Read lunyore ISAYA 2 Bible Online

ISAYA 2 - lunyore bible

ISAYA 2

¹Kano niko mang'ana aka Nyasaye yabool'la Isaya omwana wa Amosi akali khu Yuda nende Yerusalemu:

²Mumatukhu akeetsanga, khusikulu aha ehekalu yombokhwa, hakhabe ikulu okhusila okhuyomba habundu handi hosi, hakhabe ikulu khubikulu bindi biosi. Amahanga amenji kakhetse khusio,

³ne abandu bako balaboola, “Chende khwanikile khusikulu sio MWAMI[2], khu Hekalu ya Nyasaye wa Isiraeli. Nakhwibaal'le aka yenyanga khukhole; nakhuchende mutsinjila etsia yahula. Okhuba obwibaali bwo Mwami burulanga Yerusalemu; al'lomanga nabandu baabe nali Sayuni.”

⁴Yakhaleere omulembe hakari wamahanga. Balatuya tsinganga tsiabwe nibatsikhola amachembe, ne amafumo kabwe balakatuya okhukakhola tsinjeso. Amahanga sikalatsia mwihe khandi tawe, kata okhwerechekhela obulwani khandi tawe.

⁵Luno, abetsukhulu ba Yakobo, lekhe khuchende mubulafu obwa Nyasaye akhuhelesianga!

⁶E Nyasaye, ibe wakhupa abandu baabo omukongo abali abetsukhulu ba Yakobo! Esibala siayitsulamwo abakholi bobufumu okhurula ebukwe nende okhurula Filisiti. Abandu balondanga emiima chiebucheni.

⁷Esibala siabwe siatsula mwo efetsa nende etsahabu, ne amabiikhilo kabwe sikahwetsanga tawe. Esibala siabwe siatsulamwo etsisululi ne amakaari kabwe kobulwani sikahwetsanga tawe.

⁸Esibala siabwe siayitsulamwo ebiniini ne bekayakayanga ebindu bia balomba namakhono kabwe abene.

⁹Siomundu alatutuyibwa nende okhusimbibwa omurwe. OMWAMI, orababeela tawe!

¹⁰Baleebisa mutsinyanda tsiomumachina komubikulu nohomba okhuyaba obuko hasi nibatemanga okhwilukha okhurula khwirima lio MWAMI nende okhwebisa khubunyalibwe nende khubukhongo bwe!

¹¹Litukhu liitsanga olwe esunga yabandu yakhahwe ne injinia yabandu ya khamalwe. Ne OMWAMI yenyene yakhachinguulwe.

¹²Khwitukhu yilio OMWAMI Wokhunyala Biosi yakhatutuyie abandu bosi abali abobunyali, abeloli nende abokhwekhonya.

¹³Yakharemake emisiita[3] chia Lebanoni emirambi nende emiruba chiosi chia Bashani.

¹⁴Yakhahelanie ebikulu ebiraambi nende ebimbichiti,

¹⁵eminaara chiosi emirambi, nende amasisi kosi aka buli luhinga.

¹⁶Yakhenikhe munyanza etsimeeli tsingali okhusila, khandi etsialombwa bulahi okhusila.

¹⁷Esunga yabandu yakhahwe, ne injinia yabwe yakhatitihibwe. OMWAMI yenyene yakhachinguulwe litukhu yilio.

¹⁸Ebiniini biakhahwe pepepe.

¹⁹Abandu bakhebise mutsinyanda tsiamachina komubikulu nohomba okhuyaba obuko hasi, nibatemanga okhwilukha okhurula khwirima lio MWAMI nende okhwebisa khubunyalibwe nobukhongobwe, olwa yeetsanga okhutechesia esibala.

²⁰Olwe litukhu yilio liakhoole, bakhafuube ebiniini biabwe ebiabalomba khutsahabu nende khufetsa, nibabilekhela tsifukho nende amanyinya.

²¹Olwo MWAMI yakhetse okhutechesia esibala, abandu bakhebise mubuko, nende mutsinyanda tsiomumachina komubikulu nibatemanga okhwilukha okhurula khwirimalie nende okhwebisa okhurula khubunyalibwe nobukhongobwe.

²²Orabiikha obusubili bubwo mubandu bafwitsanga tawe. Bali nabukhala sina?