Read lunyore ISAYA 21 Bible Online

ISAYA 21 - lunyore bible

ISAYA 21

¹Kano namang'ana akaboolwa khu Babulonia. Singa esihutsutsu sihutsanga okhurula musitsiimi nimbwo esibi siakheetse okhurula musibala siokhurisia.

²Ndali khumanyibwa libisulo amang'ana amabi, libisulo liobusiemani nende obumululwi. Inywe abasikari ba Elamu, seere! Inywe abasikari ba Media, fumbile amatookho! Nyasaye yetsa okhumala omunyakhano okwaleerwa nende Babulonia.

³Aka ndali okhulola nende okhuhul'la mwibisulo kali okhumbelesia oburi obukali nende okhutsuunwa, okhutsuunwa singa okhweinumwa yomukhasi owenya okhwibula.

⁴Omurwe kwanje kubotokhananga, ne ndechelanga noburi. Ndekombelenge omukolooba kwole, nebutswa kundereye oburi obukali bwonyene.

⁵Mwibisulo yilio nduutsi ebiokhulia nibili khumesa. Emikeka nachio nichialiywe abacheni okhwikhalakhwo. Baliitsanga nibanywa. Nonoho omulango kwalangilisia mbu, “Inywe abasikari, rechekhe etsikuri tsienywe!”

⁶Ma OMWAMI niyambool'la mbu, “Tsia oreho omulindi omubool'le aboole akalolanga.

⁷Naaba nalola abandu nibeetsanga nibanin'ne khutsisululi babili sibabili, khandi abandu nibachendelanga khutsipunda nende khutsingamia, akwana okhutsihengelesie bulahi.”

⁸Ma omulindi nalangisia naboola mbu, “Omwami, ise Ndasinjiyenje nininda habundu handarehwe obutukhu nom'basu.”

⁹Henga mbaabo bool'le! Abasaatsa abanin'ne khutsisululi babili sibabili. Omulindi akhupa omunwa naboola mbu, “Babulonia likwiye! Ebiniini biosi ebia bekayakayanga bilumbilwe hasi.”

¹⁰Inywe abandu banje ba Isiraeli, mwahuulwa singa ingano, nebutswa luno mal'le okhumubool'la amang'ana amalahi aka mbuliiye okhurula khu MWAMI Wokhunyala Biosi, Nyasaye wa Isiraeli.

¹¹Kano namang'ana akaboolwa khu Edomu. Omundu nalabe yanaanganga okhurula Edomu, “Omulindi, obutukhu nabuhwe lina? Mbool'la nibwangu sina olwa nabuhwe.”

¹²Omulindi nakalusia mbu, “Omukamba kwitsanga, kata khandi obutukhu nabwo bwitsanga. Niwakhenya okhureeba khandi okalukhe ma oreebe.”

¹³Kano namang'ana akaboolwa khu Arabia. Inywe abandu ba Dedani, abemikanda chienywe chiakhupa ekambi chikonanga musitsiimi sia Arabia,

¹⁴haane amaatsi khubandu abali nobuluho abetsanga khu inywe. Inywe abandu besibala sia Tema, haane ebiokhulia khubatiimi abelukhila musibala sienywe.

¹⁵Abandu belukhanga okhwesoola okhurula khutsinganga etsierechekhele okhubeera, khandi okhurula khubuyingo obwerechekhele okhubalasa, nende okhurula khubiran'no biosi ebielihe.

¹⁶Ma OMWAMI niyambool'la mbu, “Mumuhika mulala kwonyene, obukhongo bwetsinzibulo tsia Kedari bwakhabe nibuhweye.

¹⁷Abandu bokhulasa obuyingo nabandu abalulu okhusila musibala sia Kedari nebutswa batititi khubo nibo abanabasikale. Ise OMWAMI Nyasaye wa Isiraeli mal'le okhuboola.”