Read lunyore ISAYA 45 Bible Online

ISAYA 45 - lunyore bible

ISAYA 45

¹OMWAMI umal'le okhwahula Kirushi okhuba omuruchi! Umal'le okhumuha obunyali okhuleka amahanga; amurumanga okhunuula abaruchi obunyali bwabwe; OMWAMI alamwikul'la ebilibwa biamatookho. OMWAMI aboolanga kano khu Kirushi:

²“Ise omwene nakhulombele injilayo, nambelanie ebikulu ebirambi nende ebikulu ebimbichiti. Nafunake ebilibwa biomukasa, ninduya ebibia biebilibwa tsana.

³Nakhuhelesie ibe emiandu okhurula habundu hamwamu khandi ahebisu; ma olamanya mbu Ise nise OMWAMI, khandi mbu Nyasaye wa Isiraeli ukhulangile khuliira lilio.

⁴Mal'le okhukhweela mbu okhonye omurumikhili wanje Isiraeli, abandu banje aba ndali okhwahula. Khuheeye oluyali olukali, kata olwe ibe oramanyile ise.

⁵“Ise nise OMWAMI; abulaho nyasaye undi. Nakhuhe tsingufu etsia wenyanga, kata olwe ibe oramanyile ise.

⁶Kholanga yaka kho abandu bosi, okhurula khulubeka l'lala lwesibala okhwola khulubeka lundi, bamanye mbu nise OMWAMI ne sialikhwoho nyasaye undi tawe.

⁷Nombanga obulafu nesiilima biombi. Mbananga tsikhabi khandi nderanga esibi. Ise OMWAMI kholanga ebindu yibi biosi.

⁸Nandeere obulechi okhurula khwikulu singa ifula; esibala silekukha okhububukula, ne obulakhuule nende obulunji bilakhula mwo obulunji. Ise, OMWAMI, nakhole yaka.”

⁹Alitsiboolelwa uyo uhingananga nende omulonjiwe. Mbula indabu yelitoyi yakhahinganakhwo nomulonji wayo; Indabu nandabu efwana butswa etsindi? Mbula litoyi liakhareebakhwo omulonji walio, “Okholanga sina?” Mbula indabu yakhekanakhwo omulonji wayo nemboola mbu, “Ibe omulonji soli nobusitsa tawe?”

¹⁰Mbula omundu yakhareebakhwo abebuli baabe mbu, “Busina nimunomba singa mbu?”

¹¹OMWAMI, Nyasaye omutsienukhu wa Isiraeli, khandi omulonji wa Isiraeli aboolanga mbu, “Obula omunwa okhuureeba amang'ana kabaana banje, nohomba okhumbool'la aka ngwana khole!

¹²Nise owalomba esibala, khandi ninonga abandu bokhumenya mwo. Khulwo obunyali bwanje ndabambuula likulu; ndi nobunyali khuliiba, nokhumwesi nende khutsinyininyini.

¹³Ise omwene nzubile Kirushi okhukhola emilimo, khulwokhuhesia lichoomo lianje nende okhulinjisia ebindu biosi. Nanunjisie siomuhanda okwa nalondekhwo, Nayombokhe obuhia litookho lianje lia Yerusalemu, nahaana obulakhuule khubandu banje abali mubuhambe. Omundu wosi sinamurungekhwo kata okhumuhetsa khulwokhukhola yaka tawe.” OMWAMI Wokhunyala Biosi umal'le okhuboola.

¹⁴OMWAMI abool'langa Isiraeli mbu, “Emianduchie Misiri nende Etsiopia nachibe echienywe, ne abandu abarambi ba Seba nababe abasumba benywe. Nabamulonde nibabohelwe muminyololo. Nabamwinamile nibeyama mbu, ‘Nyasaye ali halala n'nenywe; ye yenyene niye Nyasaye.

¹⁵Nyasaye wa Isiraeli ohonianga abandube, niye Nyasaye wamambiswi.

¹⁶Yabo abalombanga ebiniini bakhasimbe emirwe bosi. Bosi bakhahambwe netsisoni.

¹⁷Nebutswa Isiraeli uhonibubwe nende OMWAMI, ne obulechi bubwe buhindilanga inziayo; abandube sibakhabe netsisoni khandi tawe.’ ”

¹⁸OMWAMI yalonga likulu — ye yenyene niye Nyasaye! Yalonga esibala ma nasilomba — yasilomba esiralilu khandi esiokhuhindila. Siyasikhola esilangalangwe tawe, nebutswa yasikhola habundu habandu okhumenya. Ye niye oboolanga mbu, “Ise nise OMWAMI ne abulaho nyasaye undi.

¹⁹Sindaali okhuboola mumambiswi tawe, kata simbisanga lichoomo lianje tawe. Sindayenya abandu ba Isiraeli baarune musilangalangwe tawe. Ise nise OMWAMI, ne mboolanga akatooto; mboolanga habulafu akali habwene.”

²⁰OMWAMI aboolanga mbu, “Mwebunjikhe halala, inywe abandu bamahanga, inywe mwesi abahonokokha khukhukwa khwa Babulonia. Mwitse musiina abene muyaalwe! Abandu abachendanga nebiniini biabwe ebiemisaala, abasaaya khubanyasaye abaranyala okhubahonia. Abandu yaba sibamanyile esindu siosi tawe!

²¹Hambe muhaane abene amang'ana kenywe musiina; lekha abasooli bareebane abene khubene. Niwina owarooba khale muno yako kakhekhole? Sindali nise, OMWAMI, Nyasaye ohonianga abandu baabe? Abulaho Nyasaye undi tawe.

²²“Hunzukhe khu ise luno ma muhonibwe, inywe abandu bomusibala siosi! Nise Nyasaye sienyene oliho.

²³Lisubisio lianje neliatooto, ne silinyala okhukalukhanibwa tawe. Ise ndesuhanga muliira lianje omwene. Abandu bosi bakheetse okhusikama imbeli wanje, nibesuha okhuba abasubilwa khu ise.

²⁴“Bakhaboole mbu okhubir'ra mu ise sienyene, obulechi nende tsingufu tsilanyoolekha; nebutswa bosi abambihil'lwanga balanyoola es'simba murwe.

²⁵Ise, OMWAMI, naasoole abetsukhulu ba Yakobo bosi nabo nabambeelesie oluyali.”