Read lunyore ISAYA 35 Bible Online

ISAYA 35 - lunyore bible

ISAYA 35

¹Esiyieyie siakhasangale, ne amahuwa nako kakhamulikhe esimuli musitsiimi.

²Esiyieyie silemba nende okhukhupa liyoka liobusangali; siakhabe nelikondo lilahi singa ebikulu bia Lebanoni, khandi esinolu singa emikunda chia Karimeli nende Sharoni. Siomundu wosi yakhalole oluyali lwo MWAMI, alalola obukhongobwe nende tsingufutsie.

³Mukufuhasie amakhono amatofu, nimuralisia amasikamo amatekhele.

⁴Mubool'le yabo abemioyo chiabwe chiesikokele mbu “Mukufuhale, ne muraria tawe! Lole, Nyasaye wenywe yeetsanga okhumununula inywe. Yeetsanga okhuhaana esinyasio khubasuku benywe.”

⁵Ababofu balanyal'lwa okhulola, ne abasilu balahulila.

⁶Abalema balaruuma nibasina, ne yabo abaranyala okhul'loma bakhupe liyoka liobusangali. Emichela chiamaatsi chilasenukha okhubir'ra musiyieyie;

⁷omuyekhe okusambanga kulakwa inyanza, ne esibala esiomu siletsulamwo ebitaho biamaatsi. Ahebibwe bialinji okhumenya obunyaasi bwolusi nende amatundu bilakhulamwo.

⁸Omuhanda kwakhabeho, nakwo kulalangwa mbu, “Omuhanda kwo Butsienukhu.” Abetsimbi sibakhachende khukwo tawe, nebutswa kwakhabe omuhanda kwabandu ba Nyasaye; ne abahingwa sibakhakosiekhwo yabo abachendanga khunjila yiyo tawe.

⁹Esimba yosi yosi siyakhabekhwoyo tawe; inyama nabulimo imbalaba siyakhabira khunjila iyo tawe. Yabo abo MWAMI yanunula balachelela ingo khumuhanda ikwo. Abandu bo MWAMI yanunula bakhachelele;

¹⁰Bakhoole Yerusalemu nobusangali, nibembanga nende okhukhupa liyoka liobusangali. Bakhasangale amatukhu kosi, bakhabe abalakhuule okhurula khusibeela, nende khukhwekhuula khulwe inziayo.