Read lunyore ISAYA 30 Bible Online

ISAYA 30 - lunyore bible

ISAYA 30

¹OMWAMI aboolanga mbu, “Balitsiboolelwa yabo Abaami ba Yuda sichila banwananga ise. Balondanga amang'ana ake ise raloosia tawe, khandi balombanga indakano yobuhambani nabandu abe ise rasangilekhwo tawe. Bakholanga tsimbi okhumeeta khutsindi.

²Batsitsanga okhuruna obukhonyi Emisiri sila okhuureebakhwo ise tawe. Benyanga Emisiri okhubasinga khubasuku kho baretsanga obusubili bwabwe mumuruchi we Misiri.

³Nebutswa obulindi bwomuruchi we Misiri bulakwa es'simba murwe khubo khandi obusoolwi bwe Misiri bulabaleer'ra amanyakhano.

⁴Kata nikali mbu abarume babwe bamal'le okhwola mumatookho ke Misiri aka Soani nende Hanesi,

⁵abandu ba Yuda balasimba omurwe khulwa mbu bali khura obusubili bwabwe mwihanga eliranyala okhubakhonya, lihanga eliraleeranga obukhonyi kata obukhala tawe, nebutswa elileeranga es'simba murwe nende tsisoni.”

⁶Kano niko amang'ana ka Nyasaye yaboola khutsinyama nabulimo tsiomusitsiimi sie Nandete: “Abarume babir'ranga musibala esibi okhusila omwetsisimba tsimenyanga khandi omwetsinzokha tsiobusungu nende etsipulukhanga tsili. Batukhanga etsipunda nende tsingamia tsiabwe ebihanwa biobukusi obukali nibahil'la lihanga eliranyala okhubakhoonya tawe.

⁷Obukhonyi obwe Misiri ehaananga bubula obukhala. Khulwe yako mal'le okhukulikha Emisiri mbu ‘Okunyama kwomunyanza okuranyala esindu.’ ”

⁸Nyasaye yali okhumbool'la mbu mandiike musitapu okhumanyia obwa abandu bafwana, kho khube namahandiko akokhuhindila akamanyianga singa bali ababi.

⁹Bamenya nibafukulanga Nyasaye buli khase, bamenye nibaboolanga obubehi, nibasuula okhuhulila amebaalo ko MWAMI khasotso.

¹⁰Babool'langa abaroobi babune tsi. Bababool'langa mbu, “Murakhubool'la akali amalunji tawe. Mukhubool'le akakhuyanzisianga. Mukhulekhe khube mubukaalu bwefwe.

¹¹Murule imbeli wefwe khandi mulekhe okhukhwikal'la injila. Sikhwenya kata okhuhul'lakhwo aka Nyasaye wenywe omutsienukhu wa Isiraeli tawe.”

¹²Nebutswa kano niko amang'ana aka Nyasaye omutsienukhu wa Isiraeli aboolanga: “Muchaayanga aka mubool'langa nimusubil'la mubulwani nende mubukaati.

¹³Muli nesikha. Muli singa lisisi lirambi elili nende olwande okhurula ikulu okhwola hasi, elibungulukhanga bwangu.

¹⁴Namwarakwe obubi singa indabu yelitooyi mbu kata esikonjio esikali esiokhwanzalwakhwo omul'lo nohomba esiokhutayila amaatsi mwiyabo sisiakhanyoolekhekhwo tawe.”

¹⁵OMWAMI Nyasaye, Nyasaye Omutsienukhu wa Isiraeli abool'langa abandu baabe mbu, “Mungalukhile ma mube abaholelu mukhusubila ise. Ma nilwo olwa namube netsingufu nende omulembe.” Nebutswa musuulanga okhwitsa!

¹⁶Musilenje yisio mupaalanga obwa munyala okhuhonokokha okhurula khubasuku benywe khulwo khwilusia etsisululi etsilukhanga bwangu. Muli habwene sichila okhwohonokokha nikhwo okhwa munyala okhukhola! Mupaalanga mbu etsisululi tsienywe tsili netsimbilo okhusila, nebutswa yabo abakhamulondel'le bakhelukhe bwangu okhumuyomba inywe.

¹⁷Abandu elefu ndala khwinywe baleelukha olwa balola mulala khubasikari babasuku benywe, ne abasuku barano butswa bahel'le okhumutaabia emilibiri inywe mwesi. Abulaho kata mulala khubasikari benywe owanohonokokhe nikurali omusaala kwokhusungwakhwo ependela kwonyene nikwo okwanakusikale khubutenje bwesikulu!

