Read lunyore ISAYA 19 Bible Online

ISAYA 19 - lunyore bible

ISAYA 19

¹Kano namang'ana akaboolwa khu Misiri. OMWAMI yetsanga Emisiri nanin'ne khwilumbesi elilukhanga bwangu. Ebiniini bie Misiri bitechela imbeliwe, ne abandu be Misiri bafwa emioyo chiabwe.

²OMWAMI aboolanga mbu, “Nanzuube Abaamisiri okhulwana lihe abene khubene mbu amwabo nalwane amwabo, ne omurende nalwane omurende owasie. Amatookho nakalwane akene khukene ne omuruchi naye nalwane omuruchi wasie.

³Ise nzia okhwononia obuloosie obwa aba Misiri mbalombele khandi okhwononia olutswoni lwabwe. Nabo nabareebe ebiniini bia abanyasaye babwe nende abafumu okhubakhoonya. Khandi balatsia khubebitsohela nende khumisambwa.

⁴Nambane Abaamisiri mumukhono kwo Mwami omululu, khandi mumukhono kwomuruchi orali netsimbabasi. Ise OMWAMI Wokhunyala Biosi mal'le okhuboola.”

⁵Amaatsi komuchela kwa Naili kalatitiha, ne omuchela kulakhama kalaha kalaha.

⁶Emiferechi echihinianga amaatsi mumuchela chilahunya olwa chiba nichikhamanga sikalaha. Amatundu nende liswa bilaniala,

⁷khandi ebiraakwa biosi ebiarakwa khundulo khwa Naili bilooma nibipulusibwa nomuyeka.

⁸Abalubi bakhabinde nibekhuula, ne tsingaka tsiabwe nende amakoko kabwe kokhuluba bilabula omulimo.

⁹Yabo abanabanga tsingubo tsiekatani balafwa emioyo.

¹⁰Abalukhi bobuusi nende abakholi bokhurungwa balafwa amakani nibesikoka.

¹¹Abemeli belitookho lia Soani nabahingwa! Abachesi be Misiri bahaananga amebaalo kobusilu! Kho busina babool'le omuruchi mbu balondanga akabachesi nende abaruchi bakhale?

¹²Ibe omuruchi we Misiri, abebaali baabo abalwenyukhu bali hena? Haundi banyala okhukhubool'la obuloosie obwo MWAMI Wokhunyala Biosi apaalanga okhukhol'la Emisiri.

¹³Abemeli ba Soani nende Memufisi nabahingwa. Benyekhanga okhwemel'la lihanga nebutswa balikosia injila.

¹⁴OMWAMI wabakhola okhuhaana obwibaali bwokhukoyania. Khulwako, abandu be Misiri bakholanga amang'ana kosi busiamu ne betuyatuyanga singa omunywi wamalwa okwitsanga mumasale kaake omwene.

¹⁵Abulakhwoho kata mulala khu Bamisiri, omuhinda nohomba omutakha, owamanyikha nohomba oramanyikha, onyala okhuhaana obukhonyi.

¹⁶Inyinga yitsanga olwa abandu be Misiri bakhabe noburi singa abandu bakhasi. Balatechela muburi obukali olwa balola mbu OMWAMI Wokhunyala Biosi unyiil'le omukhonokwe okhubahelesia esinyasio.

¹⁷Yuda yakhabe esirisio esikali khubandube Misiri buli lwosi olwa betsusibwa esibi esio OMWAMI Wokhunyala Biosi arechekhanga okhubakhol'la.

¹⁸Olwe inyinga tsana yakhoole, ol'limi lwe Siheburania lwakharumikhilwe mumatookho ke Misiri karano. Abandu bebwene yiyo bakhesuhe nibarumikhilanga eliira lio MWAMI Wokhunyala Biosi. Elala khumatookho yako liakhalangwe mbu, “Litookho lie Liba.”

¹⁹Olwe inyinga tsana yakhoole khwakhabeho nende olusambwa olwombokhelwa OMWAMI musibala sie Misiri ne esiilo yelichina yakhombokhwe khulwakho lwe Misiri khulwo khuhaana oluyali khuye.

²⁰Olusambwa nende esiilo yelichina biakhabe obukobokheli mbu OMWAMI Wokhunyala Biosi ali musibala sie Misiri. Olwabandu baho bakhalanga khu MWAMI olwa basandibwanga, ye yakhabarumile owokhubasoola. Khandi yakhabasoole nabanunula.

²¹OMWAMI yakhemanyie omwene khubandube Misiri; ma aba Misiri bakhamanye OMWAMI mwitukhu yilio nibamwekayakaya nibamuhaan'na ebihanwa nende emisango. Bakhetsuube ebiesuuho khu MWAMI nibabihesia.

²²OMWAMI yakhahaane esinyasio khu Bamisiri nebutswa khandi yakhabahonie. Bakhamukalukhile, naye yakhahul'le amasaayo kabwe nokhubahonia.

²³Olwe inyinga tsana yakhoole, khwakhabeho nende omuhanda okhurula Emisiri okhwola Asiria. Abaamisiri bakhakonyenge Abaasiria ne Abaasiria bakonya Abaamisiri, khandi Abaamisiri nende Abaasiria bakhekayakaye halala.

²⁴Olwe inyinga tsana yakhoole, Isiraeli liakhabe lihanga liakhataru khu Misiri nende Asiria, nako kataru kakhabe ikhabi khusibala siosi.

²⁵OMWAMI Wokhunyala Biosi yakhabalaamile tsikhabi naboola mbu, “Mulaamilanga ikhabi inywe abandu banje be Misiri; nende inywe aba Asiria aba ndali okhulonga; kata nende inywe Isiraeli, abandu banje abelwa.”