Read lunyore ISAYA 20 Bible Online

ISAYA 20 - lunyore bible

ISAYA 20

¹Khulwe lilako eliahanwa nende Saragoni omuruchi wa Asiria, omukhongo wa mahe ka Asiria yaseera litookho lia Filisiti elilangwanga Ashitoti ma nalifumila.

²Emihika chitaru yaka nikasili okwekholekha, OMWAMI yali niyabool'la Isaya omwana wa Amosi okhuhiinia ebilaaro bibie mubilenje nende okhunabula tsingubo tsiamatasi etsia yali nachendelanga. Yakhola mbwo ma nachenda esihechenye khandi nali ebilenje ebiele.

³Olwa Ashitoti liafumilwa, OMWAMI yaboola mbu, “Omurumikhili wanje Isaya yachen'denje esihechenye khandi nebilenje ebiele khulwemihika chitaru. Yisi nesilolelo khu yako akanaketse okhwekholekha khu Misiri nende Etsiopia.

⁴Omuruchi wa Asiria yakhahile ababohe nibali ebihechenye aba yafumila okhurula mumahanga kabili yako. Ababuukha nabakhulundu, bakhachende ebilenje ebiele nibali ebihechenye, ne amatakho kabwe nikalolekha khusioba, ne yako kakhaleer're Emisiri es'simba murwe.

⁵Ma nilwo olwa yabo abasubilanga mu Etsiopia khandi nibepaaka khulwe Emisiri balafwa emioyo nibasimbibwa emirwe.

⁶Olwe inyinga iyo yakhoole, abandu abamenyanga khuluchinga lwa Filisiti bakhaboole mbu, ‘Lole aka mal'le okhwekhola khubandu aba khweletangakhwo khandi aba khwelukhilangakhwo mbu bakhusoole okhurula khumuruchi wa Asiria! Nefwe khwakhahonokokhe mbwena?’ ”