Read lunyore ISAYA 15 Bible Online

ISAYA 15 - lunyore bible

ISAYA 15

¹Kano namang'ana akaboolwa khu Moabu. Amatookho ka Ari nende Kiri kamumilwe mubutukhu bulala, ne okhusiling'ana khwitsuye musibala sia Moabu siosi.

²Abandu ba Diboni banichilanga esikulu okhutsia habundu hokhwekayakayila nibekhuul'laho. Abandu ba Moabu bekhuulanga amatookho ka Nebo nende Medeba. Babechele emirwe chiabwe nende tsindefu tsiabwe okhumanyia esibeela siabwe.

³Abandu abali khumihanda bebiikhile amatasi; abandu abali mwitookho habundu okhubukan'na nende abali khubisuli bietsinyumba bekhuulanga nende okhulakaya.

⁴Abandu ba Heshiboni nende Elealehi balakayanga, ne okhulakaya khwabwe khuhul'likhanga ehale bwene okhwola Yahasi. Kata abasikari batechelanga; besikokele emioyo.

⁵Omwoyo kwanje kulakayilanga Moabu! Abandu belukhiye mwitaala lia Soari nende elia Ekilatsi Shelishiya. Abandi banichilanga omuhanda kwokhutsia Luhitsi, bekhuulanga ne nibatsia, ne abandi belukhilanga Horonaimu, bekhuulanga butinyu.

⁶Esitaho sia Nimurimu sikhamile, ne obunyasi bwekhundulo khwasio bunial'le, ne sibulaho esindu siosi esibisi.

⁷Khulwe yako, abandu bakhalanianga Libanda lie Tsimbaya nibateema okhwilukha nende emiandu chiabwe chiosi.

⁸Siabuli habundu khutsinzakho tsia Moabu omwoyo kwokhulakaya kuhul'likhangayo. Kuhul'likhanga khumataala ka Ekilaimu nende Beerelimu.

⁹Omuchela kuli mwitaala lia Diboni kwitsuye mwo amatsahi, ne Nyasaye urechekheye abandu bomwitaala yilio esindu esibi okhuyombakhwo. Yee, nakhubeyo nende okhwirwa okhukali khwabandu bosi abasikala mu Moabu.