Read lunyore ISAYA 44 Bible Online

ISAYA 44 - lunyore bible

ISAYA 44

¹OMWAMI aboolanga mbu, “Hulila luno ibe Isiraeli omurumikhili wanje, hulile inywe abandu banje abandahula, abolwibulo lwa Yakobo.

²Ise nise Nyasaye owali okhumulonga; okhurula khunyinga eya mwebulwa, mukhonyanga. Muraria tawe; ninywe abarumikhili banje, abandu banje abandayanza.

³“Nandeere amaatsi khusibala siobuluho, ne nanzikule emichela okhubira khumaloba amomu. Nanzukhilil'le obunyali bwanje khubaana benywe, khandi nanamile abetsukhulu benywe tsikhabi.

⁴Balamela singa obunyasi obwatsukhilil'lwakhwo amaatsi, khandi singa likuku eliamela khumwalo kwamaatsi.

⁵“Abandu bakhaboole buli siamulala mbu, ‘Ise ndi owo MWAMI.’ Bakhetsa okhuhambana nabandu ba Isiraeli. Siomundu yakhahandike eliira lio MWAMI khumukhonokwe, niyelanga mbu nimulala khubandu ba Nyasaye.”

⁶OMWAMI, owamihanga abandu ba Isiraeli nabalinda, OMWAMI Wokhunyala Biosi, aboolanga yaka: Ise nise owokhuranga, khandi owokhumal'likha, abulaho nyasaye undi okhumeeta khu ise.

⁷Mbula omundu undi wosi yakhakhol'lekhwo aka ndakhola? Niwina owakharoobelekhwo kosi akakhekholekhele okhurula mukhuchaaka okhwola mukhumalila khwetsinyinga?

⁸Inywe abandu banje muraria tawe! Inywe mwamanya mbu okhurula khale okhwola leelo, Ise ndali okhurooba kosi akakhekhole, ne inywe muli abakobokheli banje. Alikhwoho nyasaye undi okhumeeta khu ise? Alikhwoho nyasaye undi owobunyali owa sili okhuhul'lakhwo?

⁹Yabo bosi abalombanga ebiniini sibali esindu tawe, ne abanyasaye ababahelesianga oluyali okhusila babula obukhonyi. Yabo abekayakayanga abanyasaye yabo nababofu khandi sibamanyile esindu tawe. Balasimbibwa emirwe.

¹⁰Sibuli obulahi okhulomba esiniini siesibia okhusiekayakaya singa omunyasaye tawe!

¹¹Omundu wosi osiekayakayanga alasimbibwa omurwe. Yabo ababaatsanga ebiniini nabandu butswa ne sibali esindu tawe. Lekha beetsa okhuyaalwa musiina. Balatechesia nibanyoola es'simba murwe.

¹²Omuruli abukulanga esitonye siesibia nasisambila mumul'lo. Omukhonokwe okwetsingufu kuchinganga inyundo natuya esibia tsana okhusing'onia. Olwa akholanga mbwo ahul'langa inzala, nende obuluho ma achonya.

¹³Omubatsi achelanga omusaala. Ang'oolangakhwo esifwanani nende echoka, nasikunza nebirumikhilo bibie, nasilomba mukhufwana khwomundu, esifwanani siomundu esielikondo lilahi esiokhureebwa munzuye.

¹⁴Anyala okhuremaka omusiita khulwo khubatsakhwo, nohomba anyala okhwela omuruba nende omutarakwa okhurula m'mutsuru. Kata anyala okhuraaka omutirisa nalindil'la ifula okhukukhusia.

¹⁵Ma omundu arumikhilanga esitonye silala nalomba singa tsikhwi ne esindi abukulanga nasikhola esiinini siomunyasaye. Abukulanga esitonye silala nasichikha omul'lo okwokhwora nende okhufuka obusuma. Ne abukulanga esitonye sindi okhwelombelakhwo omunyasaye ma amwekayakaya.

¹⁶Arumikhilanga esitonye silala siomusaala okhubwana omul'lo; asambilangakhwo inyama nachilia, niyekura bulahi. Yooranga omul'lo omwene naboola mbu, “Mako obwa kukaaasile noluuya! Mako obwa kuli omul'lo omulahi!”

¹⁷Esitonye sindi siosi alombangakhwo esiinini ma asiinamila nasiekayakaya. Asaayanga khusio naboola mbu, “Ibe niwe Nyasaye wanje umbonie!”

¹⁸Abandu singa yabo nabahingwa okhusila kata sibanyala okhumanya esiabakholanga tawe. Basimbanga tsimoni tsiabwe nibekala amakani kabwe mbu baramanya obwatooto tawe.

¹⁹Omubaatsi wesiniini abula nende obuchesi kata obwongu okhuboola mbu, “Esitonye silala esiomusaala ndasambile. Ndafukile obusuma khumayika nisamba inyama ma nindia. Ne esitonye sindi siosi ndalombelekhwo esiinini siomunyasaye. Hano nzinamilanga omusaala omubatse!”

²⁰Kali butswa singa okhulia likokhe. Amapaaloke akoluhingwa kamukoyania okhusila ma kata sanyala okhukhonywa tawe. Sanyala okhuhuchil'la omwene mbu esiniini esiali n'nasio mumukhonokwe sisili omunyasaye wosi tawe.

²¹OMWAMI aboolanga mbu, “Isiraeli, witsul'le yaka; witsul'le mbu oli omurumikhili wanje. Ndakhulonga obe omurumikhili wanje, ne sindakhakhwibil'lekhwo tawe.

²²Mal'le okhweya tsimbi tsitsio singa lilumbesi. Hunzukha khu ise; Ise nise okhuhonianga.”

²³Khupe liyoka liobusangali, inywe abali mwikulu! Khupe liyoka inywe tsindungu tsiokhusibala! Khupe liyoka liobusangali, inywe ebikulu nende emisaala chiosi etsiom'mutsuru! OMWAMI umanyisie obukhongobwe khulwokhuhonia abandube ba Isiraeli.

²⁴“Ise nise OMWAMI, omuhoni wenywe; nise owamulonga inywe. Ise nise OMWAMI, omulonji webindu biosi, Ise sienyene ndali okhubambula likulu. Olwa ndalomba esibala, abulaho owali okhukhonya tawe.

²⁵Ise njilanga abafumu nibafwana abahingwa, ningoyania oburoobi bwabebitsohela. Fukulanga amang'ana kabachesi, nimanyia mbu obuchesi bwabwe nobuhingwa.

²⁶Nebutswa olwomurumikhili wanje aroobanga, olwe ise rumanga omurumwa okhuribula amang'ana kanje, Ise kholanga akambetsanga nimbooye okhuhesikha. Mbool'langa Yerusalemu mbu abandu bakhamenyeyo khandi, khandi mbool'langa amatookho ka Yuda mbu kakhombokhwe obuhia. Amatookho yako kakhombokhwe mumayindi.

²⁷Khulwe ling'ana liokhulakwa butswa, khamianga inyanza.

²⁸Mbool'langa Kirushi mbu, ‘Niwe owanaurukilenje abandu; nokhole ake ise nyenyanga okhole: nolake mbu Yerusalemu liombokhwe obuhia, khandi nolake mbu emisinji chie Hekalu chiyabwe.’ ”