Read lunyore ISAYA 17 Bible Online

ISAYA 17 - lunyore bible

ISAYA 17

¹OMWAMI yali okhuboola mbu, “Damasiko sinalibe litookho khandi tawe. Nalibe butswa amasisi akalikul'lwa.

²Amatookho ka Siria nakabe likunda khulwe, inziayo. Kalaba obwayilo bwamakondi nende tsing'ombe, ne abulaho owakhabihinia mubwayilo yibwo.

³Lihanga lia Isiraeli lilaba sila oluhinga olwalibotokhana ne Damasiko nalio lilakosia oburuchi bwalio. Abasiria abali okhuhonokokha, bakhabe nes'simbamurwe singa abandu ba Isiraeli. Ise OMWAMI Wokhunyala Biosi mal'le okhuboola.”

⁴OMWAMI yali okhuboola mbu, “Litukhu liitsanga olwobukhongo bwa Isiraeli bwakhoole khusiakamo, ne obutakha bwakhabeho musilenje siobuhinda.

⁵Isiraeli yakhabe singa omukunda okwebirwe biamabele kakwo bikhalachilwe nibicheswa. Kwakhabe singa omukunda okwachanywa mwibanda lia Refaimu olwa kufun'nwemwo ebiamo.

⁶Abandu bati butswa bonyene nibo abakhahonokokhe, ne Isiraeli lilaba singa omusaala kwomuseituni okunokelwekhwo emiseituni chiosi nichirali chibili nohomba chitaru chionyene echilekhelwe khubutenje, nohomba mitititi echilekhelwe khutsisaka tsie hasi. Ise OMWAMI Nyasaye wa Isiraeli, mal'le okhuboola.”

⁷Olwe litukhu tsana liakhoole, abandu bakharune obukhonyi okhurula khu Mulonji wabwe, oli Nyasaye omutsienukhu wa Isiraeli.

⁸Ne sibalatsilil'la okhweleta khu tsiisambwa etsiabalomba namakhono kabwe abene tawe, nohomba kata okhusuubila mumilimo chiamakhono kabwe abene echili ebifwanani biomunyasaye mukhasi olangwanga Ashera nende tsiisambwa etsia balomba khulwo okhusambila obwali tawe.

⁹Olwe litukhu tsana liakhoole, amatookho akasirwa butinyu netsiminga kakhalekhwe likunda nikasasikha singa amatookho aka Bahiwi nende Abaamori kali okhulekha olwabandu bako belukha okhurula khubandu ba Isiraeli.

¹⁰Inywe Abaisiraeli mumal'le okhwibil'la Nyasaye omusoolanga khandi omusinganga singa lichina likhongo. Musilenje yisio, muraakanga emikunda chiabanyasaye bandi kho mbu mwekayakaye nyasaye omucheni.

¹¹Nebutswa kata nikali chiali okhusebukha nichinera omukamba kwene okwa wali okhuchirakilamwo, lichesa sinalibeho khuchio tawe. Om'booko nende okhutsuunwa okhubula indesi bionyene nibio ebia nabibeho.

¹²Amahanga kobunyali kali mwisukumana nikayoka singa okhuhuma khweinyanza, khandi singa okhuhuma khwe ebikubuli biamaatsi ebikali.

¹³Kata nikali amahanga kesundanga imbeli singa ebikubuli biokhunyanza, Nyasaye akakondokhelanga ma kelukha okhutsia ehale singa olukuukhi oluli hasikulu, khandi singa omukhuutsi okuhilwanga nesihutsutsu.

¹⁴Munyinga yokhubwile kaleeranga okhutechela okhukali, nebutswa olwomukamba kwolanga sikaliho tawe. Kuno nikwo omukabwa okwe yabo bosi abayaakanga esibala siefwe banyoolanga.