Read lunyore ISAYA 14 Bible Online

ISAYA 14 - lunyore bible

ISAYA 14

¹OMWAMI yakhababeele tsimbabasi abandu baabe ba Isiraeli, ma alabahule okhuba abaabe omwene. Yakhabalekhe bamenye musibala siabwe abene, ne abacheni bakhetse okhumenyeyo n'nabo.

²Amahanga amenji kakhakhoonye abandu ba Isiraeli okhuhunzukha musibala esio MWAMI yali okhubahelelesia, ne amahanga tsana kakharumikhe singa abasuumba khu Isiraeli. Yabo abali nibahila Isiraeli mubuhambe, bakhabe abasumba ba Isiraeli, nabo abandu ba Isiraeli bakhamihe abandu abalinji okhubasandia.

³OMWAMI yakhahulusie abandu ba Isiraeli okhurula khubusalili nende mumanyakhano, khandi okhurula khumilimo emitinyu echia bali okhuhachibwa okhukhola.

⁴Olwa OMWAMI akhola yaka balatsekhel'la omuruchi wa Babulonia nibaboola mbu: “Omuruchi omululu okwiiye! Siyakhasandiekhwo omundu wosi khandi tawe!

⁵OMWAMI wakamisie obunyali bwabaruchi ababi nende tsingufu tsiabaami

⁶abali okhusandia abandu muburima nibaralekha okhukhupia esibi amahanga aka bali nibalekhele.

⁷Ne luno leelo esibala siosi sisangalanga abuhuluukhi nende omulembe, ne abandu bosi bembanga khulwo obusangali.

⁸Emitarakwa nende emisiita chia Lebanoni chisangalanga khulwokhukwa khwomuruchi, sichila abulaho owokhuchiremaka tsikwe hasi tawe, okhuba luno umal'le okhurulaho!

⁹“Esibala sie Makombe sierechekhelanga okhwinjisia omuruchi wa Babulonia. Ebiniini biabafwa balinji abakufu khusibala bichendachendanga. Ebiniini biabaruchi bafwa birulanga khutsiiruba tsiabwe.

¹⁰Biosi bibool'la omuruchi wa Babulonia mbu, ‘Luno oli omutofu singa obwa nefwe khuli! Oli mulala khu ifwe!

¹¹Wakhupilwanga obukhana khulwo khuhebwa oluyali, nebutswa luno oli musibala siemakombe. Okonanga khusitanda sietsinyende nende okhwefunikha tsinyende.’

¹²“Omuruchi wa Babulonia, eyasulwe yobulafu bwamutsuli wangulusibubwe okhurula mwikulu! Khale walekanga amahanga, ne luno wangulusibubwe hasi.

¹³Warakhwo omwoyo niwenya okhwanichila okhutsia mwikulu ma ore oluruba lulwo ikulu weinyininyini eyeikulu okhusila. Wapaalanga mbu wakhanyoola okhwikhala singa omuruchi khusikulu esikali esili esinyolu ahabanyasaye bebunjikhanga.

¹⁴Wali okhuboola mbu wakhanichiiye khubutenje bwamaluumbesi ma obe singa Nyasaye Wokhunyala Biosi.

¹⁵Nebutswa musilenje yisio, ibe wisibuubwe hasi hatsia olutungu okhusila bwesibala siabafu.

¹⁶“Abafu balarangala tsimoni khuibe nibakhuchenyela. Balareeba mbu, ‘Uyu niye omundu owarengia esibala khandi natechesia amahanga kosi?

¹⁷Uyu niye omundu owasasia amatookho kosi nakhola esibala okhukwa esitsiimi? Uyu niye omundu owabula okhulakhuula ababohe baabe kata okhubalekha batsie ingo?’

¹⁸Abaruchi bosi abesibala bakonanga mubilindwa biabwe ebilahi,

¹⁹nebutswa ibe obula esilindwa, ne omulambo kukwo kufuubilwe esioba mbu kubole. Omulambo tsana kwarebwa isi wemilambo chiabasikari abafwila mwihe, ma chiosi halala chiafuubwa mulwanga lwelichina nende okhusen'nwa hasi.

²⁰Khulwa mbu watibia lihanga lilio niwira abandu baabo bene, siwakhayabilwe singa abaruchi bandi tawe. Abulaho owakhahonokokhe okhurula mubandu beinyumba yiyo abasiamu.

²¹Lekha obwiri buchiake okhukholwa! Abaana basiani bomuruchi uyu balafwa khulwe tsimbi tsiabakuka baabwe. Abulaho kata mulala khubo owakhamihe esibala nohomba okhwombokha khusibala amatookho.”

²²OMWAMI Wokhunyala Biosi aboolanga mbu, “Naseere litookho lia Babulonia ma nandisasie. Sinandekhekhwo esindu siosi tawe — kata abaana, abulaho owakhahonokokhe. Ise OMWAMI mal'le okhuboola yaka.

²³Nakhole Babulonia okhukwa esitondohi ne amakhuule kalamenyayo. Nanzeye Babulonia nende esieyelo esia nasieye ebiindu biosi okhurulayo. Ise OMWAMI Wokhunyala Biosi mal'le okhuboola.”

²⁴OMWAMI Wokhunyala Biosi wesuuhile esiesuho mbu: “Akamal'le okhuloosia ketsa okhwekhola. Aka reeyekhwo omwoyo okhukakhola kalakholwa.

²⁵Namulule Abaasiria musibala sianje sia Isiraeli nibasenel'la hasi khusikulu sianje. Nakhole abandu banje okhuba abalakhuule okhurula khwikokolo lia Baasiria nende okhurula khubisiro ebia bachinganga.

²⁶Yibu nibwo obuloosie bwanje khusibala, ne omukhono kwanje kunyil'lwe khulwa okhuhaana esinyasio khumahanga.”

²⁷OMWAMI Wokhunyala Biosi ureeye omwoyo okhukhola yaka, unyiil'le omukhono kukwe khulwokhuhaana esinyasio, ne omundu wosi sianyala okhumwikal'la tawe.

²⁸Yaka namang'ana akali okhuhandikwa mumihika okwa omuruchi Ahasi yafwila mwo.

²⁹Abandu ba Filisiti, indabusi eyali okhumukhupa ifunikhile, nebutswa mubula esifune esichila musangaale. Olwe inzokha ndala efwitsanga, eyindi imbibibi okhusila yitsanga misilenje siayo. Liyayi lienzokha lialulanga esilikoma esipulukhanga.

³⁰OMWAMI alaba omwayi khubatakha abali mubandu baabe khandi alachila bamenye mumulembe. Nebutswa alaruma inzala ingali khu inywe Abafilisiti ne sielalekhakhwo kata mulala khuinywe okhuhona tawe.

³¹Khupe etsikhwisi nimulaama mbu mukhonywe, inywe mwesi amataala ka Filisiti! Mube neindanga ingali, inywe mwesi! Lilumbesi liolukuukhi litsanga okhurula esinyolu nalio nelibe nabasikari belihe abaralikhwomwo nabandu abari tawe.

³²Nakhubakalusie mbwena abarumwa abetsanga khu ifwe okhurula Filisiti? Nakhubabool'le mbu OMWAMI umal'le okhuralisia Sayuni khandi mbu abandu baabe abakhupibwanga esibi balanyoolayo abuhuluukhilo bwomulembe.