Read lunyore ISAYA 24 Bible Online

ISAYA 24 - lunyore bible

ISAYA 24

¹OMWAMI namume esibala ma nasilekha nisiakwa likunda. Nasukhanie khwikulu khwesibala ma nasalania abandu bamwo.

²Abandu bosi bakholwe amang'ana amatelwa: abesaalisi nende abandu butswa, abasumba nende Abaami babwe, abokhukula nende abokhukusia, abokhuhambibwa libere nende abokhuhambia libere, abahinda nende abatakha.

³Esibala siakhamumwe kupu nisikwa likunda. OMWAMI umal'le okhuboola, ne kaletsa okhwekhola.

⁴Esibala siomanga nisiniala. Liloba liosi lihwetsekhel'la nilioma. Esibala nelikulu biombi bibolanga.

⁵Abandu bafwabwisie esibala khulwo okhufunaka amalako ka Nyasaye nende okhulekha indakano eya Nyasaye yalomba mbu ehindile emihika chiosi.

⁶Khulwe yako Nyasaye umal'le okhulaka esilaamo siobubi okhukwa khusibala. Abandu basio barungibwanga khumabi akabali okhukhola. Abandu batititi butswa nibo abasili mwoyo.

⁷Emisaala chiemisabibu chioma ne ewaini siyenyoolekhanga butoro tawe. Omundu wosi owalinjikhwo nobusangali leelo ali musibeela,

⁸ne amayoosi kobusangali akelilele nende ake tsing'oma sikasiliho tawe.

⁹Tsinyembo tsindahi etsiembwanga ne nibanywa ewaini sitsisiliho khandi tawe. Kata abulaho osangal'langa esinosi siewaini.

¹⁰Ingoyani yonyene niyo eli mwitookho, ne abandu beyikaal'langa mutsinyumba tsiabwe khulwokhunyoola omulembe.

¹¹Abandu bahanzukhanga mutsinjila tsiosi sichila ewaini sieliho tawe. Obusangali sibuliho khandi tawe khulwe inziayo, ne sibusili musibala yimwo tawe.

¹²Litookho lisasikhile, ne ebilibwa bialio bifunachilwe.

¹³Yaka niko akanakekhole khubuli lihanga khusibala siosi. Kakhabe singa lichesa limal'le okhuhwa, olwe emiseituni chimal'le okhubungulusia hasi okhurula khumisaala chiachio ne emisabibu chiokhumal'likha nachio chinokelwe okhurula khumisaala chiemisabibu.

¹⁴Yabo abakhahonokokhe balemba khulwo busangali. Yabo abali emasaba balaboola singa OMWAMI ali omukhongo.

¹⁵Yabo abali ebukwe baletsoomia OMWAMI. Abandu abamenyanga khundulo khweinyanza baletsoomia OMWAMI Nyasaye wa Isiraeli.

¹⁶Okhurula mutsisoma tsiehale etsiomusibala, khulahulila tsinyembo tsiokhwitsoomia Isiraeli, lihanga lilunji. Nebutswa ise siindikhwo nobunaayi tawe! Nzilil'langa okhuhwetsekhel'la! Abasiemani batsilil'langa okhuusiemana, ne obusiemani bwabwe bumeetekhanga okhuba obubi okhusila.

¹⁷Inywe abamenyanga musibala mumbulile! Ebirisio nende amako nende emibero bimulindanga.

¹⁸Omundu wosi ateemanga okhwilukha okhurula khwiyoka liebirisio alakwa mubuko, naye owilukha okhurula mubuko alahambwa mumubero. Ifula yeikhumatsi elakwa okhurula mwikulu, ne emise chiesibala chilatechela.

¹⁹Esibala silatikha nende okhutubulwa nisialama.

²⁰Esibala sihutuma singa omundu okhol'lwe namalwa, khandi sienuya singa akhatsu akhali mumbumbuyeka. Esibala siyembeleywe nobusiro bwetsimbi tsiasio. Nasikwe ne sinasibuukhekhwo khandi tawe.

²¹Inyinga yiitsanga olwa OMWAMI yakhahaane esinyasio khubabi abali nobunyali bwokhwikulu nende abaruchi abokhusibala.

²²Nyasaye alabunjelesia abaruchi halala singa ababohe ababunjikhilwe mubuko. Alabekal'la mububohe okhwola inyinga yokhuhaana esinyasio khubo yakhoole.

²³Omwesi kulamwama ne eliuba sililaakha khandi tawe; okhuba OMWAMI Wokhunyala Biosi yakhabe niyamihanga. Yakharuke mu Yerusalemu khusikulu sia Sayuni ne abemeli babandu bakhalole obukhongo bubwe.