutukhu bwosi! Abandu abali mwitookho lia Rama batechesibubwe, ne abandu abali mwitookho lia Gibea eliomuruchi Saulo belukhile.

³⁰Khupe etsikhwisi inywe abandu abali Galimu! Hulilisie inywe abandu abali Laisa! Huchil'le inywe abandu ba Anatsotsi!

³¹Abandu ba Madimena nende Gebimu belukhanga mbu basoole obulamu bwabwe.

³²Leelo abasuku bali mwitaala lia Nobu, ne ebwene iyo basiomelanga khusukulu sia Sayuni, nasio nelitookho lia Yerusalemu.

³³OMWAMI Wokhunyala Biosi alabakoka hasi nibatubukha singa tsisaka etsiremelwe okhurula khumusaala. Abesunga nende aboluyali mubo nabaremachilwe hasi nibatutuhibwa.

³⁴OMWAMI nabaremachile hasi singa emisaala chili hakari womutsuru chiremakwanga neimbatso; kata khandi singa emisaala emikol'lokhu okhusila chia Lebanoni chikwitsanga!