Read lunyore ISAYA 11 Bible Online

ISAYA 11 - lunyore bible

ISAYA 11

¹Abaruchi abaamihanga okhurula mulwibulo lwa Daudi bali singa omusaala okwaremachilwa hasi; nebutswa singa butswa es'sina sisebukhangakhwo emisaala emiyia kho nimbwo omuruchi omuyia yakharule mubetsukhulu ba Daudi.

²Omwoyo wo MWAMI yakhamuhelesie obuchesi, nende obumanyilisi nende obusitsa bwokhwamiha abandu baabe. Yakhamanye obulalilo bwo MWAMI, khandi yakhamuhelesie oluyali,

³khandi yakhesiehele okhumuhulila. Siyakhakhalachile abandu singa obwa alolanga netsimoni tsie tawe nohomba khulwo okhuhulila akabandi tawe.

⁴Yakhakhalachile abatakha habwene, khandi yakhakhonye abatakha okhunyoola akabakhoyanga okhuhebwa. Khandi yakhalake mbu abandu banyoole esinyasio, ne abandu ababi bafwe.

⁵Yakhamihe abandu be nubwatooto nende mubusubilwa.

⁶Ebibwe biakhamenye halala namakondi mumulembe, ne etsingwe tsiakhakone halala nebimeme bietsimbusi. Ebimoosi nende abaana betsisimba biakhalile halala, ne abaana bati bakhabilinde biosi halala.

⁷Tsing'ombe tsiakhalie halala nende amaaka, ne ebimoosi bietsing'ombe nende abaana beliaka bilakona halala mumulembe. Etsisimba tsilaaya obunyasi singa tsing'ombe.

⁸Omwana omutoro sialasaalila kata naaba nasina ahembi neinzokha yesumu tawe.

⁹Khu Sayuni, esikulu sia Nyasaye esitsienukhu, sikhulibakhwo nesindu siokhusalisia kata esibi tawe. Esibala siakhetsule nobumanyi bwo MWAMI, singa butswa tsinyanza tsietsulamwo amaatsi.

¹⁰Litukhu liitsanga olwomuruchi omuyia okhurula munyumba ya Daudi yoburuchi yakhabe esimanyilo khumahanga. Amahanga kakhebunjikhe mwitookho lilie liobwami nende okhumuhelesia oluyali.

¹¹Olwelitukhu tsana liba niliol'le, Omwami yakharumikhile obunyali bubwe khandi ma yakhakalusie ingo abandu baabe abali nibasikala Asiria nende Emisiri, nomubibala bia Paturo, Etsiopia, Elamu, Babulonia, na Hamatsi nende ebibala bili khundulo we inyanza nomubikhalachinga.

¹²OMWAMI yakhachinguule ependela ikulu okhumanyia amahanga mbu abunjelesianga halala abandu ba Isiraeli nende Yuda abali nibasalaanibwa nabachelesia okhurula mutsimbeka tsine etsiokhusibala.

¹³Esibala sia Isiraeli sinasibe neimbalikha khusibala sia Yuda khandi tawe, ne Yuda nasio sinasibe nobusuku khu Isiraeli tawe.

¹⁴Biombi halala nabiseere Abafilisiti bali elubeka lwemasaba, khandi nibayaaka emiandu chia abandu abamenyanga ebukwe. Nabaleke abandu ba Edomu nende Moabu, ne abandu ba Amoni nabahuchil'le okhuba hasi hoburuchi bwabwe.

¹⁵OMWAMI alakhamia amaatsi mumukhono kweinyanza ya Misiri, ne alaleera omuyeka okusambanga okhukhamia omuchela kwa Efurate ne nirusikala oruchela orutiti rune na rutaru rwonyene kho omundu wosi abe onyala okhuchenda niyambukha.

¹⁶Nakhube nomuhanda omukali okhurula Asiria khulwa abandu abalala khubandu ba Isiraeli abahonokokhayo, singa butswa kali khubakuka babwe olwa barula Emisiri.