Read lunyore ISAYA 46 Bible Online

ISAYA 46 - lunyore bible

ISAYA 46

¹OMWAMI aboolanga mbu, “Yisi nisio esihesi siabanyasaye ba Babulonia! Beli nende Nebo balinji okhwekayakaywa, nebutswa luno bakingiywe khutsipunda, okuli omusiko omusiro khumukongokwe chiechisolo echichonyele.

²Ebiniini sibinyala okhwehonia ebiene tawe. Bifumilwanga nende okhuchingwa nibihilwa ehale. Yisi nisio esihesi siabanyasaye ba Babulonia!

³“Muumbulile inywe abolwibulo lwa ba Yakobo, inywe mwesi abahonokokha okhurula mubandu banje. Ise ndali okhumulinda okhurula olwa mwebulwa.

⁴Ise nise Nyasaye wenywe ne ndakhamulinde okhwola mubusakhulu bwenywe, olwe liswi lienywe liliba niliakwa tsimbutsi. Ise ndali okhumulonga ne namulinde; namukhonye khandi namuhabine inywe.”

⁵OMWAMI areebanga mbu, “Niwina owamwakhanjelania n'naye? Alikhwoho omundu undi ofwana ise?”

⁶Abandu bafuunulanga emitata chiabwe nibahiniamwo etsahabu; bachelanga efetsa khutsiratili. Barunganga omuruli khulwo okhulomba omunyasaye; ma luno bamwinamilanga nibamwekayakaya!

⁷Bareetsanga omunyasaye tsana khumabeka nibamukinga; bamuretsanga habundu ahasisinjilanga, sianyala okhusikukha okhurulaho tawe. Omundu wosi naaba nasaaya khuye, sianyala okhumukalusia tawe, kata sianyala okhumuhonia okhurula musibi tawe.

⁸“Mwitsul'le yaka inywe abakholi betsimbi, mupaarekhwo khu yako aka ndakhola.

⁹Mwitsul'le yako akali okhwekhola khale; mumanye mbu ise nise Nyasaye sienyene, ne abulaho oundi ofwana singa ise tawe.

¹⁰Okhurula mukhuchaaka ndarooba akakheetse okhwekhola; ndekholel'la okhuboola yako akakhekholekhe. Ndali okhuboola mbu akandalosia okhwola kekhole, khandi ndakhakhole kosi akanjoomanga okhukhola.

¹¹Nanganga omundu okhwitsa okhurula ebukwe; naye alehina hasi bwangu singa ikhwambu, nahesia aka ndali okhuloosia. Mal'le okhuboola, ne kaleetsa okhwekhola.

¹²“Muumbulile, inywe abandu bamakosi amomu, abapaalanga mbu obulechi busili ehale.

¹³Ndeeranga litukhu liokhumununula ahembi; silili ehale kata nahati tawe. Obuhonia bwanje sibulachelebibwa tawe. Nambonie Yerusalemu khandi nandeer're Isiraeli oluyali.”