Read lunyore ISAYA 25 Bible Online

ISAYA 25 - lunyore bible

ISAYA 25

¹Ibe, E OMWAMI niwe Nyasaye wanje; Ndakhakhufumia nende okhwitsoomia eliira lilio. Ibe wakhola ebindu biokhuchenya; ibe wabeeye okhuhesia mubusubilwa okhukhola amang'ana kawaloosia mumatukhu kakhale.

²Ukwisisia amatookho okhuba amakunda, nolikul'la tsiminga tsiako. Tsinyumba tsiobwami etsia abasuku befwe bombokha, sitsiakhombokhwe khandi tawe.

³Abandu bamahanga amakufu balakhwitsoomia ibe, Amatookho kamahanga amalulu kalakhuria ibe.

⁴Abatakha nende abatambi beelukhiye khuibe, nabo bali nomulembe mwiwe munyinga yomunyakhano. Ibe obetsanga obwikamilo okhurula khumbumbuyeka, khandi obetsanga esiinikha okhurula khumubasu omululu. Abandu abalulu baseeranga singa ifula yamachina,

⁵khandi baseeranga singa esiimi mumukunda omwomu. Nebutswa ibe, OMWAMI wasiling'ania abasuku befwe, ibe obunianga liyoka liabandu abalulu, singa lilumbesi lileeranga esinikha khwitukhu liyu p'pa.

⁶Hano khusikulu sia Sayuni, OMWAMI Wokhunyala Biosi yakhalombele amahanga kosi akokhusibala lisabo. Liakhabe lisabo liebiokhulia ebinolu nende eliewaini imbuulu okhusila.

⁷Hano OMWAMI yakhahiinieho matetekhana lilumbesi liesibeela esiabeyenge khumahanga kosi akokhusibala.

⁸OMWAMI Nyasaye yakhahinieho okhufwa khulweinziayo. Aleeya amasika mutsimoni tsia siamulala nahiiniaho es'simba murwe esia abandu banyoola musibala siosi. OMWAMI omwene umal'le okhuboola yaka!

⁹Khwitukhu yilio olwa kaliekhola, siamulala yakhaboole mbu, “Lole, uno niye Nyasaye wefwe! Khwabiikha obusubili bwefwe muye nawe wakhusoola! Ye niye OMWAMI! Khwabiikha obusubili bwefwe muye ne luno khuyaanzile nikhusangala sichila ukhuhonisie.”

¹⁰OMWAMI yakhasoole Esikulu sia Sayuni nebutswa abandu ba Moabu bakhasen'nwe hasi singa butswa obunyasi busen'nwanga mwiko liamasingo.

¹¹Bakhanyiile amakhono kabwe singa omwelema, nebutswa Nyasaye yakhabasimbie emirwe, ne amakhono kabwe kakheyinikhe sila omukhonyi wosi.

¹²Nyasaye yakhamulule tsiminga tsia Moabu etsili namasisi kabwe amarambi nakakoka hasi mulukuukhi.