Read lunyore ISAYA 36 Bible Online

ISAYA 36 - lunyore bible

ISAYA 36

¹Mumuhika kwelikhumi nakhane okwoburuchi bwa Hesekia mu Yuda, Senakeribu omuruchi wa Asiria, yaseera amataala ka Yuda akasirwa ma nakafumila.

²Ma Omuruchi wa Asiria yamala arume omukhongo wabasikari baabe, halala nende omukanda omukali kwabasikari okhurula Lakishi. Yabaruma okhutsia Yerusalemu okhuhachia omuruchi Hesekia okhulekha obulwani. Omukhongo uyo yasinjila khumuhanda okuli hamaduka kabanabi betsingubo, kali ahomuferechi okuleeranga amaatsi okhurula mwitubango liemukulu.

³Abayuda bataru beetsa okhumwakan'na nabo bali: Omukhongo osinjiliye hango homuruchi olangwanga mbu Eliakimu omwana wa Hilikia; Omuhandichi wemise, Shebina; nende omukhongo obikhanga ebitapu ebiahandikwamwo amang'ana koburuchi, Yoa omwana wa Asafu.

⁴Omukhongo wa basikari ba Asiria yababool'la mbu Omuruchi wa Asiria yenya okhumanya esichilanga Omuruchi Hesekia naba nolutswoni olukali.

⁵Yali okhureeba mbu, “Opaalanga mbu amang'ana butswa kanyala okhuchelaanibwa obusitsa nende obunyali bwobulwani bwelihe noho? Niwina owopaalanga mbu anyala okhukhukhonya okhukhol'la Asiria induli?

⁶Ibe onaayanga mbu Emisiri elakhukhonya, nebutswa yako kafwana singa orumikhilanga litundu eliafunikha singa indabusi yokhuchendela; nalio nalifumire omukhono kukwo. Nimbwo omuruchi we Misiri afwana khuyabo abasubilanga mubukhonyibwe.”

⁷Omukhongo wabasikari ba Asiria uyo yameeta okhuboola mbu, “Haundi witsa okhumbool'la mbu weleetanga khu MWAMI Nyasaye uwo noho? Bwali obwekayakayilo bwo MWAMI nende tsisambwa tsitsie etsia Hesekia yali okhutuya olwa yabool'la abandu ba Yuda nende Yerusalemu bekayakaye khulusambwa l'lala lwonyene.

⁸Yitsa luno, nombe n'nawe obuhuchilisani muliira liomuruchi wa Asiria. Nzia okhukhuhelesia etsisululi etsielefu tsibili nooba niwakhanyoola abandu abahela n'natsio khulwo khuchendelakhwo.

⁹Inywe simuli abanyala kata okhulwanakhwo nende omusikari wehasi khubasikari ba Asiria abakhongo tawe, ne nilwo olwa mwenyanga Abaamisiri bamuleer're amakaari kobulwani nende etsisululi tsiokhulwana.

¹⁰Mupaalanga ndabeye okhuseera esibala sienywe nisimuma sila obukhonyi bwo MWAMI noho? OMWAMI omwene niye owambool'la nzie okhusiseera ma simume.”

¹¹Ma Eliakimu, Shebina nende Yoa nibabool'la omukhongo wabasikari ba Asiria uyo mbu, “Okhul'lomele mul'limi lwa Aramaika khwalumanya. Orakhul'lomela mu Luheburania tawe; abandu bosi abali khumasisi koluhinga bahul'langa.”

¹²Naye nakalusia naboola mbu, “Mupaalanga mbu ninywe mwenyene nende omuruchi Hesekia abomuruchi wa Asiria yaarumile okhubool'la amang'ana yaka kosi? Tawe, mbool'langa kata nende abandu abeekhaye khumasisi koluhinga, abanabalie echo yabwe nibanywa amenyaali kabwe, singa neenywe namukhole.”

¹³Ma omukhongo wabasikari ba Asiria uyo nasinjila ma nalangisia mu Luheburania naboola mbu, “Hulile akomuruchi wa Asiria amubool'langa.

¹⁴Amuchetsiyianga mbu murahuchil'le Hesekia omukaate tawe. Hesekia sianyala okhumuhonia tawe.

¹⁵Murahuchil'le amukatilisie okhweleeta khu MWAMI olwa amubool'langa mbu, ‘Siahene OMWAMI alakhuhonia, litaala yili sililahaanwa mumukhono kwomuruchi wa Asiria tawe.’

¹⁶Murahulila aka Hesekia aboolanga tawe! Omuruchi wa Asiria amulakanga, murule esioba welitookho ma mulombe omulembe n'naye. Namuhuchil'lwe okhulia amatunde kemisabibu chienywe nende akemikhuyu chienywe nende okhunywa khumaatsi komubitaho bienywe —

¹⁷okhwola olwomuruchi wa Asiria yeetsa okhumuhila musibala esifwana nende esibala sienywe, aha emikunda chiemisabibu chili echia namunyoolemwo ewaini khandi ahobuswache bwokhulombwakhwo omukaati buli.

¹⁸Murahuchil'la Hesekia amuhingoyie mukhupaala mbu OMWAMI alamusoola tawe. Mbula abanyasaye bamahanga kandi babasoolakhwo okhurula khumuruchi wa Asiria noho?

¹⁹Bakhali hena luno yabo abanyasaye ba Hamatsi nende Aripadi? Ne abanyasaye ba Sefawaimu bakhalihe? Alikhwoho owasoola Samaria?

²⁰Niliina olwa kata mulala khubanyasaye bamahanga yaka kosi bahoniakhwo lihanga liabwe okhurula khumuruchi wa Asiria? Kho esichilanga nimupaala mbu OMWAMI anyala okhusoola Yerusalemu nisina?”

²¹Abandu basiling'ana tsi, singa obwomuruchi Hesekia yali nababooleye; sibachingakhwo omunwa tawe.

²²Ma Eliakimu, Shebina, nende Yoa nibarandula tsingubo tsiabwe khulwe esibeela ma nibatsia okhubool'la omuruchi Hesekia kosi akomukhongo wa Asiria yali nabooye.