Read lunyore ISAYA 28 Bible Online

ISAYA 28 - lunyore bible

ISAYA 28

¹Mulitsiboolelwa inywe abandu ba Isiraeli! Obukhongo bwelihanga lienywe bufwilil'langa singa tsisimbi tsiamauwa khumirwe chiabemeli abakhol'lwe namalwa. Emirwe chieyabo abelolanga chiabakhwa amafura obulahi, nebutswa bakon'ne, nibakhol'lwe namalwa amenji okhusila.

²OMWAMI ali nende omundu owobunyali owerechekhele okhubaseera. Naye yetsanga singa ifula yamachina, singa imbumbuyeka emululanga, khandi singa ikhumaatsi yeifula eyomukhuula kwayo kuhilanga esibala.

³Abemeli abeloli khandi abakhol'lwe namalwa yabo nabasen'nwe hasi.

⁴Ifuma yabemeli abeloli yabo ehwetsekhel'langa yiyo elaba singa amakhuyu akenganga lichesa nilisili okhwola. Olwomundu akalolanga, yakulanga bwangu namakhono ma akalia.

⁵Litukhu liitsanga olwo MWAMI Wokhunyala Biosi yakhabe singa olusimbi lwobukhongo khandi olwoluyali khubandu baabe abahonokokha.

⁶Yakhahaane obuchesi bwobukhalachi bwahabwene khubakhalachi besiina, khandi yakhahaane olutswoni khu yabo abalindanga ebilibwa bielitookho okhurula khubasuku.

⁷Kata abaroobi nende abesaalisi bakhol'lwe namalwa okhusila mbu bahutumanga butswa. Banyweye amalwa amenji okhusila mbu bakoyananga nibesikar'ra. Abaroobi bakhol'lwe namalwa okhusila kata sibanyala okhumanyilisia amabiso ka Nyasaye abisulanga tawe. Khandi abesaalisi nabo bakhol'lwe ma kata sibanyala okhuhaana obukhalachi bwahabwene khumang'ana kabandu babaleeranga tawe.

⁸Etsimesa tsiabekhalangakhwo tsiayitsulakhwo amasale; kata habundu ahalafu sihalikhwoho tawe.

⁹Bandekaananga ise. Baboolanga mbu, “Omundu uyo apaalanga yakhebaal'la wina? Niwina owekombanga okhuhul'la amang'ana kaake? Amang'anake kakasilanga butswa abaana abatoro abalekhele okhununa ahembi yaha.

¹⁰Ateemanga okhukhwibaal'la buli enyokuta khunyokuta, olubaso khulubaso, elieko khulieko.”

¹¹Nimurambulila ise tawe, kho Nyasaye alal'lomela muminwa chiabandu abacheni, okhuboola ol'lolomo olwa muramanyile khulwo khumwibaal'la ebiindu.

¹²Nyasaye yali okhumuhelesia inywe mwesi obuhuluukhi nende obwale nebutswa mwasuula okhumuhulila.

¹³Niko akachila OMWAMI yeetsa okhumwibaal'la buli enyokuta khunyukuta, olubaso khulubaso, elieko khulieko. Ma muleesikar'ra muliosi elia mukhola. Mulasalisibwa, nimutiilwa khandi nimuhilwa mububohe.

¹⁴Luno inywe abandu beinjinia abaamihanga hano mu Yerusalemu khubandu yaba, hulile ako OMWAMI aboolanga.

¹⁵Mwepaakanga mbu mwalomba indakano nende okhufwa ma mwahuchilisania nende esibala siemakombe. Muli nobusubili mbu likhupako niliakhetsa siliakhamusalisia tawe sichila musubilanga mububehi nende mubukaati khulwo khwesinga khusibi.

¹⁶Kho kano niko aka OMWAMI Nyasaye aboolanga: “Retsanga omusinji omuralilu khandi okwetsingufu mu Sayuni. Mukwo, retsangamwo lichina litinyu eliobukhonyi obukali! Khwichina tsana ndahandikakhwo amang'ana kano mbu, ‘Omundu wosi osubila mulio siayakhesikoke tawe.’

¹⁷Obukhalachi bwahabwene nisio esipimilo siomusinji tsana, ne obusubilwa nibwo omukoye kwokhulunjisia amasisi.” Amachina Keifula kaleya obubehi bwosi obwamusubilanga mwo, ne emikhula chiamaatsi chilafunaka obwikamilo bwenywe bwosi.

¹⁸Indakano eyamwalomba nende okhufwa elahinibwaho, kata okhuhuchilisania khwenywe nende esibala sie Makombe sikhulabaho khandi tawe. Olwe likhupako nalimume abandu, nawe khandi nalikhukwile.

¹⁹Nalikhukwilenje khase na khase khandi buli mukamba. Okhwola mulalwefwile obutukhu nom'basu. Sieling'ana licheni okhurula khu Nyasaye lilaleera esirisio esicheni!

²⁰Mwakhabe singa omundu owaboolwa mutsingano, oteemanga okhukona khusitanda esimbichiti esiaranyala okhulambisia ebilenje nakon'nekhwo tawe. Khandi nelipalangeti eliranyala okhumufuunikha om'bili kwosi tawe.

²¹OMWAMI alalwana lihe singa yali okhulwan'na khusikulu sia Perasimu nende mu Libanda lia Gibeoni, kho abe onyala okhukhola; aka achomanga okhukhola ebikhole biokhuchenya okhusila. Alamalila omulimokwe, okuli okwokhuchenyia.

²²Murakhola esihenyehenye khwichetsiyio elia muhelesianga tawe. Nimwakhalikhola bwakhaba obutinyu khwinywe okhuhonokokha. Okhuba mbuliiye OMWAMI Wokhunyala Biosi akhalachile okhumulula lihanga liosi.

²³Reke amarwi muhulile akamubool'langa. Muhuyie bulahi amang'ana kamboolanga.

²⁴Abulaho omulimi owamenya nalimanga omukunda kukwe khandi owamenya nakurechekhanga khulwo khurakamwo imwo.

²⁵Olwa abeetsanga namal'le okhukurechekha amiitsanga imwo yetsinuuni nende tsimindi. Khandi arakanga ingano mutsimbaso, nende eshayiri habundu hayo, ne khundulo khwemikundachie, arakangakhwo imwo yindi.

²⁶Ye wamanya obwo okhukhola omulimo kukwe bulahi, sichila Nyasaye niye owamwibaal'la.

²⁷Siarumikhilanga esikulume okhukhuya tsinuni nende tsimindi tawe. Nebutswa arumikhilanga tsisaala tsinyelele khulwokhukhuya.

²⁸Siyononianga ingano khulwa okhuchihuula khase na khase tawe, ne wamanya obwokhuchihuula khulwa okhubisisiakhwo likaari lie sila okhutubula ingano yene tawe.

²⁹Obuchesi yibu bwosi burulanga khu Nyasaye Wokhunyala Biosi. Amang'ana kosi aka Nyasaye aloosianga nakobuchesi ne okhwola kahesikhe.