Read lunyore ISAYA 23 Bible Online

ISAYA 23 - lunyore bible

ISAYA 23

¹Kano namang'ana akaboolwa khu Tiro. Mwekhuule nimubeelela inywe abayili betsimeeli tsiokhunyanza! Tiro, litaala lienywe liokhuluchinga lweinyanza limal'le okhumumwa, tsinyumba tsiaho tsisasikhile halala nahabundu ahetsimeeli tsihulukhilanga. Olwa etsimeeli tsienywe tsikhalukha okhurula Kupuro, namubool'lwe amang'ana kene yako.

²Mukhupe etsikhwisi, inywe abakhala ba Sidoni! Mwaruma abandu

³okhwambukha inyanza khulwo okhukula nende okhukusia obuswache obumelanga Emisiri nokhukhola obukhala namahanga kandi kosi.

⁴Ibe litookho lia Sidoni usimbibubwe omurwe! Inyanza halala nende oluhinga lwayo bikhweyambakhana nibiboola, “Sili okhwibulakhwo abaana bosi. Sili okhukhusiakhwo abasiani nohomba abakhaana tawe.”

⁵Olwa Bamisiri nabahul'le khu yako nabachenye khandi nabesikoke khulwokhumululwa khwa Tiro.

⁶Mwekhuule nimubeelela, inywe abandu bokhuluchinga lweinyanza. Yilukhe mutsie Tarishishi.

⁷Mbula yili liakhaba litookho liobusangali lia Tiro eliombokhwa mumatukhu kakhale noho? Mbula liakhaba nilio litookho eliahilanga abandu eluchelekha okhutsia okhuchiakia obumenyo noho?

⁸Niwina owaloosia okhuleera yaka kosi khu Tiro, litookho elioburuchi, elia abakhala bobwami balio balinji abandu boluyali khusibala?

⁹OMWAMI Wokhunyala Biosi niye owaloosia yaka. Yali okhuloosie yaka kho abe onyala okhuhiniaho obweloli bwabwe mukabakhola. Asimbie omurwe abandu babwe boluyali.

¹⁰Tsie mulime emikunda inywe abandu ba Tarishishi. Abulaho onyala okhumusoola tawe.

¹¹OMWAMI unyiil'le omukhono kukwe okhukhuya inyanza nokhukwisia amahanga kosi. Ulakile mbu tsimbinga tsia Bakanaani tsifunakwe.

¹²Ibe litookho lia Sidoni, obusangali bwenywe buhweye, ne abandu benywe basandibubwe. Kata nibaba nibelukhila Kitimu, sibakhabakhwo nomulembe tawe.

¹³Bali abandu ba Babulonia, ne tawe aba Asiria abalakhuula tsinyama nabulimo okhusen'na Tiro hasi. Bali Abababulonia aboombokha eminaara atsiokhuseera, nibasambula amasisi amarambi ka Tiro ma nibalekha litookho nilisasikhile.

¹⁴Mwekhuule nimubeelela, inywe abahili betsimeeli muinyanza! Litookho elia musoolanga limal'le okhukwa.

¹⁵Inyinga yitsanga olwa Tiro liakhebil'lwe khulwemihika amakhumi kane nakataru, emihika chiomuruchi mulala amenyanga. Olwe emihika yitsio tsilihwa, Tiro liakhabe singa olwembo lwe litamba oluboolanga mbu:

¹⁶“Bukula lilele lilio, ma obotokhane litookho, ibe litamba litakha eliebil'lwa. Okhupe lilele niwemba tsinyembo, khulwo khuleera abandu khandi.”

¹⁷Olwe emihika yitsio amakhumi kane nakataru tsiakhabe nitsihweye, OMWAMI yakhalekhe Tiro okhukalukha khubukhala bwalio obukhulu, nalio liakhakhole obusambale namahanga komusibala kosi.

¹⁸Amapesa kaliakharungwe khubukhala kakhahaanwa khu MWAMI. Siliakhakabikhe mwibere tawe, nebutswa yabo abekayakayanga OMWAMI bakhabukula amapesa kalio nibakula ebiokhulia nende tsingubo etsia benyanga.