Read lunyore ISAYA 16 Bible Online

ISAYA 16 - lunyore bible

ISAYA 16

¹Okhurula mwitookho lia Sela elili musitsiimi, abandu ba Moabu baruma akhameme khelikondi singa esihanwa khu uyo owamihanga mu Yerusalemu.

²Balindil'la khuluchinga lwomuchela kwa Arinoni ne bachendananga butswa iyi neiyi sila esifune, singa amanyonyi akakhungilwe akhurula mubitsu biako.

³Babool'langa abandu ba Yuda mbu, “Mukhubool'le esia khukhola. Mukhusoole singa omusaala okuhaananga esinikha m'mubasu omululu, ma mulekhe khuhulukhile musiinikha sienywe. Khuli abatiimi; mukhubise ahomundu aranyala okhukhunyoola tawe.

⁴Mulekhe khumenye musibala sienywe. Mukhusoole khu yabo abenyanga okhukhumulula.” (Okhusandibwa nende okhumumwa nakhubuleho, khandi yabo abasandianga lihanga nabatibe.

⁵Ma mulala khubetsukhulu ba Daudi yakhabe omuruchi, ne yakhamihe abandu mubusubilwa nende mubuyanzi. Yakhanguhe okhukhola yako akali akahabwene, khandi yakhalole mbu obukhalachi bwahabwene bukhol'lwe.)

⁶Abandu ba Yuda baboolanga mbu, “Khuhuliiye obwabandu ba Moabu bali nesunga. Khwamanya mbu bo nabeinjinia khandi abokhwekhulumamia, nebutswa okhwepaaka khwabwe nokhwabutswa.”

⁷Abandu ba Moabu bakhalakaye khulwa amanyakhano aka banyoolanga. Bosi bakhalakaye olwa baletsul'la ebiokhulia ebilahi ebia balinji okhulia mwitookho lia Kiri Heresi. Bakhabe mukhung'ang'ala okhukali.

⁸Emikunda echili ahembi Heshiboni nende emikunda chiemisabibu echia Sibima chimuluuywe — emikunda chiemisabibu echiabaruchi bamahanga banywetsanga ewaini yachio ma bakholwa. Amatukhu kandi emisabibu tsialanda kata okhwola mwitookho lia Yaseri, nende musitsiimi esili ebukwe, khandi tsialanda okhutsia okhwola khuluchelekha lweinyanza yechumbi elubeka wemasaba.

⁹Luno ndekhuulanga khulwe emisabibu chia Sibima singa obwa ndekhuulanga khulwa Yaseri. Amasika kanje karonyanga khulwa Heshiboni nende Eleale, sichila ebichese biokhusangasia abandu sibiliho tawe.

¹⁰Omundu wosi siasangaayekhwo mumikunda chieliloba linolu tawe. Abulaho okhupanga liyoka kata okhwembela mumikunda chiewaini. Abulaho osen'nanga emisabibu mulutse khulwokhulomba ewaini; liyoka liobusangali lihweye.

¹¹Khulwe yako mbindanga khulwesibeela khulwa Moabu khandi mbindanga khulwa Kiri Heresi.

¹²Abandu ba Moabu bemalanga tsingufu abene olwa batsitsanga khubwekayakayi khubikulu nende mutsihekalu tsiabwe okhusaaya, nebutswa sinakabakhol'le obulahi bwosi tawe.

¹³Yako niko amang'ana ako MWAMI yaboola khu Moabu mumatukhu akabira.

¹⁴Ne luno OMWAMI aboolanga mbu, “Mumihika chitaru chionyene echistanga, obuhinda bwa Moabu obukhongo nabube nibuhweye. Ne khubandu ba Moabu abali abenji, batititi bonyene nibo abanabahonokokhe ne sinababe netsingufu tawe.”