Read lunyore ISAYA 48 Bible Online

ISAYA 48 - lunyore bible

ISAYA 48

¹Hulile yaka, inywe abandu ba Isiraeli, inywe abarula khulwibulo lwa Yuda: Mwesuhanga muliira lio MWAMI nimuboola mbu mwekayakayanga Nyasaye wa Isiraeli, nebutswa muboolanga obubehi.

²Okhuba mwelanganga abandu belitookho litsienukhu, nimweleeta khu Nyasaye wa Isiraeli; oweliira lilie ni OMWAMI Wokhunyala Biosi.

³OMWAMI abool'langa Isiraeli mbu, “Khale muno ndali okhurooba akakheetse okhukwa; ma ninjila nikekholekha matetekhana.

⁴Ndali okhumanya mbu muli namakosi amomu, muli abomelanu singa esibia khandi abooma m'moni singa omukasa.

⁵Khulwe yako ndekholel'la khale, akakhekholekhe khwinywe mumatukhu ketsanga, nimubool'la amang'ana tsana nikasili okhwekhola, khase mwakhabooye mbu, ‘Ebiniini biefwe nibio ebichil'le nikekhola, ebifwanani biefwe ebibaatse nende ebiomukasa biali okhukalaka kekhole.’

⁶“Kosi aka ndali okhurooba, luno kamal'le okhwekhola. Okhwola muhuchil'le mbu oburoobi bwanje nobwatooto. Luno nyenyanga okhumubool'la ebindu ebicheni ebia nabiekholekhe; ebindu ebia sili okhuribulakhwo olundi tawe.

⁷Niluno lwonyene olwa ngakholanga okhwekholekha, akafwana mbwo kasili okhwekholakhwo mumatukhu akabira tawe. Nikakhabeye mbwo, khane mwakhabooye mbu mwali nimwakamanya kosi.

⁸Ndali okhumanya mbu simwakhabeye abokhusubilwa tawe, okhuba mwamanyikha singa abeinduli. Niko akachila simwahul'lakhwo khu yaka tawe, ma nikachila ling'ana liosi khuko siliahul'likhakhwo mumarwi kenywe tawe.

⁹“Khulweliira lianje nasisil'le okhumanyia lirima lianje. Nanzitsoomibwe khulwokhubula okhumuhelesia esinyasio, nende okhumumuma.

¹⁰Mal'le okhumuteemela mumul'lo kwokhukhupibwa esibi, singa obwefetsa esiiywanga mus'sambilo siomul'lo, nebutswa ndanyooye mbu simuhela tawe.

¹¹Akakholanga kali khulwo luyali lwanje omwene, Sindakhahuchil'lakhwo eliira lianje liononibwe tawe; Kata sindakhasangakhwo nomundu undi obukhongo bwanje tawe.”

¹²OMWAMI aboolanga mbu, “Mumbulile, Isiraeli, inywe abandu abandali okhulanga! Nise Nyasaye owokhuranga, khandi owokhumal'likha, khandi nise Nyasaye sienyene.

¹³Amakhono kanje kalomba emisinji chiesibala, nikabaambuula likulu. Olwa nanganga esibala nende likulu, bitsanga bwangu ma bisinjila imbeli wanje.

¹⁴“Mwebunjikhe halala ma muhulile, inywe mwesi! Abulaho khubanyasaye bosi owakharoobele mbu omundu owa nzahuye yakhaseere Babulonia; alahesia aka nyenyanga akhole.

¹⁵Nise omwene owal'loma ma nimulanga; ndamwemel'la okhutsia ma nimuha tsingufu tsiokhuleka.

¹⁶“Ne luno mwesunde ahembi khu ise ma muhulile akamboolanga. Okhurula mukhuchaaka ndaboola habulafu, ne khasotso kholanga amang'ana kanje okhuba akatooto.” (Luno OMWAMI Wokhunyala Biosi umbelesisie obunyalibwe ma urumile.)

¹⁷Nyasaye omutsienukhu wa Isiraeli, OMWAMI omuhonianga inywe aboolanga mbu, “Ise ndi OMWAMI Nyasaye wenywe, owenyanga okhumwibaal'la akokhumukhonya inywe abene, namwemel'la munjila yamukwana okhulonda.

¹⁸“Mulabaakhwo nimwafumila amalako kanje! Khane tsikhabi tsiakhasuundukhile khwinywe, singa omuchela okurakhamanga tawe! Obulechi bwakhetsele khwinywe, singa amarunda akakhupakanga khuluchinga.

¹⁹Abetsukhulu benywe bakhabeeye abenji singa tsinzalu tsiomuyekhe, ne ndakhaluutsi mbu baramululwakhwo kata nahati tawe.”

²⁰Rule musibala sia Babulonia, mutsie nimuli abalakhuule! Kambe amang'ana mubusangali; mukaribule habundu hosi mbu: “OMWAMI uhonisie omurumikhili uwe Isiraeli!”

²¹Olwo MWAMI yemel'la abandu baabe okhubir'ra musitsiimi esiomu khandi esiayia p'pa, sibahul'la obuluho tawe. Yali okhubahinisia amaatsi okhurula mulwanda; yaaraka olwanda ma amaatsi nikarulamwo.

²²OMWAMI aboolanga mbu, “Omulembe sikuliho khubakholi betsimbi tawe.”