Read lunyore ISAYA 31 Bible Online

ISAYA 31 - lunyore bible

ISAYA 31

¹Balitsiboolelwa yabo abatsitsanga Emisiri okhukhaaba obukhonyi nibeleta khutsisululi. Basubilil'langa mumakaari kabwe kobulwani sichila namenji, khandi mutsingufu tsingali etsia belusi betsisululi. Nebutswa sibasubilanga khu MWAMI Nyasaye omutsienukhu wa Isiraeli kata okhureeba obukhonyi khuye tawe.

²OMWAMI wamanya aka akholanga omwene! OMWAMI aleeranga likhupako! Ahesianga amang'ana kebirisio kosi khulwo khuhaana esinyasio khubakholi bobubi nende khu yabo ababasoolanga ababi.

³Abaamisiri sibali abanyasaye tawe — bo nabandu butswa. Etsisululi tsiabwe tsili butswa netsinyama nende emibili ne sitsili emioyo tawe. Olwo MWAMI yakhanyile omukhono kukwe okhukhola akelichoomo lilie, lihanga lietsingufu lilasasikha, nalio lihanga litekhele eliakhonyel'lwa lilakwa. Kosi kabili kalamululwa.

⁴OMWAMI yali okhumbool'la mbu, “Kata abaayi nibakhakhupa etsikhwisi nende okhukhupa liyoka likali, sibanyala okhuriisia esimba okhurula khusolo eya emal'le okhwira tawe. Khandi nimbwo kali khu ise, sibulaho esinyala okhunzikal'la Ise, OMWAMI Wokhunyala Biosi okhusoola Esikulu sia Sayuni.

⁵Singa butswa obwelinyonyi libotokhananga hasitsu sialio okhulinda ebiminywi bialio nimbwo nase, OMWAMI Wokhunyala Biosi ndaliinda Yerusalemu nende okhulisoola.”

⁶OMWAMI yali okhuboola mbu, “Inywe abandu ba Isiraeli mwakhola tsimbi imbeli wanje nimufukula. Nebutswa luno kalukhe khu ise!

⁷Inyinga yiitsanga olwe inywe mwesi mwakhafuube ebiniini bietsimbi ebia mwaloomba okhurula khu efetsa nende etsahabu.

⁸Asiria lilamulul'lwa mwihe. Nebutswa siliakhamululwe nobunyali bwabandu tawe. Abandu ba Asiria bakhelukhe okhurula mwihe ne abasiani babwe ababuukha balakholwa abasuumba.

⁹Omuruchi wabwe omukhongo aleelukha muburi obukali, ne abemeli belihe balatechesibwa ma balalekha etsipendela tsiabwe etsielihe.” OMWAMI umal'le okhul'loma — OMWAMI owekayakaywanga mu Yerusalemu khandi owo mul'lo kukwe kwatukhangayo khulwokhusamba emisango.