Read lunyore ISAYA 42 Bible Online

ISAYA 42 - lunyore bible

ISAYA 42

¹OMWAMI aboolanga mbu, “Uyu nomurumikhili wanje, owa ndinyilisianga, uyo owa nzahuye, khandi ounyanzisianga. Mwitsusisie nomwoyo wanje, naye alakhalachila amahanga kosi mubulunji.

²Sialahanzuukha kata okhuchinguula omwoyokwe tawe, nohomba okhukambuukha mumihanda tawe.

³Sialafunaka litundu eliekota tawe, kata sialasimia etaya emulamulanga tawe. Alahana obukhalachi bwatooto mubusubilwa.

⁴Sialafwa omwoyo kata okhwesikoka tawe; alaralisia obulunji khusibala; ebibala biehale bilindil'la obwibaali bubwe.”

⁵Nyasaye yalomba likulu nalibambula; nalomba esibala nende biosi ebimenyangamwo. Yahaana obulamu nende emiiya khubandu bomusibala bosi. Ne luno OMWAMI Nyasaye abool'langa omurumikhili uwe mbu,

⁶“Ise, OMWAMI mal'le okhukhulanga ma khuheeye obunyali, okhulola mbu obukhalachi bwatooto bukholwanga khusibala. Okhubir'ra mu ibe ndakhalombe indakano nende abandu bosi; khandi ndakhaleere obulafu khumahanga kosi.

⁷Wakhekule tsimoni tsiababofu, nolakhuula yabo abekhalanga mubuhambe.

⁸“Ise sienyene nise OMWAMI Nyasaye uwo. Omunyasaye undi wosi sianyala okhuheebwakhwo obukhongo bwanje tawe. Sindakhahuchil'la ebiniini ebibaatse okhunyoolakhwo oluyali lwanje tawe.

⁹Ebindu ebia ndali okhurooba bimal'le okhuhesikha. Luno nyenyanga okhumubool'la ebindu ebicheni, kata nibisili okhuchaaka okhwekhola.”

¹⁰Mwembele OMWAMI olwembo oluyia; mwembe khukoluyali lulwe inywe abomusibala siosi! Mumwitsoomie, inywe abachendelanga khunyanza; mumwitsoomie, inywe ebilonje biosi ebiomunyanza! Mumwembele, inywe ebibala biehale nende bosi abamenyangayo!

¹¹Esitsiimi nende amataala kasio ketsoomie Nyasaye; Abandu ba Kedari nabo bamwitsoomie! Lekha yabo abamenyanga mwitookho lia Sela bakhupe liyoka liobusangali nibali khubutenje bwebikulu!

¹²Lekha yabo abamenyanga mubibala ebiehale, bahelesie OMWAMI oluyali nende obukhongo!

¹³OMWAMI orulanga natsia okhulwana singa omulwani omululu; werechekhele khandi ali nesinani okhutsia mwihe. Ahaananga ekhwisi yelihe nende omulango kwobulwani; amanyianga obunyali bubwe khubasukube.

¹⁴Nyasaye aboolanga mbu, “Ndali okhubuna tsi khulwo oluhono olurambi; sindakalusia amasaayo ka abandu banje tawe. Nebutswa luno esa yokhubakalusia yool'le; Ndakayanga singa omukhasi oli neinumwa.

¹⁵Namulule ebikulu ebimbichiti nende ebikulu ebirambi, khandi nanyomie obulimo nende emisaala. Nangalukhanie emichela chiomumabanda okhukwa esiyieyie, nikhamia amatubango kamaatsi.

¹⁶“Nanyemel'le abandu banje ababofu khutsinjila etsia basili okhulondakhwo. Nangalukhanie esiilima siabwe okhukwa obulafu, ne esibala siamachingili okhuba esihelanu. Yaka namasubisio kanje, ne nangakhole sila okhuchweya tawe.

¹⁷Nebutswa yabo abasubilanga mubiniini, abalanganga ebiniini abanyasaye babwe, bakhabe netsisoni nende es'simba murwe esikali.”

¹⁸OMWAMI aboolanga mbu, “Hulile, inywe abandu abasilu! Hengelesie bulahi inywe abali ababofu!

¹⁹Yakhabakhwoho omundu omubofu okhusila okhuyomba omurumikhili wanje, nohomba omusilu okhuyomba omurumwa owe ise rumanga?

²⁰Ibe Isiraeli, wabeeye okhulola amenji, nebutswa sibulaho esiawamanyilisisie. Amarwiko kayikukha, nebutswa nisina esiawahuliye?”

²¹OMWAMI ni Nyasaye owekombanga okhuhonia, kho yakalihia amalako kaake nende amebaaloke, ne yenya mbu abandu baabe bakahelesie oluyali.

²²Nebutswa luno abandu baabe bamal'le okhuyaakwa; Bekaliywe mubuko nibabiswa mubuhambe. Bali okhunuulwa nibayaakwa, ne omundu wosi siyabasoolakhwo tawe.

²³Niwina khwinywe owakhareka esirwi okhuhulila yaka? Niwina owakhahuyia bulahi okhuchiaka luno?

²⁴Niwina owahaana Isiraeli khubayaaki? Yali OMWAMI omwene, owa khwali okhwonela! Sikhwamenyanga singa obwa yenya khumenye tawe. Kata sikhwafumila amalako aka yakhuha tawe.

²⁵Kho yakhukhola khuhul'le obusiro bwelirimalie, ma khusalisibubwe nelihe lilulu. Lirimalie liatukha mu Isiraeli mwosi singa omul'lo, nebutswa ifwe sikhwamanyilisia esiali nisiekholekhanga tawe. Sikhwayekakhwo ling'ana liosi okhurula khwirima yilio tawe.