Read lunyore ISAYA 3 Bible Online

ISAYA 3 - lunyore bible

ISAYA 3

¹Luno OMWAMI, OMWAMI Wokhunyala Biosi ali ahembi okhuhiinia khu Yerusalemu nende Yuda ebindu biosi ebia abandu bamenyelangakhwo. Alihiniaho ebiakhulia biabwe nende amaatsi kabwe,

²abalechi babwe nende abasikari babwe, abakhalachi babwe nende abaroobi babwe, abalakuli babwe nende Abaami babwe,

³abemeli babwe ba amahe nende abemeli bandi bosi, abaruchi babwe nende abandu bosi abarumikhilanga obufumu mumilimo chiabwe.

⁴OMWAMI alalekha abandu barukwe nende abaana bati.

⁵Abandu balasandia abasiabwe. Ababuukha sibalahelesia abakhulundu babwe oluyali tawe, abandu be hasi sibaheelesia abakhongo babwe oluyali tawe.

⁶Inyinga yakhoole olwa abandu bomusilibwa silala bakheele mulala khubo nibamubool'la mbu, “Ibe olikhwo nende ingubo yokhwebiikha, kho yanza obe omwemeli wefwe munyinga yesibi yino.”

⁷Nebutswa naye yakhabakalusie mbu, “Ise tawe! Sinyala okhumukhonya tawe. Mbulakhwo esiakhulia kata tsingubo tawe. Murakhola omwemeli wenywe tawe!”

⁸Yee, Yerusalemu litibile! Yuda ekwitsanga! Kosi aka baboolanga nibakhola kafukulanga OMWAMI; banyekanga Nyasaye mwene habulafu.

⁹Ebiela biabwe bibakhalachilanga esiina. Bakholanga tsimbi habulafu singa abandu ba Sodoma bali okhukhola. Batibile ne belereye esibi yisi abene.

¹⁰Bool'la abandu abalunji mbu bali neikhabi sichila bakhasangaal'le okhulia amatunde kemilimo chiabwe.

¹¹Nebutswa abandu ababi batibile; akabakhol'la abandi leelo nakakholwe khubo.

¹²Abaana bakhupianga abandu banje esibi, ne abakhasi nibo ababaamihanga. Abandu banje, abemeli benywe bamukosinjia inywe, kho mubule okhumanya injilayo khulondakhwo.

¹³OMWAMI werechekhele okhuboola ameekano kaake; werechekhele okhukhalachila abandu baabe.

¹⁴OMWAMI ahilanga abakhulundu na bemeli babandu baabe musiina. Aboolanga kano khubo; “Mumal'le okhuyaaka omukunda kwemisabibu, netsinyumba tsienywe tsitsuuyemwo nebindu ebia mwanuula abatakha.

¹⁵Mubula omunwa kwokhusen'na abandu banje hasi nende okhunuula abatakha. Ise OMWAMI Wokhunyala Biosi mal'le okhuboola.”

¹⁶OMWAMI yaboola mbu, “Lole singa obwa abakhasi ba Yerusalemu bali nesunga! Bachendanga nibomele amakosi k'ka nende tsimoni tsiobwekombi sila es'simba murwe. Bachendanga nibenyola ne ebisambo nibisalikana khubilenje biabwe.

¹⁷Nebutswa nambahe esinyasio; nambeke emirwe chiabwe nibalekha olwale.”

¹⁸Litukhu liitsanga olwa OMWAMI yakhahinia khubakhasi ba Yerusalemu ebindu biosi ebichilanga nibelola mbu: obwesiahi bwebisambo biekhubilenje biabwe nende khumirwe chiabwe, nokhumakosi kabwe,

¹⁹nende khumakhono kabwe. Yakhahinie khubo ebitambaya biokhumurwe,

²⁰ne etsikofia tsiabwe, netsirisi tsiokhumakhono nende ebiuma ebiabebohanga mubisienje biabwe.

²¹Khandi yakhahinie khubo tsingaka etsia bebiikhanga khubitere biabwe nende khumoolu kabwe;

²²tsingubo tsindorotoro, nende tsifuubila nende amachoola, nemitata,

²³nende tsingubo tsiokhulolesia mukari, nende ekatani indorotoro, nende etitambaya biom'makosi nende etsineti tsiokhumurwe.

²⁴Kata nibaba nibarumikhila amafura kesuuswa balahunya. Musilenje sietsikhoba tsindahi, balarumikhila emikoye etsikatukhanga; musilenje sieliswi lilahi balaba nesiole; musilenje sietsingubo tsindahi, balebiikha amatasi; obukondo bwabwe obulahi bulaba es'simba murwe!

²⁵Abasaatsa bomwitookho yilio, kata yabo abakufu po, baleer'rwa mwihe.

²⁶Ebilibwa biomwitookho bilekhuula nende okhulakaya ne litookho liene lilaba singa omukhasi owikhaye hasi esihechenye.