Read lunyore ISAYA 43 Bible Online

ISAYA 43 - lunyore bible

ISAYA 43

¹Isiraeli, OMWAMI owakhulonga ibe aboolanga mbu, “Oraria tawe — ise nakhununule. Mal'le okhukhulanga khuliira lilio; ne ibe oli owanje.

²Olwa obir'ra mumaatsi amenji akatsia olutungu, ise nambe halala n'nawe; eminyakhano chichio sinachikhuyombel'le tawe. Olwa obir'ra mumul'lo, omul'lo sinakukhusambe tawe; amateemo amatinyu akakhwitsila sikanyala okhukhusaalisia tawe.

³Okhuba ise nise OMWAMI Nyasaye uwo, Nyasaye omutsienukhu wa Isiraeli, omuhoniawo. Ndachihaana Emisiri khulwokhukhusoola, khandi ndahaana Etsiopia nende Seba khulwokhukhola omulakhuule.

⁴Ndakahaana amahanga kosi khulwo okhuhonia obulamu bubwo. Sichila oli owobukusi obukali khu ise, khandi sichila ndakhuyanza ma khuheetsanga oluyali.

⁵Oraria tawe okhuba ndi halala n'nawe! “Nanjelesie abandu baabo ingo, okhurula ebukwe ehale bwene nende emasaba.

⁶Nambool'le esinyolu ebalakhuule, ne enandete nayo elekhe okhubahandakhwo. Lekha abandu banje bachelele okhurula mubibala biehale, khandi okhurula mubuli olusoma lwesibala.

⁷Bo nabandu banje bene, ne ndali okhubalonga mbu bambelesia obukhongo.”

⁸Nyasaye aboolanga mbu, “Leere abandu banje halala. Bali netsimoni, nebutswa nababofu, bali namarwi, nebutswa nabasilu!

⁹Bool'le abandu bomumahanga betse halala. Niwina khubanyasaye baabwe onyala okhurooba akanakeetse okhwekhola? Niwina khubo owali okhuroobakhwo khale akali muliekhola luno? Lekha abanyasaye yaba baleera obakobokheli babwe okhumanyia mbu bali habwene, bakobokhele obwatooto bwamang'ana kabwe.

¹⁰“Inywe abandu ba Isiraeli muli abakobokheli banje, ndali okhumwahula okhuba abarumikhili banje, kho mbu mmumanye ise khandi musubile mwise, ma mumanyilisie mbu nise Nyasaye sienyene. Abulaho Nyasaye undi okhumeeta khu ise; siyalikhwoho khandi sialibakhwo ho tawe.

¹¹“Ise sienyene nise OMWAMI, nise sienyene onyala okhumuhonia.

¹²Ndali okhurooba akakhekhole, ma ninzitsa okhumuhabina. Abulaho nyasaye omucheni owakholakhwo yako tawe. Inywe muli abakobokheli banje.

¹³Ise nise Nyasaye khandi nambetsenje Nyasaye khulwe inziayo. Abulaho onyala okhuhonokokha mubunyali bwanje. Abulaho onyala okhusukhania emilimo chianje.”

¹⁴Nyasaye omutsienukhu wa Isiraeli, OMWAMI omuhonia wenywe aboolanga yaka, “Naarume abasikari belihe okhulwana Babulonia khulwo khumuhonia inywe; nafunake ebilibwa bielitookho, ne okhukhupa khwe liyoka liabandu bayo khulakwa amasika.

¹⁵Nise OMWAMI, Nyasaye wenywe omutsienukhu. Ndali okhumulonga inywe, Isiraeli, ne nise Omuruchi wenywe.”

¹⁶Khale muno OMWAMI yalomba omuhanda okhubir'ra munyanza, khandi yalomba injila okhubir'ra mumarunda kamaatsi.

¹⁷Yemel'la okhumululwa khwabasikari abalulu, bali abasikari bamakaari nende abetsisululi. Bakwa hasi ne sibabuukha tawe, basimibwa singa etaya yolutambi!

¹⁸Nebutswa OMWAMI aboolanga mbu, “Murahande khumang'ana kakhale, nohomba okhumenyela yako akali okhwekhola khale tawe.

¹⁹Muhengelesie esindu esicheni esia nzia okhukhola. Sili muliekhola — munyala okhusilola luno! Nanzikule injila musitsiimi, khandi namureele mwo ebitaho biamaatsi.

²⁰Kata tsinyama tsiomubulimo tsilambeelesia oluyali; ebibwe nende amahuto kalanzitsoomia, olwa nzikula emichela okhubira musiyieyie khulwo khuhaana amaatsi khu abandu banje abandahula.

²¹Bo nabandu aba ndalomba omwene, mbu bembe khulwo okhunzitsoomia!”

²²OMWAMI aboolanga mbu, “Nebutswa ibe Isiraeli wali okhunjonyela ise, siwandekayakaya tawe.

²³Musili okhunder'rakhwo omusango omusambekwe likondi; kata siwambelesia oluyali nemisango chienywe tawe. Ise sili okhukhusitohelakhwo khulwo okhureeba ebihanwa biobuswache kata okhukhuchonyiakhwo khulwokhwenya ebihanwa biobwali tawe.

²⁴Osili okhungul'lakhwo obwali, kata okhusangasiakhwo nebihanwa bietsinyama tsinolu tawe. Harali wali okhusitohela khulwe tsimbi tsitsio; mwali okhunjonyia nende obusiamu obwa mwakhola.

²⁵Nikarali, ise nise Nyasaye olekhelanga tsimbi tsienywe; kholanga yaka khulwoluyali lwanje omwene, ne nanzibil'le tsimbi tsienywe etsiamwakhola.

²⁶“Chende khutsie musiina ma muhaane ebifune bienywe! Haane obukobokheli bwenywe okhumanyia mbu muli habwene!

²⁷Kuka wenywe wokhuranga yakhola tsimbi, abemeli benywe baakhool'la tsimbi.

²⁸Khandi abaruchi benywe bafwabia hatsienukhu hanje, kho ndalekha Isiraeli nemululwa, ne abandu banje nibasimbibwa omurwe.”