Read lunyore ISAYA 34 Bible Online

ISAYA 34 - lunyore bible

ISAYA 34

¹Mwitse, inywe abandu bamahanga kosi! Mwebunjikhe halala ma muhulile. Lekhe esibala siosi nende abandu bosi abamenyangamwo betse hano ma abahulile.

²OMWAMI utiiliye amahanga kosi halala nabasikari bako bosi lirima. Ukakhalachiye esiina siokhumululwa.

³Emilambo chiabwe sichiakhayabilwe tawe nebutswa chiakhabole nichihunya obukundu. Ebikulu biakhakhanye khayi khulwamatsahi kabwe.

⁴Eliuba, omwesi nende tsinyininyini biakhatubulwe nibikwa olukhuukhi. Likulu liakhakhamulukhe singa esitapu esifumbilwe. Tsinyininyini natsio tsiakhakwe hasi singa amasafu karonyanga okhurula khumusaala kwomusabibu nohomba okwomukhuyu.

⁵OMWAMI urechekhele olukanga lulwe mwikulu, ne luno lularemaka Edomu, abandu yabo aba yakhalachila esiina siokhumululwa.

⁶Olukanga lulwe luletsuulakhwo amatsahi kabwe nende esinya, singa amatsahi nende esinya yamakondi nende tsimbusi etsir'rwe khulwo okhukhol'lwa omusango. OMWAMI yakhahane omusango yiku mwitaala lia Bosira. Yakhakhol'le obwiri obukali yibu musibala sia Edomu.

⁷Abandu bakhasinzwe singa tsimboko nende etsichulukhi tsinyana ne esibala siakhabe esiakhanyu khayi khulwamatsahi ne nisitsuyekhwo esinya.

⁸Yiyi niyo inyinga yo MWAMI yakhasoole Sayuni nende okhurunga es'sialia khubasuku balio.

⁹Emichela chia Edomu chiakhakwe elaamu ne amaloba kakhakwe obunora. Lihanga liosi liakhayie singa elaamu.

¹⁰Liakhayie obutukhu nom'mbasu, ne omwosi kwakhatuume okhurulamwo khulwe inziayo. Esibala siakhakwe esilangalangwe ebisoni nebisoni, ne abulaho owakhabir're musibala imwo khandi tawe.

¹¹Amakhuule nende amakhokho kalamenyamwo. OMWAMI yakhasikwisie esitsiimi khandi masilabe, singa obwa siali obulongi bwesibala nibusili okhubaho!

¹²Omuruchi wosi siyakhabekhwoho owakharuke lihanga yilio tawe, ne abemeli bosi bakhakore.

¹³Amahwa nende amarakalu kakhayumbe mutsingo tsioburuchi nende amataala kaasirwa namasisi, ne ebibwe nende amakhuule kalamenyamwo.

¹⁴Tsinyama nabulimo tsilachendachendamwo, ne ebisieno bilalangan'namwo. Okusieno kwabutukhu okukhasi kuletsa okhurula musilangalangwe nikurunanga habundu hokhuhuluukhila.

¹⁵Amakhuule kalombokha ebitsu biakomwo, nikareelamwo amayayi, nikaluul'la mwo ebiminywi biako nende akhubifwit'tamwo. Amakhokho nako kalebunjikhayo elala sisilala.

¹⁶Mukhaabe musitapu sio MWAMI esiebilonje ebili mwoyo ma musomemwo akasiboolanga. Sibulaho kata silala khubilonje yibi esiakhabule okhubamwo, khandi sibulaho esiakhabule omulina tawe. OMWAMI walaka mbu kabe mbwo; ye omwene yakhabileere halala.

¹⁷OMWAMI niye owakhabikabul'le esibala nahelesia buli silala khubio esitonye. Bilamenya musibala ebisoni nebisoni, ne esitonye yisio siakhabe esiabio khulwe inziayo.