Read lunyore ISAYA 39 Bible Online

ISAYA 39 - lunyore bible

ISAYA 39

¹Olwene yilwo, omuruchi wa Babulonia, Merodaki Baladani omwana wa Baladani yali okhuruma abarumwa netsibarwa nende esihanwa okhuhil'la Hesekia olwa yali nahuliiye mbu Hesekia yali nahon'ne okhurula mubulwaye.

²Ma Hesekia nabenjisia bulahi. Yabamanyia inyumba yelibikhilo liobuhindabwe — efetsa nende etsahabu, ebihunyanga bulahi, amafura kobukusi obutinyu, ebilasan'nwe biosi, nende biosi ebianyoolekha mumabiikhiloke. Sibulaho esindu munyumbaye nohomba muburuchibwe esia Hesekia arabbamanyia tawe.

³Kho omuroobi Isaya yatsia khumuruchi Hesekia namureeba mbu, “Abandu yabo barul'le hena ne bali okhuboolakhwo sina?” Hesekia yamukalusia, “Barul'le ehale musibala sia Babulonia.”

⁴Isaya Nareeba, “Baluutsi sina munyumba yiyo yoburuchi?” Hesekia nakalusia mbu, “Bali okhulola ebindu biosi ebili munyumba yanje yoburuchi. Sibulaho esindu siosi esili mumabiikhilo kanje esia rabbamanyisie tawe.”

⁵Isaya yamala abool'le omuruchi Hesekia mbu, “OMWAMI Wokhunyala Biosi aboolanga mbu

⁶inyinga yiitsanga olwe ebindu biosi ebili munyumba yiyo yoburuchi nende ebindu biosi ebiabakuka baabo babiikha mumabiikhilo okhwola litukhu lino, bilabukulwa nabandu ba Babulonia. Sibulaho esiakhasikale tawe.

⁷Abalala khubaanabo bene bakhabukulwe ne bakhalatwe khulwo khurumikha munyumba yomuruchi wa Babulonia.”

⁸Ma Hesekia nakalusia Isaya naboola mbu, “Amang'ana akaundereye okhurula khu MWAMI namalahi,” okhuba yabukula amang'ana ka Isaya okhuboola mbu omulembe nende obulindi obulahi biakhabeho mumatukhu kobulamu bubwe.