Read lunyore ISAYA 37 Bible Online

ISAYA 37 - lunyore bible

ISAYA 37

¹Olwomuruchi Hesekia yali namal'le okhuhulila amang'ana kabwe, yarandula tsingubo tsitsie khulwesibeela, niyebiikha tsingubo tsiamatasi ma natsia mu Hekalu yo MWAMI.

²Yaruma Eliakimu omukhongo osinjiliye hango homuruchi, Shebina omuhandichi wemise, nende abesaalisi abakhongo khumuroobi Isaya omwana wa Amosi. Nabo khandi bali nibebiikhile tsingubo tsiamatasi.

³Kano niko amang'ana aka Hesekia yabaruma okhubool'la Isaya; “Leelo nelitukhu liokhukhupa esibi; khuhebwanga esinyasio nende okhunyekwa. Khuli singa omukhasi oli neinumwa yokhwibula nebutswa otofuuye okhusila.

⁴Omuruchi wa Asiria yali okhuruma omukhongo wamahe kaake okhunyeka Nyasaye oli mwoyo. Makano OMWAMI Nyasaye uwo ahulile amanyeko yaka ma ahaane esinyasio khu yabo bosi abamunyekele. Kho saaya khu Nyasaye khulwa abandu befwe abasikala.”

⁵Olwa Isaya yanyoola amang'ana komuruchi Hesekia,

⁶yamurumila likalusia yili: “OMWAMI akhubool'langa mbu arahuchil'la Abaasiria bakhutechesie khulwa okhuboola khwabwe mbu OMWAMI sianyala okhukhusoola tawe.

⁷OMWAMI alachila omuruchi wa Asiria ahulile amang'ana kokhuriisia ma akalukhe musibalasie omwene, ne OMWAMI alachila yer'rweyo.”

⁸Omukhongo wamahe ka Asiria yahul'la mbu Omuruchi wa Asiria yali narul'le Lakishi ne yali nalwananga lihe okhuseera litaala lia Libina ahembi Lakishi. Kho omukhongo uyo yatsiayo okhumukhoonya.

⁹Omunwa kwakhupilwa Abaasiria mbu abasikaribe Misiri nibemel'lwanga nende Omuruchi Tirihaka wa Etsiopia[8] beetsanga okhubaseera. Olwomuruchi wa Asiria yakahul'la, yarumania amang'ana khu Hesekia naboola,

¹⁰“Mutsie mubool'le Hesekia omuruchi wa Yuda amang'ana yaka: ‘Oralekha Nyasaye uwo owaweleetangakhwo akhukaate khulwa okhukhubool'la mbu Yerusalemu sililahaanwa mumukhono kwanje tawe.

¹¹Lola, ibe wali okhuhul'la obwa abaruchi ba Asiria bali okhukhol'la ebibala bindi, nibabimulula kupu. Nawe mbula wakhahonokokha noho?

¹²Abakuka banje bamulula amatookho ka Gosani, Harani nende Resefi nibeera abandu ba Betsiedeni abamenyanga mu Telasari, ne sialikhwoho nyasaye wabwe owabasoola tawe.

¹³Bali hena abaruchi bamatookho ka Hamatsi, Aripadi, Sefawaimu, Hena nende Iwa?’ ”

¹⁴Hesekia yabukula ebarwa iyo okhurula mumukhono kwabarumwa ma nachisoma. Olwa yali namal'le okhuchisoma, yatsia mu Hekalu ma nachibambula imbeli wo MWAMI.

¹⁵Hesekia yasaaya khu MWAMI naboola:

¹⁶“Ibe OMWAMI Wokhunyala Biosi, Nyasaye wa Isiraeli, owikhaye khuluruba lulwo ikulu wamakerubi, ibe wenyene niwe Nyasaye owamihanga obwami bwosi bwesibala. Wali okhulonga esibala nende likulu.

¹⁷Ne luno, OMWAMI, rekia esirwi sisio ma okhuhulile. Henga olole akekholekhanga khu ifwe. Hulila amang'ana ka Senakeribu aboolanga khulwokhunyeka ibe, Nyasaye oli mwoyo.

¹⁸OMWAMI, kali tooto mbu abaruchi ba Asiria bali okhumulula amahanga kosi nende okhukhola okhukwa likunda,

¹⁹ma nibasamba abanyasaye bamahanga yako nabo sibaali abanyasaye batooto tawe bali butswa ebifwanani ebialombwa namakhono kabandu okhurula khumisaala nende khumachina.

²⁰Kho OMWAMI, Nyasaye wefwe, okhununule okhurula khubunyali bwa Abaasiria kho amahanga kosi kemusibala kalamanye mbu ibe weenyene niwe Nyasaye.”

