Read lunyore ISAYA 22 Bible Online

ISAYA 22 - lunyore bible

ISAYA 22

¹Amang'ana akaboolwa khu Libanda lie Libisulo. Nisina esiekholekhanga? Busina abandu belitookho bosi besangasianga nibanin'ne khubisuli bietsinyumba?

²Litookho liosi lili mukhukhupa liyoka likali elitsuuye mwo ingoyani nende okhuchenya. Abasaatsa benywe abafwila mwihe yili sibafwa nibalwananga tawe.

³Abemeli benywe bosi bali okhwilukha ne bafumilwa nibasili okhulasakhwo olusele okhufumilwa kata l'lala.

⁴Khulwe yako ndali okhuboola mbu, “Orule khu ise, olekhe ndekhuule bululu. Oranyakhana okhumbotselesia khulwo okhumululwa khwabandu banje tawe.”

⁵Yino neinyinga yesihenda mwoyo, nokhulekwa nende ingoyani Mwibanda lie Libisulo, naye OMWAMI Nyasaye Wokhunyala Biosi ukaleer're khu ifwe. Amasisi kelitookho liefwe kalikuliluywe, ma obulakayi bwokhwenya obukhonyi buhul'likhanga mubikulu.

⁶Abasikari okhurula musibala sia Elamu bali okhwitsa nibanin'ne khutsisululi, nibachingile obuyingo nende tsisele. Abasikari okhurula musibala sia Kiri bali niberechekhele netsikuri tsiabwe.

⁷Amabanda amanolu ka Yuda kali okhwitsulamwo amakaari kobulwani. Abasikari bokhutsisululi bali okhusinjila imbeli webilibwa bia Yerusalemu.

⁸Ebiesingo biosi ebia Yuda yeesolanga n'nabio biahinibwaho. Olwa akene yako kekholekha, mwatsia okhwenda ebilasan'nwe okhurula munyumba eya bibikhwangamwo.

⁹Mwali okhulola mu Yerusalemu amasisi akasirwa kali nikakwa mubukono obwinji. Mwamala nimubunjelesia amaatsi kemwitubanga liemwalo.

¹⁰Mwali okhuhenjelesia tsinyumba tsiosi etsili mu Yerusalemu ma nimusambula tsindala kho munyoole amachina kokhwombokhela amasisi kelitookho obuhia.

¹¹Mwali okhwombokha litanki liamaatsi hakari wamasisi kabili eliokhubikhamwo amaatsi kelitubango likhulu. Nebutswa simwali okhureeba uyo owali okhuliombokha tawe, kata simwaha Nyasaye oluyali khulwo bulosiebwe okhuliombokha khale tawe.

¹²OMWAMI Nyasaye Wokhunyala Biosi yali khumulaanga inywe munyinga yiyo mbu mulakaye nimwekhuula, mubeke emirwe chienywe ma mwebiikhe tsingubo tsiamatasi.

¹³Musilenje yisio, mwali mukhutsekha nende okhwesangasia. Mwasinza amakondi nende tsing'ombe nimulia inyama yatsio khandi nimunywa ewaini. Mwali okhuboola mbu, “Khulie khunywe okhuba mukamba nakhufwe.”

¹⁴OMWAMI Nyasaye Wokhunyala Biosi omwene yali okhul'loma n'nase naboola mbu, “Abakhola obubi yibu sibalalekhelwakhwo tawe oluhono olwa basili mwoyo. Ise OMWAMI Nyasaye Wokhunyala Biosi mal'le okhuboola.”

¹⁵OMWAMI Nyasaye Wokhunyala Biosi yali okhumbool'la mbu nzie khu Sebina, omulindi weinyumba yoburuchi ma mubool'le mbu,

¹⁶“Opaalanga niwe wina? Oli nabunyali sina okhuyaba esiliindwa sisio mulwanda oluli khusikulu?

¹⁷Onyala okhuba omukhongo, nebutswa OMWAMI nakhubukule ma nakhufuube ehale bwene.

¹⁸OMWAMI nakhutole butswa singa omupiila ma nakhufuube musibala esibambukhu. Wakhafwile ebwene iyo ahembi namakaari kelihe aka welol'langakhwo. Oli es'simba murwe khube inyumba yomwamiuwo.

¹⁹OMWAMI nakhuhiinie habundu hokhol'langa emilimo nakhwisie hasi okhurula khubukhongo bubwo.”

²⁰OMWAMI yali okhubool'la Sebina mbu, “Olwa akene yako kaliekhola, ndakharumanie mbu omurumikhili wanje Eliakimu omwana wa Hilikia yeetse.

²¹Ndakhamubiikhe tsingubo tsiolwami, nende olukhobalwo ma ndakhamuhelesie obunyali bwosi obwa wali n'nabwo. Yakhabe singa samwana wabandu ba Yerusalemu nende Yuda.

²²Ndakhamuhelesia obunyali bwosi hasi homuruchi, owolwibulo lwa Daudi. Yakhabe netsifungo tsieinyumba yoburuchi. Olwa yekula, obula ho onyala okhwikala, ne olwa yekala, obulaho onyala okhwikula.

²³Ndakhamukhupil'le hasi singa esibambo esiralilu, naye yakhabe oluruba lwoluyali khubeinyumba yiye bosi.

²⁴“Nebutswa abekhobe bosi nende abayamenyia balaba omusiko khuye. Balehandia khuye singa tsisongo, nebikombe nende etsipakuuli tsiachikhwanga khusibambo.

²⁵Olwa akene yako kaliekhola, esibambo esiali okhukhomwa butinyu habundu hatinyu, siakhatendeye ma sikwe. Yisio nisio esiakhabe esiakamo siebindu biosi okhwachikhwa khusio.” OMWAMI umal'le okhuboola.