Read lunyore ISAYA 50 Bible Online

ISAYA 50 - lunyore bible

ISAYA 50

¹OMWAMI aboolanga mbu, “Mupaalanga mbu ndali okhukhunga abandu banje singa obwomusaatsa akhunganga omukhasi uwe noho? Kho, etsibarwa tsiokhumanyia mbu ndabakhunga tsili hena? Mupaalanga mbu ndali okhumukusia mubuhambe singa obwomundu akusianga abaana baabe okhuba abasumba noho? Tawe, inywe mwatsia mubuhambe khulwe tsimbi tsienywe; mwakhungwa khulwobubi bwenywe.

²“Busina abandu banje barayimbulila olwa ndeetsa khubo mbu mbahonie? Busina barahuchil'la olwa ndali okhubalanga? Mbula ndi omutofu oranyala okhuhonia noho? Lola, khulwe lilako lianje khamianga inyanza, khandi ngalukhanianga emichela okhukwa esiyieyie, mbu tsisutse tsiamwo tsiifwe khulwa okhubula amaatsi.

³Nyala okhukalukhania likulu okhukwa limwamu t'ti, kho kafwane singa okhwekhuula abafu.”

⁴OMWAMI Nyasaye Wokhunyala Biosi unzibaaliiye akokhuboola, kho nandinyilisie abatohele. Buli mukamba yambeetsanga esinani okhuhul'la aka yenya okhunzibaal'la.

⁵OMWAMI waimbelesia limanyilisia, ne sili okhukholakhwo induli, kata okhumukhupakhwo omukongo tawe.

⁶Ndahaana omukongo kwanje khuyabo abenya okhunywekha. Sindali okhubakaya olwa bali okhunyeka tawe, kata olwa beha tsindefu tsianje nibafuutsila amare m'moni.

⁷Nebutswa amanyeko kabwe sikanyala okhuusalisia tawe, sichila OMWAMI Nyasaye yambetsanga obukhonyi. Ndehakianga okhukefwila. Manyile mbu sindakhasimbe omurwe tawe,

⁸okhuba Nyasaye ali ahembi, naye alanyoola ise nimbula esikha. Mbula alikhwoho omundu owakhanzaala musiina? Chenda khutsie musiina halala! Lekha aboole akayanzaalanga!

⁹OMWAMI Nyasaye omwene yasoolanga — kho niwina onyala okhunyoola nesikha? Yabo abanzaalanga bosi balakora; balakhamulukha singa ingubo eya matsilili kaliiye.

¹⁰Inywe mwesi abafumianga OMWAMI nimulonda amang'ana komurumikhili uwe, injila eyamulondangakhwo enyala okhuba esiilima okhusila, nebutswa musuubile OMWAMI, mweleete khu Nyasaye wenywe.

¹¹Inywe mwesi abaloosianga okhumulula abandi masilisi, mulamululwa nobusiemani bwenywe abene. OMWAMI omwene alachila yaka kekhole; mulanyoola amanyakhano amabi okhusila.