Read lunyore ISAYA 32 Bible Online

ISAYA 32 - lunyore bible

ISAYA 32

¹Lole, khwakhabe nomuruchi owakharuke mubulunji nende abaami abakhamihe mubwatooto.

²Buli mulala khubo alaba singa obwikamilo khubusindu khandi singa habundu hokhwebisa okhurula khumbumbuyeka. Bakhabe singa emichela echibir'ranga musitsiimi khandi, singa esiinikha siolwanda olukali esili musilangalangwe.

³Tsimoni tsiabwe nende ebirwi biabwe biakheekukhe okhumanyilisia amanyakhano kabandu.

⁴Sibakhabe nesihenda mwoyo khandi tawe, nebutswa bakhabe nende limanyilisia mukhukhola khwabwe ne bakhaboole akabenyanga kakholwe.

⁵Omuhingwa siyakhalangwe owoluyali khandi tawe, kata omupele okhulangwa omusubilwa tawe.

⁶Omuhingwa al'lomanga akoluhingwa khandi apaalanga obwokhukhola ebindu ebibi. Akakholanga nende akaboolanga namanyeko khu MWAMI, ne sialiisianga abeinzala kata okhunywesia abobuluho amaatsi tawe.

⁷Omundu omuhingwa nomubi ne akholanga amabi. Aloosianga obwokhusalisia abatakha khulwo okhubakaata nende okhubekal'la okhuhebwa ebia bakhoyele okhuyoola.

⁸Nebutswa omundu woluyali akholanga ebiindu bioluyali ne asinjilanga tili okhukobokhela akatooto.

⁹Inywe abakhasi abamenyanga mubwale abaralikhwo nesihenda mwoyo siosi tawe, hulile akamboolanga.

¹⁰Inyumakhwo, omuhika mulala nikuhweye mulaba musibi, abali mubwale luno. Okhuba emisabibu sichiakhamekhwo tawe, kho okhuchesa khwachio sikhwakhabeho tawe.

¹¹Mwamenyelenge obulamu bwokhulia obwale, sila esihenda mwoyo tawe, nebutswa luno mutechele muburi! Mwenabule tsingubo musikala esihechenye ma mwebohe tsingubo tsiamatasi mubisienje bienywe.

¹²Mwefumbel'le mubilifu bienywe khulwesibeela sichila emikunda chienywe eminolu nende echiemisabibu chiononibubwe

¹³ne ebisisia nende amarakalu bionyene nibio ebikhulanga mumikunda chiabandu banje. Mulakayile tsinyumba tsiosi omwa abandu balinji nobusangali khandi litookho elialinjimwo obusangali.

¹⁴Kata hango hoburuchi hakhebalwe ne abundu bakhelukhe okhurula mwitookho. Tsinyumba nende tsiminga etsiabasinganga tsilasasikha khulwe inziayo. Etsipunda tsiomubulimo tsilamenyayo, ne amakondi nako kalanyoola obwayilo ebwene iyo.

¹⁵Nebutswa Nyasaye yakhakhurumile Omwoyo uwe khandi. Esitsiimi silakwa liloba linolu, ne emikunda chilaama ebiamo ebinji.

¹⁶Obwatooto nende obukhalachi obwahabwene bulakholwa musibala siosi.

¹⁷Sichila buli mundu yakhakhole amalunji, nakhube nomulembe nende obulindwi obulahi khulwe inziayo.

¹⁸Abandu ba Nyasaye balaba abalakhuule okhurula khusihenda mwoyo, ne tsingo tsiabwe tsilaba nomulembe nende obulindi obulahi.

¹⁹Nebutswa ifula yamachina yakhakwe m'mitsuru ne litookho liakhasasibwe.

²⁰Mako obwa buli mundu yakhabe nobusangali okhuba namaatsi amenji okhusama ebiraakwa nende okhuba nobwayilo obulahi buli habundu khulwe tsipunda nende tsing'ombe.