Read lunyore ISAYA 33 Bible Online

ISAYA 33 - lunyore bible

ISAYA 33

¹Mulitsiboolelwa inywe abasuku befwe! Mwali okhunuula nimusiemana, harali abulaho owamunuula namusiemana tawe. Nebutswa inyinga yenywe eyokhunuula nende okhusiemana yakhahwe, ne inywe abene mwakhakwe abokhunuulwa nende abokhusiemanwa.

²Ibe OMWAMI okhubeele tsimbabasi. Khwabiikha obunaayi bwefwe mwibe. Okhulinde sielitukhu ne okhuhonie munyinga tsiomunyakhano.

³Olwa ibe okhulwan'nanga amahe, amahanga kelukhanga nikakor'ra mubulimo khulweliyoka lielihe.

⁴Ebiindu biabwe biosi bilakwibwakhwo nibiyaakwa.

⁵Mako obwo MWAMI ali omukhongo! Yamihanga khubuli sindu. Aletsusia mu Yerusalemu obulunji nende obukhalachi bwatooto

⁶ma ahaane obwesichikhi oburalilu khwihanga. Ye alindanga abandu baabe khasotso khandi abahetsanga obuchesi nende obumanyilisi. Libikhilo liabwe likali okhusila nokhuhelesia OMWAMI wabwe oluyali.

⁷Abandu bolutswoni bareebanga obukhonyi. Abarume baabwe abali okhuteema okhuleera omulembe balakayanga bululu.

⁸Emihanda chili nebirisio mbu abulaho ochendanga khutsio tawe. Amalakano sikahesibwanga tawe ne obuhuchilisanie sibulondwanga tawe. Abulaho ohebwanga oluyali khandi tawe.

⁹Esibala sisikaaye butswa esiele ma abandu basiilukhile. Emitsuru tsia Lebanoni tsiayoma, libanda linolu lia Sharoni likwiye singa esitsiimi, ne mu Bashani nende khusikulu sia Karimeli, amasafu kabungulukhanga okhurula khumisaala.

¹⁰OMWAMI abool'langa amahanga mbu, “Luno nzia okhukhola akanjoomanga okhukhola. Ndamanyia obwa ndi owobunyali.

¹¹Inywe muloosianga amang'ana kabutswa ne siesiindu esia mukholanga sibula obukhala. Mweyononianga butswa abene.

¹²Mulasasikha singa tsinyanda etsisambwanga okhukwa echoka, khandi singa ebisisia ebisambwanga okhukwa likokhe.

¹³Siomundu wosi oli ahembi nende ehale ahulile aka mal'le okhukhola ma ahuchil'lekhwo mbu ise ndi owobunyali.”

¹⁴Abandu betsimbi ba Sayuni batechelanga khulwo oburi. Baboolanga mbu, “Obukhalachi bwa Nyasaye buli singa omul'lo kusambanga inziayo. Mbula alikhwoho mulala khu ifwe owakhahonokokha khu m'mul'lo singa yikwo sila okhuhia?”

¹⁵Munyala okhuhonokokha nimwakhaboola nende okhukhola akali akatooto. Murabukule obunyali bwenywe okhukaata abatakha tawe, khandi murahuchil'la ebihetso tawe. Murahambana nende yabo abaloosianga akobwiri nohomba okhukhola ebindu bindi ebibi tawe.

¹⁶Ma mulaba nomulembe. Mulanyoola obulindi singa abasingilwe noluhinga olwetsingufu. Mulanyoola ebiokhulia nende amaatsi kokhunywa.

¹⁷Khandi mwakhalole omuruchi narukanga mubukhongo bubwe khusibala esiabambukha tsimbeka tsiosi.

¹⁸Oburi bwenywe obukhulu khubasololi bobusuru abacheni nende khubandu bokhurunilisia amang'ana kamasilisi nakabe butswa amalooro.

¹⁹Simwakhalolekhwo abacheni bokhutsaalikha khandi tawe; yabo abal'lomanga ol'lolomo olwa muranyala okhumanya tawe.

²⁰Henge khu Sayuni, litookho elia khukhol'langamwo emilukha chiefwe echiedini. Henge khu Yerusalemu! Hakhabe habundu homulembe khulwo khumenyaho! Liakhabe singa liheema eliranyala okhusundwa, eliebibambo bialio biranyala okhwiywa kata emikoye chialio chiranyala okhukatukha tawe.

²¹OMWAMI yakhakhumanyie obukhongo bubwe. Khwakhamenye hamichela emibambukhu nende habitaho, nebutswa etsimeeli tsiabasuku sitsiakhetse ho tawe.

²²Okhuba OMWAMI niye omukhalachi wefwe. OMWAMI niye omusinji okuhetsanga amalako, khandi niye omuruchi wefwe; niye olakhuhonia.

²³Emikoye chiokhutsimeeli tsitendeyele; sichinyala okhusinjisia emeeli butinyu habundu halala tawe. Ma khwakhabukule emianduchiosi echiabasikari abasuku ne chiakhabe eminji mbu kata abalema bakhakabul'lwekhwo.

²⁴Omundu wosi owakhamenya musibala siefwe siyakhekaane khulwa okhuba omulwaye tawe, netsimbi tsiosi tsiakhalekhelwe.