Read lunyore ISAYA 5 Bible Online

ISAYA 5 - lunyore bible

ISAYA 5

¹Huyia olwa mba nikhwembelanga Olwembo yilu, Olwembo lwobuyanzi khumulina wanje halala nomukundakwe kwemisabibu: Omulina wanje yali nomukunda kwemisabibu khusikulu sieliloba linolu.

²Yalima amaloba ma nahiiniamwo amachina; yaraaka emisabibu emilahi okhusila. Yoombokha omunaara hakari homukunda khulwokhulinda emisabibu tsana, nalimamwo obuko bwokhutunyiilamwo emisabibu. Yalindil'la emisabibu okhwenga, nebutswa buli musabibu kwali omululu p'pa.

³Kho luno omulina wanje aboolanga mbu, “Inywe abandu abamenyanga Yerusalemu nende Yuda, muhaane obukhalachi hakari wanje nende omukunda kwanje kwemisabibu.

⁴Silikhwoho esindu esia ndabula okhukukhol'la? Kho busina nikuraama emisabibu emilahi singa ndanaayanga? Busina nikwama emisabibu emilulu musilenje yisio?

⁵“Kano niko aka nakhol'le omukunda kwanje kwe emisabibu; nambiniekhwo olukaka olwakubotokhana, nifunaka oluhinga olukulindanga, ma nandekhe tsinyama nabulimo okhukulia nokhukusen'na hasi.

⁶Nangulekhe obulimo nabuyumbe mukwo. Sinakhalile emisabibu kata okhukulima tawe; habula nandekhe amarakalu nende ebisisia okhumelamwo mwosi. Khandi nanzikal'le amalumbesi okhukwisia khukwo ifula.”

⁷Isiraeli nomukunda kwemisabibu kwo MWAMI Wokhunyala Biosi; abandu ba Yuda nabo nemisabibu etsia yasimikha. Yekomba bakhole akali amalahi, nebutswa musilenje yisio bakhola tsimbi tsiobwiri. Yekomba bakhole akali amalunji, nebutswa abasuku babwe balakaya bahebwe obukhalachi bwahabwene.

⁸Mulitsiboolelwa! Inywe abakulanga tsinyumba tsinyinji nende emikunda okhumeeta khutsiamuli n'natsio. Mumatukhu mati aketsanga sinamubetsenjekhwo nende habundu ahomundu kata mulala anyala okhumenya tawe, ne ninywe mwenyene aba nabamenye musibala.

⁹Mbuliiye OMWAMI Wokhunyala Biosi naboolanga mbu, “Tsinyumba yitsi tsiosi etsili tsikhongo khandi tsindahi tsiakhasikale butswa sila omundu okhumenyamwo.

¹⁰Omukunda kwemisabibu okuhela etsieka likhumi kulacheswamwo etsiliita munane tsiewaini tsionyene. Khandi imwo ehela tsindubi likhumi elacheswamwo obuswache obuhela indubi ndala yonyene.”

¹¹Mulitsiboolelwa! Inywe ababuukhanga mumabwebwe okhuchiaka okhunywa amalwa, khandi mumalanga tsinyinga tsirambi khubwile nimunywetsanga amalwa nokhukholwa.

¹²Mumasabo kenywe muli nende amatungu nobukhana nende amalele nende ewaini. Nebutswa simumanyilisinjia ako MWAMI akholanga tawe,

¹³ne kho mulahilwa ehale singa ababohe. Abemeli benywe balafwa khulwe inzala, ne abandu bandi balafwa khulwo obuluho.

¹⁴Esibala sie Makombe sili neinzala khubo, ne siasamianga omunwa kwasio kwosi. Similanga bukala abakhulundu ba Yerusalemu halala nende emikanda tsiabandu bandi abakhupanga liyoka.

¹⁵Siomundu alaba netsisoni, ne yabo bosi abelolanga balatutuhibwa.

¹⁶Nebutswa OMWAMI Wokhunyala Biosi amanyianga obukhongobwe mukhukhola akali amalunji, khandi abisulanga obutsienukhubwe khulwokhukhalachila abandube.

¹⁷Mumatookho akasikala likunda, ebimeme biamakondi bilaayamwo obunyasi ne ebimeme bietsimbusi bilanyoolamwo obwayilo.

¹⁸Mulitsiboolelwa! Inywe abaranyala okhwatikha okhurula mutsimbi tsienywe butoro tawe.

¹⁹Muboolanga mbu, “Lekha OMWAMI akhole bwangu aka aboolanga alakakhola, kho nefwe khukalole. Lekha Nyasaye omutsienukhu wa Isiraeli ahesie obuloosie bubwe; lekhe khulole akali n'nako mumakani!”

²⁰Mulitsiboolelwa! Inywe abalanganga amabi amalahi, khandi mulanganga amalahi amabi. Mukalukhanianga esiilima okhuba obulafu ne obulafu okhuba esiilima. Mukholanga esili esilulu okhuba esielungu, ne esielungu okhuba esilulu.

²¹Mulitsiboolelwa! Inywe abelolanga okhuba muli abachesi khandi abalwenyukhu mutsimoni tsienywe abene.

²²Mulitsiboolelwa! Inywe abanywi abakhongo bamalwa kemusichupa khandi abararitsanga munyinga yokhutsokaania amalwa!

²³Nebutswa mukholanga abandu babi okhuba abalakhuule khulwo khuhebwa ebihetso, ne nimwikal'la abalunji okhunyoola obukhalachi bwabwe obwahabwene.

²⁴Kho luno, singa butswa tsimuli nende obunyasi obwomu bukhamulukhanga nibusambwa m'mul'lo, nimbwo emisi chienywe chiabola ne ebimuli bienywe bilooma k'ka nibituumukha singa olukhuukhi, sichila mwasuula okhuhuchil'la ako MWAMI Wokhunyala Biosi, Nyasaye omutsienukhu wa Isiraeli yabeeye okhumwibaal'la.

²⁵OMWAMI usinyikhiye abandu baabe ma unyiil'le omukhonokwe okhubahelesia esinyasio. Ebikulu ebirambi bilatechela, ne emibili chie yabo abafwitsanga tsilalekhwa mutsing'anyi singa amandu. Ne kata mbwo lirima lia Nyasaye sililahwa tawe, nebutswa omukhonokwe kulatsilil'la okhunyiilwa mbu kuhaane esinyasio.

²⁶OMWAMI amanyianga esimanyilo khulwokhulanga lihanga liehale. Akhupanga esifwetere nalanga abandu okhurla khutsindulo tsiesibala. Ne lola beetsanga bwangu, bwel'lekha!

²⁷Abulaho omundu kata mulala khubo ochonyanga; kata abulaho owesikar'ranga tawe. Sibarengetsanga kata okhukona tsindoolo tawe. Kata omukhoba sikutendeyanga tawe; kata emikoye chiebilaaro sichikatukhanga tawe.

²⁸Tsisele tsiabwe netsinzochi ne obuyingo bwabwe bwerechekhele okhulasa. Tsimbakayu tsietsisululi tsiabwe netsinyomu k'ka singa lichina, ne ebilenje biamakaari kabwe kobulwani bibotokhananga singa esihutsutsu siomuyeka.

²⁹Abasikari bahuumanga singa etsisimba etsiir're esolo ma tsichinganga esolo tsana nichihila ahomundu aranyala okhutsinuula tawe.

³⁰Olwe litukhu tsana liakhole, bakhahool'le khu Isiraeli butinyu singa inyanza ehoolanga. Henge mulole esibala yisi! Esiilima nom'boko! Obulafu bumil'lwe nende esiilima.