Read lunyore ISAYA 49 Bible Online

ISAYA 49 - lunyore bible

ISAYA 49

¹Mumbulile inywe amahanga kali ehale, inywe abandu bamwo abamenyanga ehale! OMWAMI yanzahula nisili okhwibula, niyanzela okhuba omurumikhili uwe.

²Yali okhwochiyia amang'ana kanje singa olukanga olwochi. Yali okhuusoola nomukhono kukwe. Yanomba singa olusele olwochi, khandi olwerechekhele okhurumikhilwa.

³Yambool'la mbu, “Isiraeli, ibe oli omurumikhili wanje; abandu balanzitsoomia khulwe ibe.”

⁴Nebutswa ndali okhuboola mbu, “Nakhalabane sila obukhala! Narumikhile tsingufu tsianje tsinyinji mumang'ana akabutswa akabulainganga. Kata mbwo nyala okhusubila OMWAMI okhusoola mumang'ana kanje; nayambeelesie omukabwa khumilimo chianje.”

⁵OMWAMI yali okhunzahula nisili okhwibulwa, yakhola okhuba omurumikhili uwe khulwokhukalusia abandu baabe. Mbu njelesie abandu ba Isiraeli abasalaanibwa. OMWAMI yambeetsanga oluyali; muye nimwo omwa nyoolanga tsingufu.

⁶OMWAMI yali okhumbool'la mbu, “Ndi nomulimo omukhongo okwanyenya okhole, ibe omurumikhili wanje. Sikhuli butswa okhukalusia obukhongo bwabandu ba Isiraeli abahonokokha bonyene tawe, nebutswa khandi nakhukhole ibe okhuba obulafu khumahanga, ma nakachile esibala siosi nasihonibwe.”

⁷Nyasaye omutsienukhu wa Isiraeli khandi omuhonia wabwe abool'langa uyo owachaaywa okhusila, owabihil'lwa namahanga khandi ouli omurumikhi wabaami mbu. “Abaruchi bakhakhulole noli omulakhuule, ne bakheename hasi okhukhufumia ibe.” Yaka nakekhole sichila OMWAMI wahuuye omurumikhili uwe; Nyasaye omutsienukhu wa Isiraeli yeetsul'langa okhuhesia amasubisio kaake.

⁸OMWAMI abool'langa abandube mbu, “Olweinyinga yokhumuhonia yakhoole, ndakhamumanyie tsimbabasi tsianje, ningalusia okhulakaya khwenywe okhwokhwenya obukhonyi. Ndakhamulinde nende okhumusoola, ne ndakhalombe indakano nabandu bosi okhubir'ra mwinywe. Ne ndakhamulamile okhubukula esibala sienywe khandi, esiali nisialekhwa likunda.

⁹Ndakhabool'le ababohe mbu, ‘Rule mubuhambe!’ Ne khu yabo abali musiilima mbu, ‘Hambe mubulafu!’ Nibali khunjila yokhutsia ingo, bakhanyoole ebiokhulia ebinji, kata nende khubikulu ebikhaya.

¹⁰Sibakhabe neinzala kata okhuhul'la obuluho tawe. Eliuba nende oluuya lwomusitsiimi sibiakhabasalisie tawe. Okhuba bakhemel'lwe nende uyo owabayanza. Yakhabeemel'le okhutsia khubitaho biamaatsi.

¹¹“Ndakhalombe injila okhubir'ra mubikulu, nende omuhanda kwabandu banje okhubir'rakhwo.

¹²Abandu banje bakheetse okhurula ehale muno, okhurula esinyolu nende emasaba, khandi okhurula mwitookho lia Aswani elili enandete.”

¹³Mwembe inywe abomwikulu! Mukhupe liyoka liobusangali inywe abomusibala! Lekha ebikulu nabio bichiake okhwemba! OMWAMI alahotselesia abandu baabe; alaba netsimbabasi khubandube abasaalilanga.

¹⁴Nebutswa abandu ba Yerusalemu bali okhuboola mbu, “OMWAMI wakhukhupa omukongo! Ye wakhwibil'la.”

¹⁵Kho OMWAMI aboolanga mbu, “Omukhasi yakhebil'lakhwo omwanawe mwene ma abule okhuyanza omwana wayeebula? Kata nikali mbu omukhasi anyala okhwibil'la omwanawe, Ise sinyala okhumwibil'la inywe tawe.

¹⁶Sinyala okhwibil'la ibe Yerusalemu tawe! Ndahandika eliira lilio khubikalo biamakhono kanje.

¹⁷“Yabo abakhakhwombokhe obuhia betsanga bwangu, ne yabo abamulula balatsia.

¹⁸Henge mulole akekholekhanga hamuli! Abandu baabo bali muliebunjelesia — bachelelanga ingo! Singa obwandi Nyasaye olimwoyo siahene, olekhoyela abandu baabo, olaba nomwekhoyo singa omweha yekhoyelanga ebimili bibie.

¹⁹“Esibalasio siali nisiamululwa khandi nisialekhwa likunda — nebutswa luno silaba esititi khu yabo abeetsanga okhumenyamwo. Ne yabo abali okhukhulekha mubusasikhi, balahiinibwa nibahilwa ehale.

²⁰Abandu baabo abebul'lwa mubuhambe, bakhakhubool'le litukhu elala mbu, ‘Esibala yisi nesitititi, khuhelesie obweyangu obukali bwokhumenyamwo!’

²¹Ma wakhaboole mumwoyo kukwo mbu, ‘Niwina owanzibul'la abaana yaba bosi? Abaana banje bali okhufwa, ne sindali okhwibula abandi tawe. Ndali omuhambe ma nimbilwa ehale — nebutswa niwina owakhusia abaana yaba? Lola, ndalekhwa sienyene — abaana yaba barula hena?’ ”

²²OMWAMI Nyasaye Wokhunyala Biosi abool'langa abandu baabe mbu: “Nanjinguule omukhono khulwokhusima amahanga, nako nakachelesie abaana baabo ingo.

²³Abaruchi bakhabe singa abapapa baabo, ne abaruchi bakhasi bakhabe singa abamama baabo. Bakhakhwinamile nibakhuheelesia oluyali; bakhakhuhelesie oluyali mukhwetutuyia. Nilwo olwa noomanye mbu ise nise OMWAMI; Omundu wosi olindil'langa obukhonyi bwanje sialasimba omurwe tawe.”

²⁴Wakhanyala okhubukula ebiomusikari yali okhuyaaka? Wakhanyala okhuhiinia ababohe mumukhono kwomusikari omululu?

²⁵OMWAMI akalusianga mbu, “Yako butswa niko aketsa okhwekhola. Ababohe bomusikari nababukulwe, ne ebiomusikari omululu yayaaka nabitiilwe. Nzia okhulwana lihe nende uyo okhulwananga ibe, khandi nambabine abaana baabo.

²⁶Yabo abakhusandianga nambakhole; okhwirana[9] abene khubene; bakholwe khulwo khunywa amatsahi kabwe abene. Nilwo olwabandu bosi nabamanye mbu ise nise OMWAMI, Omuhonianga nimukhola okhuba abalakhuule. Balamanya mbu Ise nise Nyasaye wa Isiraeli Wobunyali.”