Read lunyore ISAYA 41 Bible Online

ISAYA 41 - lunyore bible

ISAYA 41

¹Nyasaye aboolanga, “Musiling'ane ma mumbulile inywe abamenyele ehale! Lekha abandu batsienule tsingufu tsiabwe. Lekha beetse ahembi, ma bal'lome; Lekha fwesi khwitse halala khulwo okhukhalachilwa esiina.

²“Niwina owaleera omuruchi wobulechi okhurula ebukwe, khandi ochilanga natsilil'la okhuleka hosi aha atsitsanga? Niwina omuheetsanga obulechi khubaruchi nende khumahanga? Olukanga lulwe lubakokanga hasi singa ol'la bali olukuukhi. Tsiseletsie tsibasalaanianga singa omukhuutsi kuhilwanga nobusindu.

³Abalondel'langa ma atsilil'langa mumulembe khutsinjila etsiasili okhuchendakhwo tawe.

⁴Niwina owachila yaka nikekhola? Niwina ochilanga amang'ana nikekhola mukhuchaaka? Ise OMWAMI ndaliho mukhuchaaka, khandi Ise OMWAMI ndakhabeho mukhumal'likha.

⁵“Abandu abamenyanga ehale baluutsi aka ndali okhukhola, bariiye nibatechela muburi. Kho bosi bebunjikhanga halala mabetsa.

⁶Ababaatsi bakhonyana nibatinyilisiania abene khubene.

⁷Omubaatsi wetsimbao abool'la omwiranyi mbu, ‘Okholanga bulahi!’ Uyo otuyanga esiinini nasihelania atinyilisianga uyo osihonganianga halala nemisumali. Baboolanga mbu, ‘Okhusambil'la nokhulayi,’ ma basihambania halala nemisumali.

⁸“Nebutswa Ibe, Isiraeli omurumikhili wanje, Inywe muli abandu banje abandali okhwahula, abolwibulo lwa Aburahamu omulina wanje.

⁹Ndamuhinia okhurula khutsindulo tsiesibala; ndali okhumulanga okhurula mutsikona tsiasio etsiehale, nimubool'la mbu, ‘Inywe muli abarumikhili banje.’ Sindaali okhumusuula tawe nebutswa ndali okhumwela.

¹⁰Muraria tawe; Ise ndi halala n'nenywe! Ise ni Nyasaye wenywe — esindu siosi siramutechesia tawe! Namukufuhasie nimukhonya; namulinde inywe nimusoola.

¹¹“Yabo abamusinyikhilanga inywe, balasimbibwa emirwe nibang'ang'ala. Yabo abamulwananga inywe balafwa,

¹²khandi balakora okhurula khusibala.

¹³Ise nise OMWAMI Nyasaye wenywe; Mutinyilisianga inywe nimubool'la mbu, ‘Muraria tawe; ise namukhoonye.’ ”

¹⁴OMWAMI aboolanga mbu, “Isiraeli, kata olwa muli abati khandi abatofu, muraria tawe; Ise namukhoonye. Ise Nyasaye omutsienukhu wa Isiraeli, nise omusoolanga inywe.

¹⁵Ndamukhola mube singa esinu siokhuhuula esiyia khandi, esiochi esili nende ameno amenji. Olahuula ebikulu ebirambi nobitubula, ne bilasalaanibwa nende imbumbuyeka.

¹⁶Olabifuuba mumiiya ne omuyeka kulabipulusia, ne bilasalaanibwa nende imbumbuyeka. Ma inywe mulasangala sichila ise nise Nyasaye wenywe. Namunzitsomie ise Nyasaye omutsienukhu wa Isiraeli.

¹⁷“Olwa abandu banje bakhababa amaatsi mubutambi bwabwe ne sikaaliho tawe, olwa amakosi kabwe kaba nikomele khulwobuluho, kho Ise, OMWAMI, ndakalusia amasaayo kabwe; Ise Nyasaye wa Isiraeli sindabeebala tawe.

¹⁸Nanzikule emichela okhubir'ra mubikulu ebihangal'lu, ne ebitaho biamaatsi nabibe mumabanda. Nangalukhanie ebiyieyie okhukwa amatubango kamaatsi, ne esibala esihangal'lu okhukwa ebitaho ebirakhamanga tawe.

¹⁹Nandekhe emisiita nende ebisisia, nende emipeeli nemihatasi nende emiseituni nabikhule musitsiimi. Emitsuru nachikhule musiyieyie, omutsuru kwemitetsari, emiteyashuri nende emitarakwa nachikhulemwo.

²⁰Abandu balalola yaka ma bamanye mbu, Ise OMWAMI, nise okakhol'le. Baleetsa okhumanyilisia mbu, Nyasaye omutsienukhu wa Isiraeli niye ochil'le nikekholekha.”

²¹OMWAMI, omuruchi wa Isiraeli aboolanga kano; “Inywe abanyasaye bamahanga, boole amang'ana kenywe. Haane ebifune bienywe ebikali!

²²Mwitse hano ma muroobe akanakekhole, kho nefwe khube abanyala khukamanyilisia olwa kekholekha. Yinoosie musiina yako akali okhwekhola khale, ma mukhubool'le esifune siako.

²³Mukhubool'le esiakhekholekhe mumatukhu akeetsanga, ma nilwo olwa khulamanya mbu muli abanyasaye! Mukhole amalahi nohomba amabi; mukhwitsusie muburi nende mukhung'ang'ala!

²⁴Inywe nende biosi ebia mukholanga simuli esindu tawe, yabo abamwekayakayanga nabes'sinyo.

²⁵“Mal'le okhwahula omundu omenyanga ebukwe; namuleere okhuseera okhurula esinyolu. Aseenanga abaruchi singa butswa amatoyi, singa omulonji atubulanga litoyi.

²⁶Niwina khwinywe owarooba mbu yaka kakhekhole, kho khuboole mbu muboolanga akatooto? Sialikhwoho kata mulala khwinywe owaboola ling'ana khu yaka tawe; omundu wosi siyahul'lakhwo nimuboolanga esindu tawe.

²⁷Ise OMWAMI, nise owali owokhuranga okhubool'la Sayuni amang'ana yaka. Ndali okhuruma omurumwa khu Yerusalemu okhuboola mbu, ‘Abandu baabo beetsanga! Bachelelanga ingo!’

²⁸Olwa ndahenga mubanyasaye, siyalikhwoho owaboola esindu tawe. Abulaho owakalusia aka ndareeba tawe.

²⁹Abanyasaye yaba bosi babula obukhala; sibulaho siosi esia banyala okhukhola ebiniini yibi nebitofu khandi bibula obunyali.”