Read lunyore ISAYA 47 Bible Online

ISAYA 47 - lunyore bible

ISAYA 47

¹OMWAMI aboolanga mbu, “Babulonia, yikha hasi okhurula khulurubalwo, ma wikhale hasi mulukuukhi. Ibe khale walinji singa omukhaana omuchima, litookho eliralekwakhwo tawe, nebutswa siosili omutorotoro, khandi owokhutembelesibwa tawe! Luno oli omuhambe!

²Bukula oluchina lwerekoreko ma oseelekhwo obusie, hiinia olububi khumurwe! Wenabule tsingubotsio tsindahi! Sunda ingubo yiyo ikulu khulwokhubir'ra m'maatsi!

³Abandu balalola esihechenye sisio, balakhulola notutuhibwe khandi noli netsisoni Narungie es'sialia ne sialiho owanaunzikal'le tawe.”

⁴Nyasaye omutsienukhu wa Isiraeli okhununulanga — eliiralie niye OMWAMI Wokhunyala Biosi.

⁵OMWAMI abool'langa Bababulonia mbu, “Yikhala masilisi musiilima, sinolangwe khandi omuruchi wamahanga tawe!

⁶Ndatiil'la abandu banje lirima; ndabakhol'la singa abarali abandu banje tawe: Ndali okhubara mubunyali bubwo, ne siwababeela tsimbabasi tawe; kata abasakhulu wali okhubalul'la.

⁷Wapaala mbu nobeetsenje omuruchi khasotso, ne siwabikhakhwo amang'ana yaka mumwoyokwo tawe. Kata siwayireebakhwo obwesihesi siakhafwane tawe.

⁸“Hulila kano ibe owayanza omwenya, opaalanga mbu moli nomuleembe khandi moli bulahi. Moboolanga mbu oli omukhongo singa Nyasaye — mbu abulaho omundu ofwana singa ibe. Wali okhupaala mbu siwakhabekhwo omulekhwa tawe, nohomba simwakhakosiekhwo abaana baabo tawe.

⁹Nebutswa munyinga ndututu, mwitukhu elala butswa, ebindu yibi biombi nabiekhole khwinywe. Kata noba niwakharumikhila abafumu abenji, nokosie abaanabo nende omusaatsawo.

¹⁰“Wali okhwelola mbu oli obulahi mububibwo, waboola mbu, ‘Omundu siyaindolanga tawe.’ Obuchesibwo nende obumanyibwo bwakhukosia, ma noboola mumwoyokwo mbu ‘Ise nise Nyasaye — abulaho oundi ofwana singa ise.’

¹¹Esibi nasikhukwile esioranyala okhwetisa. Obubi nabukhukwile matetekhana, esibi siorapaalangakhwo tawe.

¹²Tsilil'la nobufumubwo nende emisaalachio chiokhwesinga, echiawarumikhila okhurula obwanabwo. Haundi chilaba nobukhonyi khuibe nobulechi; haundi olatechesia abasuku baabo n'nachio.

¹³Kata nikali onyoolanga amachetsiyio, obula obunyali. Lekha abachesi betsinyininyini beetse bakhuhonie, yaba abekela aketsinyininyini, abakabulanga likulu mubitonye nibakhubool'la buli mwesi aka nakeetse okhwekhola khu ibe.

¹⁴“Nababe singa omukhuutsi, ne omul'lo nakubasambe bosi; sibanyala okhwehonia abene okhurula khulumemo oluhiye p'pa tawe. Sikalaba amanda kokhwora tawe, kata omul'lo kwokhwikhala ahembi tawe.

¹⁵Yako niko amalahi akabanyala okhukhukhol'la ibe, abachesi betsinyininyini abawakhaabanga obukhonyi bwabwe mubulamubwo bwosi. Bosi nabakhulekhe buli mundu khunjila yiye. Abulaho khubo owanosikale khulwo okhukhuhonia ibe.”