Read lunyore ISAYA 29 Bible Online

ISAYA 29 - lunyore bible

ISAYA 29

¹Olusambwa lwa Nyasaye! Litookho elia Daudi yombokha mwo liheema lilie litibile! Lekha omuhika kundi mulala nohomba ehibili chitse ma khandi chibire halala namasabo kachio nende okhwesangasia,

²ma nilwo olwa Nyasaye naleere esibi khwitookho elilangwanga mbu, “Olusambwa lwa Nyasaye.” Khwakhabeeyo okhulakaya nende okhwekhuula, ne litookho liosi liakhabe singa olusambwa olwatsukhwakhwo amatsahi.

³Nyasaye yakhaseera litookho, nalifumbila ma nalira mubuhambe.

⁴Yerusalemu liakhabe singa esinasuukhila esiehachianga okhul'loma okhurula isi weliloba, singa omwoyo okwafunikhilwa okurulanga mulukuukhi.

⁵Nebutswa abasuku ba Yerusalemu abenji bakhatubulwe singa olukuukhi olunyukhe, nende omukanda omukali kwabasikari bokhuriisia kwakhapulusibwe singa omukhuutsi. Matetekhana khandi sila obunaayi bwosi,

⁶OMWAMI Wokhunyala Biosi yakhamusoole nokhwanukha khwelikula halala nokhutechela khwesibala. Alaruma ifula yolucheka nende tsimemo tsiomul'lo okumululanga.

⁷Ma amahe kosi kamahanga akaseeranga litookho liolusambwa lwa Nyasaye, nebilasan'nwe biabwe biosi halala nebirumikhilo biosi p'pe bilakhamulukha singa amalooro, khandi singa esindu siomundu apal'lekhwo mubutukhu.

⁸Amahanga kosi akebunjikha halala okhuseera Yerusalemu kalaba singa omundu weinzala olooranga mbu aliitsanga nebutswa abuukhanga naali nzala, khandi singa omundu owobuluho bwiranga alooranga mbu anywetsanga amaatsi nebutswa abuukhanga mwikosi nimwomele.

⁹Mutsilil'le imbeli ne nimuba abahingwa! Mutsilil'le imbeli ne nimuba ababofu! Mukholwenge namalwa sila okhunywakhwo! Muhutumenge sila okhunywakhwo imburu yamalwa!

¹⁰OMWAMI achilanga nimurengetsa, nimukona tsindoolo tsinyinji. Abaroobi bakwana babe tsimoni tsiabandu nebutswa Nyasaye wabafuunikha tsimoni baralola tawe.

¹¹Esifune esili mumang'ana kosi akabisul'lwa abaroobi silibiswa okhurula khwinywe; silaba singa esitapu siabohwa butinyu. Noba nosihil'la omundu owamanya okhusoma ma omubool'le akhusomele, alakhukalusia mbu sianyala okhukhasoma tawe sichila siabohwa butinyu.

¹²Noba nosihelesia omundu oramanyile okhusoma ma nomubool'la okhusomele, alakhukalusia mbu siamanyile okhusoma tawe.

¹³OMWAMI yali okhuboola mbu, “Abandu yaba baboolanga neminwa chiabwe mbu bandekayakayanga, nebutswa amang'ana kabwe nakabutswa khandi emioyo chiabwe chili ehale n'nase. Obwekayakayi bwabwe sibulikhwo namang'ana kandi kosi nikarali amalako nende emilukha echiabandu echiabeeka nomurwe.

¹⁴Khulwe yako nambachenyie namakhupako akabaranaayangakhwo tawe nikalondokhananga. Obuchesi bwabachesi baabwe bulakora, ne obulwenyukhu bwabachesi bulaba obwabutswa.”

¹⁵Balitsiboolelwa yabo abateemanga okhubisa obuloosie bwabwe okhurula khu MWAMI. Bakholanga aka amachoomo kabwe masilisi nibakaala mbu abulaho obalolanga nohomba omanyile akabakhoolanga.

¹⁶Bafung'amianga ebindu biosi. Ni wiina owobunyali khu undi? Nomulonji nohomba nelitoyi? Mbula esindu siomundu yalonga siakhamubool'la mbu, “Ibe siwayinomba bulahi tawe”? Nohomba kata siakhamubool'la mbu, “Siomanyile esiokholanga tawe”?

¹⁷Singa kaboolwa, silubetsanga oluhono omutsuru okwayumba okhukwa omukunda kwokhulimwa, ne omukunda nakwo okhukwa omutsuru tawe.

¹⁸Olwe litukhu yilio liakhoole, abasilu bakhahulile esitapu nisisomwanga, netsimoni tsiababofu, ababeeye nibamenyanga musiilima tsiakhalole.

¹⁹Abahoma bakhanyoole obusangali obuhia mu MWAMI. Abatakha nabo abali mubandu bakhatsatsahal'le mu Nyasaye Omutsienukhu wa Isiraeli.

²⁰Siakhabe esihesi khu yabo abasandianga abasiabwe nibachiyilisia Nyasaye. Aboni bosi bakhamumwe.

²¹Nyasaye alamulula yabo abachikhanga abasiabwe, nende yabo abekal'langa abakholi bobubi mbu baraheebwa esinyasio tawe, halala nende yabo ababoolanga obubehi okhwikal'la abandu abalunji okhunyoola obukhalachi bwahabwene.

²²Kho luno, OMWAMI Nyasaye wa Isiraeli owali okhununula Aburahamu mumunyakhano aboolanga mbu, “Abandu banje, sinabasimbibwe emirwe khandi tawe, kata khandi sibalaba netsisoni tawe.

²³Olwa nabalole abaana aba nambahelesie, kho nilwo olwa nabamanye mbu ise nise Nyasaye omutsienukhu wa Isiraeli. Nabambelesie oluyali khandi nabariitsenge.

²⁴Abandu abahingwa mumioyo balaba nende okhumanyilisia, nabo abokhwekaana khasotso balasangala olwa bebaal'lwa.”