Read lunyore ISAYA 40 Bible Online

ISAYA 40 - lunyore bible

ISAYA 40

¹OMWAMI aboolanga mbu, “Muhotselesie abandu banje. Mubahotselesie!

²Mutinyilisie abandu ba Yerusalemu. Mubabool'le mbu baanyakhana khulwoluhono olurambi, ne luno tsimbi tsiabwe tsilekheeywe. Ndabahelesia esinyasio hali khabili khulwe tsimbi tsiabwe tsiosi.”

³Omwoyo kulanjisianga nikuboola, “Lombele OMWAMI injila musitsiimi! Lunjisisie Nyasaye wefwe omuhanda musiyieyie!

⁴Mwitsusie amabanda kosi, muhelanie ebikulu ebirambi biosi. Ebianikisio nabio bilakholwa ebipaapi, ne ahasiama hosi halakol'losibwa.

⁵Ma obukhongo bwo MWAMI bulabisulwa, ne abandu bosi balabulola. OMWAMI mwene wakhusubisia yaka.”

⁶Omwoyo kulanjisianga nikuboola mbu, “Landia amang'ana yaka!” Nase niireeba mbu, “Nimang'ana sina aka nandia?” Nakwo nikuboola mbu, “Boola mbu abandu bosi bali butswa singa obulimo. Sibamenyanga oluhono okhuyomba amahuwa komubulimo tawe.

⁷Obunyasi bwomanga ne amahuwa kanialanga, olwo MWAMI aleelranga obusindu okhuhungutsa khubio. Abandu sibahindilanga okhuyomba obunyasi tawe.

⁸Yee, obunyasi bwomanga ne amahuwa kanialanga, nebutswa ling'ana lia Nyasaye wefwe lihindilanga khulwe inziayo.”

⁹Ibe Yerusalemu, yanichila khusikulu esirambi, ma olandie amang'ana amalahi! Olangilisie nomwoyo omukali, ibe Sayuni; olandie amang'ana amalahi! Okaboole ne oraria tawe. Obool'le amataala ka Yuda mbu Nyasaye wabwe yeetsanga!

¹⁰Lola, OMWAMI Nyasaye yeetsanga okhuruka nobunyalibwe obukali, yeetsanga namatanike okhurunga abandube.

¹¹Alaaya amakondike singa omwayi, alabunjelesia ebimeme halala nabikinga mumakhono kaake. Aleemel'la abanyina bako musilongole.

¹²Omundu yakhanyala okhuchela amaatsi komunyanza muufuusi, nohomba okhuchela likulu nende amakhonoke? Omundu yakhanyala okhuchingila amaloba kesibala siosi musikombe, nohomba okhuchela ebikulu ebikali nende ebimbichiti khuratili?

¹³Omundu yakhanyala okhubool'la OMWAMI esiokhukhola? Niwina onyala okhumwibaal'la kata okhumuchetsiyia?

¹⁴Niwina owa Nyasaye areebanga amachesi, kho anyoole okhumanyilisia nende okhumanya niyeeka obwebiindu bikwana okhukholwa?

¹⁵Khu MWAMI, amahanga kafwana butswa akharonyelesi khamatsi mundoo, ne kali singa olukuukhi oluli khuratili. Achelanga obusiro bwebiekhalachinga, ma buhela singa obusiro bwolukuukhi olunyukhe.

¹⁶Tsisolo tsiosi etsili mumitsuru tsia Lebanoni, sitsili etsihela okhuhaana omusango khu Nyasaye wefwe tawe. Emisaala chiayo nemileemu, sichinyala okhuhambia omul'lo tawe.

¹⁷Amahanga kosi sikali esindu imbeliwe tawe, akabalanga singa akaraliho tawe, khandi kali butswa amakhaya.

¹⁸Kho Nyasaye yakhachelaanibwa khuwina? Wakhamufwanania likondolie khuwina?

¹⁹Ye siali esiniini esia abandu babatsa namakhono tawe, esia abeeranyi betsahabu basibakhanga nibasilongela eminyol'lo chiefetsa tawe.

²⁰Omundu oranyala okhunyoola efetsa nende etsahabu, yeelanga omusaala okuranyala okhuboola tawe. Anyoolanga omubatsi omusitsa wokhumulombela esiniini esiranyala okhukwa hasi tawe.

²¹Inywe musili okhumanyakhwo? Inywe musili okhubool'lwakhwo okhurula khale? Musili okhumanyilisiakhwo obwe esibala siachaaka?

²²Uyo owikhalanga khuluruba lulwe oluli ikulu webibala khandi okhubira likulu niye owasilomba. Abandu behasi bafwananga singa tsindukusi. Yali okhubambula likulu singa ekatani, khandi singa liheema liokhumenyamwo.

²³Yesianga hasi abaruchi betsingufu, nabakhola okhuba abarali esindu.

²⁴Bali singa ebiraakwa ebitoro, ebisebukhile butswa nibisili okhuhila emisi. Olwa OMWAMI aleeranga obusindu, biomanga nibiyilwa nomuyeka singa omukhuutsi.

²⁵Nyasaye omutsienukhu yakhachelaanibwa khuwina? Alikhwoho omundu undi ofwana n'naye?

²⁶Henge mwikulu! Niwina owalomba tsinyininyini etsia mulolanga? Uyo otsiemel'langa singa omukanda kwabasikari, ye wamanya obwinji bwatsio, ne alanganga buli ndala neliira liayo! Obunyali bubwe nobukhongo po. Kata ndala khutsio sienyala okhukora tawe!

²⁷Isiraeli, busina wekaananga mbu OMWAMI siamanyile eminyakhanochio, kata siakhuhendelanga noba nokhupa esibi sila esikha?

²⁸Ibe siomanyilekhwo tawe? Osili okhuhul'lakhwo? Mbu OMWAMI niye Nyasaye weinziayo; niye owalonga esibala siosi. Siachonyanga kata okhuhwelel'la tawe. Abulaho omanyilisianga amapaalo kaake.

²⁹Akufuhasianga yabo abali abatofu khandi abachonyele.

³⁰Kata ababuukha batofulanga; ne abasiani nabo besikar'ranga nibakwa.

³¹Nebutswa yabo abasubilanga mu MWAMI khulwa obukhonyi, tsingufu tsiabwe tsilatsienulwa. Balapulukha namabaha singa tsinditsu; baleelukha ne sibalachonya tawe, balachenda khubilenje nebutswa sibalatoha tawe.