Read lunyore ISAYA 13 Bible Online

ISAYA 13 - lunyore bible

ISAYA 13

¹Kano namang'ana aka akaboolwa khu Babulonia, aka isaya omwana wa Amozi yabisul'lwa nende Nyasaye.

²Khubutenje bwesikulu esikhaya chinguula ependela yelihe! Lanjisia abasikari ma ochingule omukhonokwo ikulu singa esimanyilo khubo mbu baseere ebilibwa bielitookho liabaami.

³OMWAMI ulangile abasikari baabe abahule khandi abalulu okhulwana lihe litsienukhu nokhuhaana esinyasio khuyabo abayahambila lirima.

⁴Hulilisie liyoka elili khubikulu ebikali — omuhuumo kwomukanda kwabandu omukhongo, omuhuumo kwamahanga nende okwebibala okwebunjikhile halala. OMWAMI wamahe arechekhanga emikanda chiabasikaribe okhulwana lihe.

⁵Beetsanga okhurula mumahanga kehale akali khusihesi siesibala. OMWAMI yeetsanga okhusasia esibala siosi mwirima lilie.

⁶Khupe etsikhwisi! Litukhu lio MWAMI lili ahembi, litukhu lie uyo Owokhunyala Biosi aleeranga okhumumwa.

⁷Amakhono kabandu bosi kaleleela nikabulamwo tsingufu, ne olutswoni lwabulimundu lulahwa.

⁸Ne bosi balaba nokhutechela okhukali nende okhutsunwa okhukali, singa okhutsunwa khweinumwa yomukhasi oli ahembi okhwibula. Balahengana mutsirilil'la, ne balaba nes'simba murwe esikali.

⁹Litukhu lio MWAMI liitsanga, nalio nelitukhu liibi elielileko nende oburima obukali. Esibala silakwa esitsiimi, ne siomundu wosi owetsimbi alamululwa.

¹⁰Tsinyininyini tsiokhwikulu nende eyasulwe sibiakhakhekhwo obulafu tawe. Eliuba liakhamwame t'ti olwa lirulanga, ne omwesi nakwo sikwakhakhekhwo obulafukhwo tawe.

¹¹OMWAMI aboolanga mbu, “Nandeere om'booko khusibala khandi nambaane esinyasio khubandu abasiamu khulwe tsimbi tsiabwe. Ndakhatutuyie siomundu owelolanga khandi nambaane esinyasio khumundu wosi otsalikhanga khandi oli omululu.

¹²Yabo abakhahonokokhe bakhabe abatinyu okhunyoolekha okhuyomba etsahabu.

¹³Ndakhatechesie likulu, ne ndakhachile esibala nasio siakharenge mubukono bwasio khwitukhu yilio olwe Ise OMWAMI Wokhunyala Biosi ndimanyia lirima lianje.

¹⁴“Abacheni abamenyanga mu Babulonia bakhelukhe nibakalukha mubibala biabwe abene. Balasalaana singa esitsusu siilukhanga nisiebisa abahiitsi, khandi singa amakondi karali nomwayi.

¹⁵Siomundu owakhatiilwe yakhafumirwe niyeerwa.

¹⁶Abaana baabwe abatoro balatiabwa hasi nibafwa, kata tsinyumba tsiabwe tsilayaakwa, ne abakhasi baabwe balatiilwa netsingufu nibononibwa nabo nibareeyekhwo imoni.”

¹⁷OMWAMI aboolanga mbu, “Nzubanga Abamede okhuseera Babulonia. Sibalolanga efetsa okhuba esindu kata sibayanzisibwanga netsahabu tawe.

¹⁸Baleera abasiani ababuukha nobuyingo bwabwe nende tsisele. Sibalabeela abaana abatoro nohomba kata okhuba netsimbabasi khubaana bati tawe.

¹⁹Babulonia nesibala esilahi po okhuyomba ebiindi abandu basio basiekhoyela. Nebutswa Ise OMWAMI nafunake Babulonia singa obwa ndakhol'la Sosoma nende Komora!

²⁰Abulaho owakhamenyeyo khandi tawe. Abaharabu abachendani sibakhombokhe amaheema kabwe ebwene iyo khandi tawe, kata omwayi siyakhahileyo esiayo siamakondike tawe.

²¹Haliba habundu ahetsisolo tsiomusitsiimi tsiakhamenyenje khandi aha amakhuule kombokhanga yo ebitsu biako. Amahuto kalamenyayo ne ebitsusu nabio bilasin'na mumahindi kasio.

²²Tsifusi nende ebisuutso bilalakayila muminara nende mutsinyumba tsiabwe tsioburuchi. Inyinga yokhumumwa khwa Babulonia imal'le okhwola! Amatukhu ka Babulonia kali ahembi okhuhwa.”