Read lunyore ISAYA 26 Bible Online

ISAYA 26 - lunyore bible

ISAYA 26

¹Litukhu liitsanga olwabandu bakhembe olwembo yilu musibala sia Yuda: Litookho liefwe nelietsingufu! Nyasaye omwene alindanga tsiminga tsialio.

²Mwikule ebilibwa bielitookho, ma mulekhe lihanga lilunji linjilemwo; lihanga elia abandu balio bakholanga amalunji.

³Ibe OMWAMI, ohaananga omulembe kwakupu khu uyo owa makani kaake kali amaaralilu, sichila akhusubilanga ibe.

⁴Subilenje mu MWAMI inziayo, okhuba niye owanokhusoolenje khasotso.

⁵Ye ubatutuyisie yabo abali nesunga; umuluye litookho lietsingufu elia bamenyangamwo, khandi nafunaka amasisi kalio nikakwa mulukuukhi.

⁶Yabo abalinji abatakha bachendanga khulio, balisen'nanga hasi nebilenje biabwe.

⁷Injila yabandu abalunji neimbelanu, OMWAMI arel'lesianga omuhanda kwabwe.

⁸Khulondanga obulalilo bubwo nikhura obunaayi bwefwe mu ibe; niwe wenyene owakhwekombanga.

⁹Amakani kanje kakhwekombanga mubutukhu, omwoyo okuli mukari mwanje kukhukhambanga nesinani. Olwo obukhalachibwo bubetsanga musibala, nilwo olwa abomusibala bamanyanga obulunji.

¹⁰Kata nokhol'la abandu babi amalahi, sibanyala okhweka okhukhola obulunji tawe, kata musibala siabandu abalunji sino basikholanga butswa obusiamu. Basuulanga okhuhuchil'la obukhongo bubwo.

¹¹Abasuku baabo sibamanyile mbu wakhabaheelesie esinyasio tawe. Ibe OMWAMI obasimbie emirwe ma olekhe bakhupe esibi. Lekha banyoole esinyasio esia wabarechekhela. Obamnyie singa wayanza abandu baabo okhusila.

¹²OMWAMI, Ibe olakhuhelesia obuhinda; esindu siosi esia khunyoolanga sirulanga khu ake ibe okholanga.

¹³OMWAMI Nyasaye wefwe, ifwe khwarukwanga nende Abaami bandi, nebutswa khumanyilisianga mbu, ibe wenyene niwe OMWAMI wefwe.

¹⁴Luno bafwiye ne sibalamenya khandi tawe; ebiniini biabwe sibilasimukukhakhwo tawe, okhuba ubahelesisie esinyasio khandi ubamuluuye. Sialiho owakhabetsulila khandi tawe.

¹⁵OMWAMI, Ibe ukhol'le lihanga liefwe okhumeetekha, nolibambula tsimbeka tsiosi, ne yaka kakhuhelesisie oluyali olukali.

¹⁶OMWAMI, Ibe wahaana esinyasio khubandu baabo, ne mukhutsunwa okhukali bali okhusaaya khuibe.

¹⁷Ibe OMWAMI wachil'le nikhulakaya, singa omukhasi oli neinda alakayanga nali neinumwa yokhwibulwa.

¹⁸Khwali neinumwa nende okhutsunwa okhukali, ne sikhwayibulakhwo esindu tawe. Khusili okhuler'rakhwo esibala siefwe obulechi, kata kabulakhwoho aka khwahesia tawe.

¹⁹Abandu baabo abali okhufwa bakhasimukukhe! Emilambo chiabwe chilalamukha. Yabo bosi abakonanga mubilindwa biabwe balabuukha nibemba khulwobusangaali. Singa eliime eling'inang'inanga likufuhasianga esibala obuhia, nimbwo ibe OMWAMI olasimukusia yabo abali nibafwa khale.

²⁰Inywe abandu banje, injile mutsinyumba tsienywe ma mweyikalil'lemwo. Mwebisemwo khulwoluhono lutititi okhwola olwe lirima lia Nyasaye liba nilihweye.

²¹Lole OMWAMI yetsanga okhurula ahamenyanga mwikulu okhuhaana esinyasio khubandu bomusibala khulwe tsimbi tsiabwe. Obwiri obwakholwa musibala masilisi bulamanyikha, ne esibala sisilatsilil'la okhubisa yabo abali okhwirwa tawe.