²¹Ma Isaya narumania amang'ana khumuruchi Hesekia namubool'langa likalusio khumasaayo komuruchi mbu,

²²OMWAMI ubooye, “Litookho lia Yerusalemu likhutsekhel'langa ibe Senakeribu nilikhuchaaya.

²³Opaalanga niwina owa wanyechelenje nende okhukhol'la esihenyehenye? Obulakhwo oluyali lwosi khu ise Nyasaye omutsienukhu wa Isiraeli tawe.

²⁴Warumile abarumwa baabo okhwitsa okhundepakilakhwo mbu ibe wali okhuleka ebikulu ebirambi bia Lebanoni namakaari kaako kokhulwana kosi. Wayepaakile mbu waremachila hasi emisiita emirambi chiosi nende emitarakwa emikol'lokhu echiokhubikulu bia Lebanoni khandi noremaka okhwola hakari womutsuru.

²⁵Weepakile mbu walima ebitaho ma nonywa amaatsi mubibala ebicheni, khandi mbu ebilenje ebia abasikari baabo biasenasena omuchela kwa Naili nibikukhamia.

²⁶“Ibe osili okhuhul'lakhwo mbu Ise ndali okhuloosia ebindu yibi biosi khale muno? Ne luno mal'le okhubikhola. Ndali okhukhuhelesia obunyali okhukalukhania amatookho akasirwa butinyu okhukwa amayindu butswa.

²⁷Abandu abali nibamenyangamwo babula obunyali; batechela nibang'ang'ala. Bali singa obunyasi musikuuri nohomba singa obulimo obumelanga khus'suli sie inyumba ne olwa obusindu obuyu pa bwitsanga ne bwoma.

²⁸“Nebutswa ise ndamanya amang'ana kosi khuibe, akokholanga khandi ahotsitsanga. Ndamanya obwa usinyikhilanga.

²⁹Mal'le okhunyoola amang'ana kaako akes'sinyo yako nende ake esunga yiyo iyo, ne luno nzia okhubiikha ingaka muliolu lilio nende esihambilo mumunwa kukwo, ma nakhukalusisie khunjila eya wetselakhwo.”

³⁰Ma Isaya nabool'la Omuruchi Hesekia mbu, “Sino nisio esimanyilo esie yako aka nakekhole. Omuhika kuno nende okwitsanga namulie obuswache bwemubulimo bwonyene nebutswa omuhika okwa khataru namuraake amatuma akabene mwakhachese khandi mwakharaake emisabibu nimulia amatunde kachio.

³¹Yabo khubolwibulo lwa Yuda abakhahonokokhe bakhahindihale singa ebiraakwa ebiyilanga emisi chiabio musi m'maloba ma biama ebiamo.

³²Khwakhabe nabandu mwitookho lia Yerusalemu nende khusikulu sia Sayuni abakhahonokokhe, sichila OMWAMI Wokhunyala Biosi ali nelichoomo okhuchila yaka kekhole.

³³“Yaka niko aka OMWAMI amal'le okhuboola khumuruchi wa Asiria: ‘Sinayenjilekhwo mwitookho nohomba okhulasa olusele kata l'lala khulio tawe. Abasikari abali nebikhumba sinabesundekhwo ahembi khwitookho tawe, ne etsikambi chiabasuku sinachiombokhwekhwo okhubotokhana litookho tawe.

³⁴Yakhakalukhile khunjila eya yetselakhwo, sila okhusenakhwo mwitookho yili tawe. Ise OMWAMI mal'le okhuboola.

³⁵Ise nasoole litookho yili, khandi nalilinde khulwe eliira lianje omwene nende khulwe indakano eya ndalomba nende omusumba wanje Daudi.’ ”

³⁶Om'malaika wo MWAMI yatsia mukambi ya Baasiria ma niyeera abasikari etsielefu emia ndala namakhumi munane natsirano. Olwabandu babuukha omukamba kwalondakhwo bosi bali nibakon'ne hasi nibafwiye!

³⁷Kho Senakeribu omuruchi wa Asiria yasinjisia obulwani yibwo ma nakalukha Nineve.

³⁸Litukhu elala olwa yali niyekayakayanga muhekalu ya nyasaye uwe habundu halangwanga Nisiroki, babili khubasiani baabe, Adurameleki nende Sharesa bali okhumwira nolukanga ma nibelukhila musibala sia Ararati. Mulala khubasiani babe bandi olangwanga, Esari Hadoni yemekhwa okhuba omuruchi musilenje sisie.