¹⁸Ne kata mbwo OMWAMI alindil'langa okhumubeela tsimbabasi. Yenyanga okhumubeele'la sichila khasotso akholanga akali amalahi. Nabeikhabi yabo abasubilanga mu MWAMI.

¹⁹Inywe abandu abamenyanga mu Yerusalemu sinamwekhuulekhwo khandi tawe. OMWAMI nowetsimbabasi, ne olwa mumulakayila mbu amukhonye, alamukalusia.

²⁰OMWAMI alamubisia mutsinyinga tsindinyu, nebutswa ye omwene alabetsangaho okhumwibaal'la khe sinamumukhabe khandi tawe.

²¹Nimuba nimwebera okhurula khunjila okhutsia khumukhono musaatsa nohomba omukhasi, mulahulila omwoyokwe nikurulanga inyuma wenywe nikuboolanga mbu, “Injila njieino, muchilonde.”

²²Mulabukula ebiniini bienywe ebialombwa khufetsa nende ebiniini bienywe ebiafuunikhwakhwo etsahabu, ne mulabifuuba ehale singa amakokha nimuboola nomwoyo omukali mbu, “Rule m'moni mwanje!”

²³OMWAMI alakwisia ifula khu imwo yenywe eyamuraaka m'mukunda, ne ebilibwa biebiamo ebirulanga mwiloba bilanera nibiba ebinji okhusila khandi tsing'ombe tsienywe tsilaba nobunyasi obwinji.

²⁴Tsing'ombe nende etsipunda etsilimanga emikunda chienywe tsilalia obunyasi obuneru khandi obulahi okhusila.

²⁵Khwitukhu yilio olwe tsiminga tsiabasuku benywe tsiba nitsifumiywe ne abandu babwe nibeer'rwe, emichela chiamaatsi chilasenukha okhurula khubuli esikulu esirambi nende khubuli esikulu esimbichiti.

²⁶Omwesi kulaba nobulafu singa bwe eliuba, ne eliuba nalio lilaba nobulafu obukali hali khane nakhataru okhuyomba obwa libetsanga, ne bwakhabe singa obulafu bwamatukhu kane nakataru mwitukhu elala. Yaka kosi kalekhola olwa OMWAMI aliboha amakhwaku nende okhuhonia tsinguma etsia yahelesia abandu baabe.

²⁷Obunyali nende obukhongo bwo MWAMI bulolekhanga nibuli ehale. Omul'lo nende omwosi bimanyianga lirima lilie. Olwa al'lomanga amang'ana kaake katukhanga singa omul'lo.

²⁸Afuuranga emiiya imbeliwe singa omukhula kwamaatsi okuhilananga siesindu siosi. Kuhilanga amahanga mukhumululwa ma kura esiakamo khubuloosie bwabwe obubi.

²⁹Nebutswa inywe abandu ba Nyasaye, mwakhabe nobusangali nimwemba singa obwa mwembanga khubutukhu bwelisabo litsienukhu. Mulaba abasangalu singa yabo abachendanga nibalonda amayoosi akelilele nibatsia mu Hekalu yo MWAMI, omusooli wa Isiraeli.

³⁰OMWAMI alachila abandu bosi bahulile omwoyokwe kwobunyali ma balole obululu bwelirima lie. Khulabaho nende tsimemo tsiomul'lo okusambanga nende tsikhupa, nende imbumbuyeka nende ifula yamachina.

³¹Abaasiria balaba noburi obukali olwa bahul'la omwoyo kwo MWAMI nende okhutsunwa obululu khwesinyasio sia Nyasaye khubo.

³²Olwa OMWAMI aba nabanywekhanga khase na khase, abandu baabe balachenda habwene nibalonda amayoosi kebikuti nende akamatungu. Nyasaye omwene alalwana nende Abaasiria.

³³Khale muno habundu hali niharechekhwa ahomul'lo omukali kwakhasambileho omuruchi omukhongo wa Asiria. Nihabundu aheyinikhu khandi habambukhu ahabunjikhwaho esifuni sietsikhwi esirambi. OMWAMI yakhafuure omuya kwolumemo lwomul'lo khuwokhuhambia habundu yaho.